;


Sūkta 4.1 

tvā́ṃ hyagne sádamítsamanyávo devā́so devámaratíṃ nyerirá íti krátvā nyeriré |
ámartyaṃ yajata mártyeṣvā́ devámā́devaṃ janata prácetasaṃ víśvamā́devaṃ janata prácetasam || 1||











sá bʰrā́taraṃ váruṇamagna ā́ vavṛtsva devā́m̐ ácʰā sumatī́ yajñávanasaṃ jyéṣṭʰaṃ yajñávanasam |
ṛtā́vānamādityáṃ carṣaṇīdʰṛ́taṃ rā́jānaṃ carṣaṇīdʰṛ́tam || 2||











sákʰe sákʰāyamabʰyā́ vavṛtsvāśúṃ ná cakráṃ rátʰyeva ráṃhyāsmábʰyaṃ dasma ráṃhyā |
ágne mṛḷīkáṃ váruṇe sácā vido marútsu viśvábʰānuṣu |
tokā́ya tujé śuśucāna śáṃ kṛdʰyasmábʰyaṃ dasma śáṃ kṛdʰi || 3||











tváṃ no agne váruṇasya vidvā́ndevásya héḷó'va yāsisīṣṭʰāḥ |
yájiṣṭʰo váhnitamaḥ śóśucāno víśvā dvéṣāṃsi prá mumugdʰyasmát || 4||











sá tváṃ no agne'vamó bʰavotī́ nédiṣṭʰo asyā́ uṣáso vyùṣṭau |
áva yakṣva no váruṇaṃ rárāṇo vīhí mṛḷīkáṃ suhávo na edʰi || 5||











asyá śréṣṭʰā subʰágasya saṃdṛ́gdevásya citrátamā mártyeṣu |
śúci gʰṛtáṃ ná taptámágʰnyāyā spārhā́ devásya maṃháneva dʰenóḥ || 6||











trírasya tā́ paramā́ santi satyā́ spārhā́ devásya jánimānyagnéḥ |
ananté antáḥ párivīta ā́gācʰúciḥ śukró aryó rórucānaḥ || 7||











sá dūtó víśvédabʰí vaṣṭi sádmā hótā híraṇyaratʰo ráṃsujihvaḥ |
rohídaśvo vapuṣyò vibʰā́vā sádā raṇváḥ pitumátīva saṃsát || 8||











sá cetayanmánuṣo yajñábandʰuḥ prá táṃ mahyā́ raśanáyā nayanti |
sá kṣetyasya dúryāsu sā́dʰandevó mártasya sadʰanitvámāpa || 9||











sá tū́ no agnírnayatu prajānánnácʰā rátnaṃ devábʰaktaṃ yádasya |
dʰiyā́ yádvíśve amṛ́tā ákṛṇvandyaúṣpitā́ janitā́ satyámukṣan || 10||











sá jāyata pratʰamáḥ pastyā̀su mahó budʰné rájaso asyá yónau |
apā́daśīrṣā́ guhámāno ántāyóyuvāno vṛṣabʰásya nīḷé || 11||











prá śárdʰa ārta pratʰamáṃ vipanyám̐ ṛtásya yónā vṛṣabʰásya nīḷé |
spārhó yúvā vapuṣyò vibʰā́vā saptá priyā́so'janayanta vṛ́ṣṇe || 12||











asmā́kamátra pitáro manuṣyā̀ abʰí prá sedurṛtámāśuṣāṇā́ḥ |
áśmavrajāḥ sudúgʰā vavré antárúdusrā́ ājannuṣáso huvānā́ḥ || 13||











té marmṛjata dadṛvā́ṃso ádriṃ tádeṣāmanyé abʰíto ví vocan |
paśváyantrāso abʰí kārámarcanvidánta jyótiścakṛpánta dʰībʰíḥ || 14||











té gavyatā́ mánasā dṛdʰrámubdʰáṃ gā́ yemānáṃ pári ṣántamádrim |
dṛḷháṃ náro vácasā daívyena vrajáṃ gómantamuśíjo ví vavruḥ || 15||











té manvata pratʰamáṃ nā́ma dʰenóstríḥ saptá mātúḥ paramā́ṇi vindan |
tájjānatī́rabʰyànūṣata vrā́ āvírbʰuvadaruṇī́ryaśásā góḥ || 16||











néśattámo dúdʰitaṃ rócata dyaúrúddevyā́ uṣáso bʰānúrarta |
ā́ sū́ryo bṛhatástiṣṭʰadájrām̐ ṛjú márteṣu vṛjinā́ ca páśyan || 17||











ā́dítpaścā́ bubudʰānā́ vyakʰyannā́dídrátnaṃ dʰārayanta dyúbʰaktam |
víśve víśvāsu dúryāsu devā́ mítra dʰiyé varuṇa satyámastu || 18||











ácʰā voceya śuśucānámagníṃ hótāraṃ viśvábʰarasaṃ yájiṣṭʰam |
śúcyū́dʰo atṛṇanná gávāmándʰo ná pūtáṃ páriṣiktamaṃśóḥ || 19||











víśveṣāmáditiryajñíyānāṃ víśveṣāmátitʰirmā́nuṣāṇām |
agnírdevā́nāmáva āvṛṇānáḥ sumṛḷīkó bʰavatu jātávedāḥ || 20||












Sūkta 4.2 

yó mártyeṣvamṛ́ta ṛtā́vā devó devéṣvaratírnidʰā́yi |
hótā yájiṣṭʰo mahnā́ śucádʰyai havyaíragnírmánuṣa īrayádʰyai || 1||











ihá tváṃ sūno sahaso no adyá jātó jātā́m̐ ubʰáyām̐ antáragne |
dūtá īyase yuyujāná ṛṣva ṛjumuṣkā́nvṛ́ṣaṇaḥ śukrā́m̐śca || 2||











átyā vṛdʰasnū́ róhitā gʰṛtásnū ṛtásya manye mánasā jáviṣṭʰā |
antárīyase aruṣā́ yujānó yuṣmā́m̐śca devā́nvíśa ā́ ca mártān || 3||











aryamáṇaṃ váruṇaṃ mitrámeṣāmíndrāvíṣṇū marúto aśvínotá |
sváśvo agne surátʰaḥ surā́dʰā édu vaha suhavíṣe jánāya || 4||











gómām̐ agné'vimām̐ aśvī́ yajñó nṛvátsakʰā sádamídapramṛṣyáḥ |
íḷāvām̐ eṣó asura prajā́vāndīrgʰó rayíḥ pṛtʰubudʰnáḥ sabʰā́vān || 5||











yásta idʰmáṃ jabʰáratsiṣvidānó mūrdʰā́naṃ vā tatápate tvāyā́ |
bʰúvastásya svátavām̐ḥ pāyúragne víśvasmātsīmagʰāyatá uruṣya || 6||











yáste bʰárādánniyate cidánnaṃ niśíṣanmandrámátitʰimudī́rat |
ā́ devayúrinádʰate duroṇé tásminrayírdʰruvó astu dā́svān || 7||











yástvā doṣā́ yá uṣási praśáṃsātpriyáṃ vā tvā kṛṇávate havíṣmān |
áśvo ná své dáma ā́ hemyā́vāntámáṃhasaḥ pīparo dāśvā́ṃsam || 8||











yástúbʰyamagne amṛ́tāya dā́śaddúvastvé kṛṇávate yatásruk |
ná sá rāyā́ śaśamānó ví yoṣannaínamáṃhaḥ pári varadagʰāyóḥ || 9||











yásya tvámagne adʰvaráṃ jújoṣo devó mártasya súdʰitaṃ rárāṇaḥ |
prītédasaddʰótrā sā́ yaviṣṭʰā́sāma yásya vidʰató vṛdʰā́saḥ || 10||











cíttimácittiṃ cinavadví vidvā́npṛṣṭʰéva vītā́ vṛjinā́ ca mártān |
rāyé ca naḥ svapatyā́ya deva dítiṃ ca rā́svā́ditimuruṣya || 11||











kavíṃ śaśāsuḥ kaváyó'dabdʰā nidʰāráyanto dúryāsvāyóḥ |
átastváṃ dṛ́śyām̐ agna etā́npaḍbʰíḥ paśyerádbʰutām̐ aryá évaiḥ || 12||











tvámagne vāgʰáte supráṇītiḥ sutásomāya vidʰaté yaviṣṭʰa |
rátnaṃ bʰara śaśamānā́ya gʰṛṣve pṛtʰú ścandrámávase carṣaṇiprā́ḥ || 13||











ádʰā ha yádvayámagne tvāyā́ paḍbʰírhástebʰiścakṛmā́ tanū́bʰiḥ |
rátʰaṃ ná kránto ápasā bʰuríjorṛtáṃ yemuḥ sudʰyà āśuṣāṇā́ḥ || 14||











ádʰā mātúruṣásaḥ saptá víprā jā́yemahi pratʰamā́ vedʰáso nṝ́n |
divásputrā́ áṅgiraso bʰavemā́driṃ rujema dʰanínaṃ śucántaḥ || 15||











ádʰā yátʰā naḥ pitáraḥ párāsaḥ pratnā́so agna ṛtámāśuṣāṇā́ḥ |
śúcī́dayandī́dʰitimuktʰaśā́saḥ kṣā́mā bʰindánto aruṇī́rápa vran || 16||











sukármāṇaḥ surúco devayántó'yo ná devā́ jánimā dʰámantaḥ |
śucánto agníṃ vavṛdʰánta índramūrváṃ gávyaṃ pariṣádanto agman || 17||











ā́ yūtʰéva kṣumáti paśvó akʰyaddevā́nāṃ yájjánimā́ntyugra |
mártānāṃ cidurváśīrakṛpranvṛdʰé cidaryá úparasyāyóḥ || 18||











ákarma te svápaso abʰūma ṛtámavasrannuṣáso vibʰātī́ḥ |
ánūnamagníṃ purudʰā́ suścandráṃ devásya mármṛjataścā́ru cákṣuḥ || 19||











etā́ te agna ucátʰāni vedʰó'vocāma kaváye tā́ juṣasva |
úcʰocasva kṛṇuhí vásyaso no mahó rāyáḥ puruvāra prá yandʰi || 20||












Sūkta 4.3 

ā́ vo rā́jānamadʰvarásya rudráṃ hótāraṃ satyayájaṃ ródasyoḥ |
agníṃ purā́ tanayitnóracíttāddʰíraṇyarūpamávase kṛṇudʰvam || 1||











ayáṃ yóniścakṛmā́ yáṃ vayáṃ te jāyéva pátya uśatī́ suvā́sāḥ |
arvācīnáḥ párivīto ní ṣīdemā́ u te svapāka pratīcī́ḥ || 2||











āśṛṇvaté ádṛpitāya mánma nṛcákṣase sumṛḷīkā́ya vedʰaḥ |
devā́ya śastímamṛ́tāya śaṃsa grā́veva sótā madʰuṣúdyámīḷé || 3||











tváṃ cinnaḥ śámyā agne asyā́ ṛtásya bodʰyṛtacitsvādʰī́ḥ |
kadā́ ta uktʰā́ sadʰamā́dyāni kadā́ bʰavanti sakʰyā́ gṛhé te || 4||











katʰā́ ha tádváruṇāya tvámagne katʰā́ divé garhase kánna ā́gaḥ |
katʰā́ mitrā́ya mīḷhúṣe pṛtʰivyaí brávaḥ kádaryamṇé kádbʰágāya || 5||











káddʰíṣṇyāsu vṛdʰasānó agne kádvā́tāya prátavase śubʰaṃyé |
párijmane nā́satyāya kṣé brávaḥ kádagne rudrā́ya nṛgʰné || 6||











katʰā́ mahé puṣṭimbʰarā́ya pūṣṇé kádrudrā́ya súmakʰāya havirdé |
kádvíṣṇava urugāyā́ya réto brávaḥ kádagne śárave bṛhatyaí || 7||











katʰā́ śárdʰāya marútāmṛtā́ya katʰā́ sūré bṛhaté pṛcʰyámānaḥ |
práti bravó'ditaye turā́ya sā́dʰā divó jātavedaścikitvā́n || 8||











ṛténa ṛtáṃ níyatamīḷa ā́ górāmā́ sácā mádʰumatpakvámagne |
kṛṣṇā́ satī́ rúśatā dʰāsínaiṣā́ jā́maryeṇa páyasā pīpāya || 9||











ṛténa hí ṣmā vṛṣabʰáścidaktáḥ púmām̐ agníḥ páyasā pṛṣṭʰyèna |
áspandamāno acaradvayodʰā́ vṛ́ṣā śukráṃ duduhe pṛ́śnirū́dʰaḥ || 10||











ṛténā́driṃ vyàsanbʰidántaḥ sámáṅgiraso navanta góbʰiḥ |
śunáṃ náraḥ pári ṣadannuṣā́samāvíḥ svarabʰavajjāté agnaú || 11||











ṛténa devī́ramṛ́tā ámṛktā árṇobʰirā́po mádʰumadbʰiragne |
vājī́ ná sárgeṣu prastubʰānáḥ prá sádamítsrávitave dadʰanyuḥ || 12||











mā́ kásya yakṣáṃ sádamíddʰuró gā mā́ veśásya praminató mā́péḥ |
mā́ bʰrā́turagne ánṛjorṛṇáṃ vermā́ sákʰyurdákṣaṃ ripórbʰujema || 13||











rákṣā ṇo agne táva rákṣaṇebʰī rārakṣāṇáḥ sumakʰa prīṇānáḥ |
práti ṣpʰura ví ruja vīḍváṃho jahí rákṣo máhi cidvāvṛdʰānám || 14||











ebʰírbʰava sumánā agne arkaírimā́nspṛśa mánmabʰiḥ śūra vā́jān |
utá bráhmāṇyaṅgiro juṣasva sáṃ te śastírdevávātā jareta || 15||











etā́ víśvā vidúṣe túbʰyaṃ vedʰo nītʰā́nyagne niṇyā́ vácāṃsi |
nivácanā kaváye kā́vyānyáśaṃsiṣaṃ matíbʰirvípra uktʰaíḥ || 16||












Sūkta 4.4 

kṛṇuṣvá pā́jaḥ prásitiṃ ná pṛtʰvī́ṃ yāhí rā́jevā́mavām̐ íbʰena |
tṛṣvī́mánu prásitiṃ drūṇānó'stāsi vídʰya rakṣásastápiṣṭʰaiḥ || 1||











táva bʰramā́sa āśuyā́ patantyánu spṛśa dʰṛṣatā́ śóśucānaḥ |
tápūṃṣyagne juhvā̀ pataṃgā́násaṃdito ví sṛja víṣvagulkā́ḥ || 2||











práti spáśo ví sṛja tū́rṇitamo bʰávā pāyúrviśó asyā́ ádabdʰaḥ |
yó no dūré agʰáśaṃso yó ántyágne mā́kiṣṭe vyátʰirā́ dadʰarṣīt || 3||











údagne tiṣṭʰa prátyā́ tanuṣva nyàmítrām̐ oṣatāttigmahete |
yó no árātiṃ samidʰāna cakré nīcā́ táṃ dʰakṣyatasáṃ ná śúṣkam || 4||











ūrdʰvó bʰava práti vidʰyā́dʰyasmádāvíṣkṛṇuṣva daívyānyagne |
áva stʰirā́ tanuhi yātujū́nāṃ jāmímájāmiṃ prá mṛṇīhi śátrūn || 5||











sá te jānāti sumatíṃ yaviṣṭʰa yá ī́vate bráhmaṇe gātúmaírat |
víśvānyasmai sudínāni rāyó dyumnā́nyaryó ví dúro abʰí dyaut || 6||











sédagne astu subʰágaḥ sudā́nuryástvā nítyena havíṣā yá uktʰaíḥ |
píprīṣati svá ā́yuṣi duroṇé víśvédasmai sudínā sā́sadiṣṭíḥ || 7||











árcāmi te sumatíṃ gʰóṣyarvā́ksáṃ te vāvā́tā jaratāmiyáṃ gī́ḥ |
sváśvāstvā surátʰā marjayemāsmé kṣatrā́ṇi dʰārayeránu dyū́n || 8||











ihá tvā bʰū́ryā́ caredúpa tmándóṣāvastardīdivā́ṃsamánu dyū́n |
krī́ḷantastvā sumánasaḥ sapemābʰí dyumnā́ tastʰivā́ṃso jánānām || 9||











yástvā sváśvaḥ suhiraṇyó agna upayā́ti vásumatā rátʰena |
tásya trātā́ bʰavasi tásya sákʰā yásta ātitʰyámānuṣágjújoṣat || 10||











mahó rujāmi bandʰútā vácobʰistánmā pitúrgótamādánviyāya |
tváṃ no asyá vácasaścikiddʰi hótaryaviṣṭʰa sukrato dámūnāḥ || 11||











ásvapnajastaráṇayaḥ suśévā átandrāso'vṛkā́ áśramiṣṭʰāḥ |
té pāyávaḥ sadʰryàñco niṣádyā́gne táva naḥ pāntvamūra || 12||











yé pāyávo māmateyáṃ te agne páśyanto andʰáṃ duritā́dárakṣan |
rarákṣa tā́nsukṛ́to viśvávedā dípsanta ídripávo nā́ha debʰuḥ || 13||











tváyā vayáṃ sadʰanyàstvótāstáva práṇītyaśyāma vā́jān |
ubʰā́ śáṃsā sūdaya satyatāte'nuṣṭʰuyā́ kṛṇuhyahrayāṇa || 14||











ayā́ te agne samídʰā vidʰema práti stómaṃ śasyámānaṃ gṛbʰāya |
dáhāśáso rakṣásaḥ pāhyàsmā́ndruhó nidó mitramaho avadyā́t || 15||












Sūkta 4.5 

vaiśvānarā́ya mīḷhúṣe sajóṣāḥ katʰā́ dāśemāgnáye bṛhádbʰā́ḥ |
ánūnena bṛhatā́ vakṣátʰenópa stabʰāyadupamínná ródʰaḥ || 1||











mā́ nindata yá imā́ṃ máhyaṃ rātíṃ devó dadaú mártyāya svadʰā́vān |
pā́kāya gṛ́tso amṛ́to vícetā vaiśvānaró nṛ́tamo yahvó agníḥ || 2||











sā́ma dvibárhā máhi tigmábʰṛṣṭiḥ sahásraretā vṛṣabʰástúviṣmān |
padáṃ ná górápagūḷhaṃ vividvā́nagnírmáhyaṃ prédu vocanmanīṣā́m || 3||











prá tā́m̐ agnírbabʰasattigmájambʰastápiṣṭʰena śocíṣā yáḥ surā́dʰāḥ |
prá yé minánti váruṇasya dʰā́ma priyā́ mitrásya cétato dʰruvā́ṇi || 4||











abʰrātáro ná yóṣaṇo vyántaḥ patirípo ná jánayo durévāḥ |
pāpā́saḥ sánto anṛtā́ asatyā́ idáṃ padámajanatā gabʰīrám || 5||











idáṃ me agne kíyate pāvakā́minate gurúṃ bʰāráṃ ná mánma |
bṛháddadʰātʰa dʰṛṣatā́ gabʰīráṃ yahváṃ pṛṣṭʰáṃ práyasā saptádʰātu || 6||











támínnvèvá samanā́ samānámabʰí krátvā punatī́ dʰītíraśyāḥ |
sasásya cármannádʰi cā́ru pṛ́śnerágre rupá ā́rupitaṃ jábāru || 7||











pravā́cyaṃ vácasaḥ kíṃ me asyá gúhā hitámúpa niṇígvadanti |
yádusríyāṇāmápa vā́riva vránpā́ti priyáṃ rupó ágraṃ padáṃ véḥ || 8||











idámu tyánmáhi mahā́mánīkaṃ yádusríyā sácata pūrvyáṃ gaúḥ |
ṛtásya padé ádʰi dī́dyānaṃ gúhā ragʰuṣyádragʰuyádviveda || 9||











ádʰa dyutānáḥ pitróḥ sácāsā́manuta gúhyaṃ cā́ru pṛ́śneḥ |
mātúṣpadé paramé ánti ṣádgórvṛ́ṣṇaḥ śocíṣaḥ práyatasya jihvā́ || 10||











ṛtáṃ voce námasā pṛcʰyámānastávāśásā jātavedo yádīdám |
tvámasyá kṣayasi yáddʰa víśvaṃ diví yádu dráviṇaṃ yátpṛtʰivyā́m || 11||











kíṃ no asyá dráviṇaṃ káddʰa rátnaṃ ví no voco jātavedaścikitvā́n |
gúhā́dʰvanaḥ paramáṃ yánno asyá réku padáṃ ná nidānā́ áganma || 12||











kā́ maryā́dā vayúnā káddʰa vāmámácʰā gamema ragʰávo ná vā́jam |
kadā́ no devī́ramṛ́tasya pátnīḥ sū́ro várṇena tatanannuṣā́saḥ || 13||











aniréṇa vácasā pʰalgvèna pratī́tyena kṛdʰúnātṛpā́saḥ |
ádʰā té agne kímihā́ vadantyanāyudʰā́sa ā́satā sacantām || 14||











asyá śriyé samidʰānásya vṛ́ṣṇo vásoránīkaṃ dáma ā́ ruroca |
rúśadvásānaḥ sudṛ́śīkarūpaḥ kṣitírná rāyā́ puruvā́ro adyaut || 15||












Sūkta 4.6 

ūrdʰvá ū ṣú ṇo adʰvarasya hotarágne tíṣṭʰa devátātā yájīyān |
tváṃ hí víśvamabʰyási mánma prá vedʰásaścittirasi manīṣā́m || 1||











ámūro hótā nyàsādi vikṣvàgnírmandró vidátʰeṣu prácetāḥ |
ūrdʰváṃ bʰānúṃ savitévāśrenméteva dʰūmáṃ stabʰāyadúpa dyā́m || 2||











yatā́ sujūrṇī́ rātínī gʰṛtā́cī pradakṣiṇíddevátātimurāṇáḥ |
údu svárurnavajā́ nā́kráḥ paśvó anakti súdʰitaḥ sumékaḥ || 3||











stīrṇé barhíṣi samidʰāné agnā́ ūrdʰvó adʰvaryúrjujuṣāṇó astʰāt |
páryagníḥ paśupā́ ná hótā triviṣṭyèti pradíva urāṇáḥ || 4||











pári tmánā mitádrureti hótāgnírmandró mádʰuvacā ṛtā́vā |
drávantyasya vājíno ná śókā bʰáyante víśvā bʰúvanā yádábʰrāṭ || 5||











bʰadrā́ te agne svanīka saṃdṛ́ggʰorásya sató víṣuṇasya cā́ruḥ |
ná yátte śocístámasā váranta ná dʰvasmā́nastanvī̀ répa ā́ dʰuḥ || 6||











ná yásya sā́turjánitorávāri ná mātárāpitárā nū́ cidiṣṭaú |
ádʰā mitró ná súdʰitaḥ pāvakò'gnírdīdāya mā́nuṣīṣu vikṣú || 7||











dvíryáṃ páñca jī́janansaṃvásānāḥ svásāro agníṃ mā́nuṣīṣu vikṣú |
uṣarbúdʰamatʰaryò ná dántaṃ śukráṃ svā́saṃ paraśúṃ ná tigmám || 8||











táva tyé agne haríto gʰṛtasnā́ róhitāsa ṛjváñcaḥ sváñcaḥ |
aruṣā́so vṛ́ṣaṇa ṛjumuṣkā́ ā́ devátātimahvanta dasmā́ḥ || 9||











yé ha tyé te sáhamānā ayā́sastveṣā́so agne arcáyaścáranti |
śyenā́so ná duvasanā́so ártʰaṃ tuviṣvaṇáso mā́rutaṃ ná śárdʰaḥ || 10||











ákāri bráhma samidʰāna túbʰyaṃ śáṃsātyuktʰáṃ yájate vyū̀ dʰāḥ |
hótāramagníṃ mánuṣo ní ṣedurnamasyánta uśíjaḥ śáṃsamāyóḥ || 11||












Sūkta 4.7 

ayámihá pratʰamó dʰāyi dʰātṛ́bʰirhótā yájiṣṭʰo adʰvaréṣvī́ḍyaḥ |
yámápnavāno bʰṛ́gavo virurucúrváneṣu citráṃ vibʰvàṃ viśéviśe || 1||











ágne kadā́ ta ānuṣágbʰúvaddevásya cétanam |
ádʰā hí tvā jagṛbʰriré mártāso vikṣvī́ḍyam || 2||











ṛtā́vānaṃ vícetasaṃ páśyanto dyā́miva stṛ́bʰiḥ |
víśveṣāmadʰvarā́ṇāṃ haskartā́raṃ dámedame || 3||











āśúṃ dūtáṃ vivásvato víśvā yáścarṣaṇī́rabʰí |
ā́ jabʰruḥ ketúmāyávo bʰṛ́gavāṇaṃ viśéviśe || 4||











támīṃ hótāramānuṣákcikitvā́ṃsaṃ ní ṣedire |
raṇváṃ pāvakáśociṣaṃ yájiṣṭʰaṃ saptá dʰā́mabʰiḥ || 5||











táṃ śáśvatīṣu mātṛ́ṣu vána ā́ vītámáśritam |
citráṃ sántaṃ gúhā hitáṃ suvédaṃ kūcidartʰínam || 6||











sasásya yádvíyutā sásminnū́dʰannṛtásya dʰā́manraṇáyanta devā́ḥ |
mahā́m̐ agnírnámasā rātáhavyo véradʰvarā́ya sádamídṛtā́vā || 7||











véradʰvarásya dūtyā̀ni vidvā́nubʰé antā́ ródasī saṃcikitvā́n |
dūtá īyase pradíva urāṇó vidúṣṭaro divá āródʰanāni || 8||











kṛṣṇáṃ ta éma rúśataḥ puró bʰā́ścariṣṇvàrcírvápuṣāmídékam |
yádápravītā dádʰate ha gárbʰaṃ sadyáścijjātó bʰávasī́du dūtáḥ || 9||











sadyó jātásya dádṛśānamójo yádasya vā́to anuvā́ti śocíḥ |
vṛṇákti tigmā́mataséṣu jihvā́ṃ stʰirā́ cidánnā dayate ví jámbʰaiḥ || 10||











tṛṣú yádánnā tṛṣúṇā vavákṣa tṛṣúṃ dūtáṃ kṛṇute yahvó agníḥ |
vā́tasya meḷíṃ sacate nijū́rvannāśúṃ ná vājayate hinvé árvā || 11||












Sūkta 4.8 

dūtáṃ vo viśvávedasaṃ havyavā́hamámartyam |
yájiṣṭʰamṛñjase girā́ || 1||











sá hí védā vásudʰitiṃ mahā́m̐ āródʰanaṃ diváḥ |
sá devā́m̐ éhá vakṣati || 2||











sá veda devá ānámaṃ devā́m̐ ṛtāyaté dáme |
dā́ti priyā́ṇi cidvásu || 3||











sá hótā sédu dūtyàṃ cikitvā́m̐ antárīyate |
vidvā́m̐ āródʰanaṃ diváḥ || 4||











té syāma yé agnáye dadāśúrhavyádātibʰiḥ |
yá īṃ púṣyanta indʰaté || 5||











té rāyā́ té suvī́ryaiḥ sasavā́ṃso ví śṛṇvire |
yé agnā́ dadʰiré dúvaḥ || 6||











asmé rā́yo divédive sáṃ carantu puruspṛ́haḥ |
asmé vā́jāsa īratām || 7||











sá vípraścarṣaṇīnā́ṃ śávasā mā́nuṣāṇām |
áti kṣipréva vidʰyati || 8||












Sūkta 4.9 

ágne mṛḷá mahā́m̐ asi yá īmā́ devayúṃ jánam |
iyétʰa barhírāsádam || 1||











sá mā́nuṣīṣu dūḷábʰo vikṣú prāvī́rámartyaḥ |
dūtó víśveṣāṃ bʰuvat || 2||











sá sádma pári ṇīyate hótā mandró díviṣṭiṣu |
utá pótā ní ṣīdati || 3||











utá gnā́ agníradʰvará utó gṛhápatirdáme |
utá brahmā́ ní ṣīdati || 4||











véṣi hyàdʰvarīyatā́mupavaktā́ jánānām |
havyā́ ca mā́nuṣāṇām || 5||











véṣī́dvasya dūtyàṃ yasya jújoṣo adʰvarám |
havyáṃ mártasya vóḷhave || 6||











asmā́kaṃ joṣyadʰvarámasmā́kaṃ yajñámaṅgiraḥ |
asmā́kaṃ śṛṇudʰī hávam || 7||











pári te dūḷábʰo rátʰo'smā́m̐ aśnotu viśvátaḥ |
yéna rákṣasi dāśúṣaḥ || 8||












Sūkta 4.10 

ágne támadyā́śvaṃ ná stómaiḥ krátuṃ ná bʰadráṃ hṛdispṛ́śam |
ṛdʰyā́mā ta óhaiḥ || 1||











ádʰā hyàgne krátorbʰadrásya dákṣasya sādʰóḥ |
ratʰī́rṛtásya bṛható babʰū́tʰa || 2||











ebʰírno arkaírbʰávā no arvā́ṅsvàrṇá jyótiḥ |
ágne víśvebʰiḥ sumánā ánīkaiḥ || 3||











ābʰíṣṭe adyá gīrbʰírgṛṇántó'gne dā́śema |
prá te divó ná stanayanti śúṣmāḥ || 4||











táva svā́diṣṭʰā́gne sáṃdṛṣṭiridā́ cidáhna idā́ cidaktóḥ |
śriyé rukmó ná rocata upāké || 5||











gʰṛtáṃ ná pūtáṃ tanū́rarepā́ḥ śúci híraṇyam |
tátte rukmó ná rocata svadʰāvaḥ || 6||











kṛtáṃ ciddʰí ṣmā sánemi dvéṣó'gna inóṣi mártāt |
ittʰā́ yájamānādṛtāvaḥ || 7||











śivā́ naḥ sakʰyā́ sántu bʰrātrā́gne devéṣu yuṣmé |
sā́ no nā́bʰiḥ sádane sásminnū́dʰan || 8||












Sūkta 4.11 

bʰadráṃ te agne sahasinnánīkamupāká ā́ rocate sū́ryasya |
rúśaddṛśé dadṛśe naktayā́ cidárūkṣitaṃ dṛśá ā́ rūpé ánnam || 1||











ví ṣāhyagne gṛṇaté manīṣā́ṃ kʰáṃ vépasā tuvijāta stávānaḥ |
víśvebʰiryádvāvánaḥ śukra devaístánno rāsva sumaho bʰū́ri mánma || 2||











tvádagne kā́vyā tvánmanīṣā́stváduktʰā́ jāyante rā́dʰyāni |
tvádeti dráviṇaṃ vīrápeśā ittʰā́dʰiye dāśúṣe mártyāya || 3||











tvádvājī́ vājambʰaró víhāyā abʰiṣṭikṛ́jjāyate satyáśuṣmaḥ |
tvádrayírdevájūto mayobʰústvádāśúrjūjuvā́m̐ agne árvā || 4||











tvā́magne pratʰamáṃ devayánto deváṃ mártā amṛta mandrájihvam |
dveṣoyútamā́ vivāsanti dʰībʰírdámūnasaṃ gṛhápatimámūram || 5||











āré asmádámatimāré áṃha āré víśvāṃ durmatíṃ yánnipā́si |
doṣā́ śiváḥ sahasaḥ sūno agne yáṃ devá ā́ citsácase svastí || 6||












Sūkta 4.12 

yástvā́magna inádʰate yatásruktríste ánnaṃ kṛṇávatsásminnáhan |
sá sú dyumnaírabʰyàstu prasákṣattáva krátvā jātavedaścikitvā́n || 1||











idʰmáṃ yáste jabʰáracʰaśramāṇó mahó agne ánīkamā́ saparyán |
sá idʰānáḥ práti doṣā́muṣā́saṃ púṣyanrayíṃ sacate gʰnánnamítrān || 2||











agnírīśe bṛhatáḥ kṣatríyasyāgnírvā́jasya paramásya rāyáḥ |
dádʰāti rátnaṃ vidʰaté yáviṣṭʰo vyā̀nuṣáṅmártyāya svadʰā́vān || 3||











yácciddʰí te puruṣatrā́ yaviṣṭʰā́cittibʰiścakṛmā́ káccidā́gaḥ |
kṛdʰī́ ṣvàsmā́m̐ áditeránāgānvyénāṃsi śiśratʰo víṣvagagne || 4||











maháścidagna énaso abʰī́ka ūrvā́ddevā́nāmutá mártyānām |
mā́ te sákʰāyaḥ sádamídriṣāma yácʰā tokā́ya tánayāya śáṃ yóḥ || 5||











yátʰā ha tyádvasavo gauryàṃ citpadí ṣitā́mámuñcatā yajatrāḥ |
evó ṣvàsmánmuñcatā vyáṃhaḥ prá tāryagne prataráṃ na ā́yuḥ || 6||












Sūkta 4.13 

prátyagníruṣásāmágramakʰyadvibʰātīnā́ṃ sumánā ratnadʰéyam |
yātámaśvinā sukṛ́to duroṇámútsū́ryo jyótiṣā devá eti || 1||











ūrdʰváṃ bʰānúṃ savitā́ devó aśreddrapsáṃ dávidʰvadgaviṣó ná sátvā |
ánu vratáṃ váruṇo yanti mitró yátsū́ryaṃ divyā̀roháyanti || 2||











yáṃ sīmákṛṇvantámase vipṛ́ce dʰruvákṣemā ánavasyanto ártʰam |
táṃ sū́ryaṃ harítaḥ saptá yahvī́ spáśaṃ víśvasya jágato vahanti || 3||











váhiṣṭʰebʰirviháranyāsi tántumavavyáyannásitaṃ deva vásma |
dávidʰvato raśmáyaḥ sū́ryasya cármevā́vādʰustámo apsvàntáḥ || 4||











ánāyato ánibaddʰaḥ katʰā́yáṃ nyaṅṅuttānó'va padyate ná |
káyā yāti svadʰáyā kó dadarśa divá skambʰáḥ sámṛtaḥ pāti nā́kam || 5||












Sūkta 4.14 

prátyagníruṣáso jātávedā ákʰyaddevó rócamānā máhobʰiḥ |
ā́ nāsatyorugāyā́ rátʰenemáṃ yajñámúpa no yātamácʰa || 1||











ūrdʰváṃ ketúṃ savitā́ devó aśrejjyótirvíśvasmai bʰúvanāya kṛṇván |
ā́prā dyā́vāpṛtʰivī́ antárikṣaṃ ví sū́ryo raśmíbʰiścékitānaḥ || 2||











āváhantyaruṇī́rjyótiṣā́gānmahī́ citrā́ raśmíbʰiścékitānā |
prabodʰáyantī suvitā́ya devyùṣā́ īyate suyújā rátʰena || 3||











ā́ vāṃ váhiṣṭʰā ihá té vahantu rátʰā áśvāsa uṣáso vyùṣṭau |
imé hí vāṃ madʰupéyāya sómā asmínyajñé vṛṣaṇā mādayetʰām || 4||











ánāyato ánibaddʰaḥ katʰā́yáṃ nyaṅṅuttānó'va padyate ná |
káyā yāti svadʰáyā kó dadarśa divá skambʰáḥ sámṛtaḥ pāti nā́kam || 5||












Sūkta 4.15 

agnírhótā no adʰvaré vājī́ sánpári ṇīyate |
devó devéṣu yajñíyaḥ || 1||











pári triviṣṭyàdʰvaráṃ yā́tyagnī́ ratʰī́riva |
ā́ devéṣu práyo dádʰat || 2||











pári vā́japatiḥ kavíragnírhavyā́nyakramīt |
dádʰadrátnāni dāśúṣe || 3||











ayáṃ yáḥ sṛ́ñjaye puró daivavāté samidʰyáte |
dyumā́m̐ amitradámbʰanaḥ || 4||











ásya gʰā vīrá ī́vato'gnérīśīta mártyaḥ |
tigmájambʰasya mīḷhúṣaḥ || 5||











támárvantaṃ ná sānasímaruṣáṃ ná diváḥ śíśum |
marmṛjyánte divédive || 6||











bódʰadyánmā háribʰyāṃ kumāráḥ sāhadevyáḥ |
ácʰā ná hūtá údaram || 7||











utá tyā́ yajatā́ hárī kumārā́tsāhadevyā́t |
práyatā sadyá ā́ dade || 8||











eṣá vāṃ devāvaśvinā kumāráḥ sāhadevyáḥ |
dīrgʰā́yurastu sómakaḥ || 9||











táṃ yuváṃ devāvaśvinā kumāráṃ sāhadevyám |
dīrgʰā́yuṣaṃ kṛṇotana || 10||












Sūkta 4.16 

ā́ satyó yātu magʰávām̐ ṛjīṣī́ drávantvasya háraya úpa naḥ |
tásmā ídándʰaḥ suṣumā sudákṣamihā́bʰipitváṃ karate gṛṇānáḥ || 1||











áva sya śūrā́dʰvano nā́nte'smínno adyá sávane mandádʰyai |
śáṃsātyuktʰámuśáneva vedʰā́ścikitúṣe asuryā̀ya mánma || 2||











kavírná niṇyáṃ vidátʰāni sā́dʰanvṛ́ṣā yátsékaṃ vipipānó árcāt |
divá ittʰā́ jījanatsaptá kārū́náhnā ciccakrurvayúnā gṛṇántaḥ || 3||











svàryádvédi sudṛ́śīkamarkaírmáhi jyótī rurucuryáddʰa vástoḥ |
andʰā́ támāṃsi dúdʰitā vicákṣe nṛ́bʰyaścakāra nṛ́tamo abʰíṣṭau || 4||











vavakṣá índro ámitamṛjīṣyùbʰé ā́ paprau ródasī mahitvā́ |
átaścidasya mahimā́ ví recyabʰí yó víśvā bʰúvanā babʰū́va || 5||











víśvāni śakró náryāṇi vidvā́napó rireca sákʰibʰirníkāmaiḥ |
áśmānaṃ cidyé bibʰidúrvácobʰirvrajáṃ gómantamuśíjo ví vavruḥ || 6||











apó vṛtráṃ vavrivā́ṃsaṃ párāhanprā́vatte vájraṃ pṛtʰivī́ sácetāḥ |
prā́rṇāṃsi samudríyāṇyainoḥ pátirbʰávañcʰávasā śūra dʰṛṣṇo || 7||











apó yádádriṃ puruhūta dárdarāvírbʰuvatsarámā pūrvyáṃ te |
sá no netā́ vā́jamā́ darṣi bʰū́riṃ gotrā́ rujánnáṅgirobʰirgṛṇānáḥ || 8||











ácʰā kavíṃ nṛmaṇo gā abʰíṣṭau svàrṣātā magʰavannā́dʰamānam |
ūtíbʰistámiṣaṇo dyumnáhūtau ní māyā́vānábrahmā dásyurarta || 9||











ā́ dasyugʰnā́ mánasā yāhyástaṃ bʰúvatte kútsaḥ sakʰyé níkāmaḥ |
své yónau ní ṣadataṃ sárūpā ví vāṃ cikitsadṛtacíddʰa nā́rī || 10||











yā́si kútsena sarátʰamavasyústodó vā́tasya háryorī́śānaḥ |
ṛjrā́ vā́jaṃ ná gádʰyaṃ yúyūṣankavíryádáhanpā́ryāya bʰū́ṣāt || 11||











kútsāya śúṣṇamaśúṣaṃ ní barhīḥ prapitvé áhnaḥ kúyavaṃ sahásrā |
sadyó dásyūnprá mṛṇa kutsyéna prá sū́raścakráṃ vṛhatādabʰī́ke || 12||











tváṃ pípruṃ mṛ́gayaṃ śūśuvā́ṃsamṛjíśvane vaidatʰinā́ya randʰīḥ |
pañcāśátkṛṣṇā́ ní vapaḥ sahásrā́tkaṃ ná púro jarimā́ ví dardaḥ || 13||











sū́ra upāké tanvàṃ dadʰāno ví yátte cétyamṛ́tasya várpaḥ |
mṛgó ná hastī́ táviṣīmuṣāṇáḥ siṃhó ná bʰīmá ā́yudʰāni bíbʰrat || 14||











índraṃ kā́mā vasūyánto agmansvàrmīḷhe ná sávane cakānā́ḥ |
śravasyávaḥ śaśamānā́sa uktʰaíróko ná raṇvā́ sudṛ́śīva puṣṭíḥ || 15||











támídva índraṃ suhávaṃ huvema yástā́ cakā́ra náryā purū́ṇi |
yó mā́vate jaritré gádʰyaṃ cinmakṣū́ vā́jaṃ bʰárati spārhárādʰāḥ || 16||











tigmā́ yádantáraśániḥ pátāti kásmiñcicʰūra muhuké jánānām |
gʰorā́ yádarya sámṛtirbʰávātyádʰa smā nastanvò bodʰi gopā́ḥ || 17||











bʰúvo'vitā́ vāmádevasya dʰīnā́ṃ bʰúvaḥ sákʰāvṛkó vā́jasātau |
tvā́mánu prámatimā́ jaganmoruśáṃso jaritré viśvádʰa syāḥ || 18||











ebʰírnṛ́bʰirindra tvāyúbʰiṣṭvā magʰávadbʰirmagʰavanvíśva ājaú |
dyā́vo ná dyumnaírabʰí sánto aryáḥ kṣapó madema śarádaśca pūrvī́ḥ || 19||











evédíndrāya vṛṣabʰā́ya vṛ́ṣṇe bráhmākarma bʰṛ́gavo ná rátʰam |
nū́ cidyátʰā naḥ sakʰyā́ viyóṣadásanna ugrò'vitā́ tanūpā́ḥ || 20||











nū́ ṣṭutá indra nū́ gṛṇāná íṣaṃ jaritré nadyò ná pīpeḥ |
ákāri te harivo bráhma návyaṃ dʰiyā́ syāma ratʰyàḥ sadāsā́ḥ || 21||












Sūkta 4.17 

tváṃ mahā́m̐ indra túbʰyaṃ ha kṣā́ ánu kṣatráṃ maṃhánā manyata dyaúḥ |
tváṃ vṛtráṃ śávasā jagʰanvā́nsṛjáḥ síndʰūm̐ráhinā jagrasānā́n || 1||











táva tviṣó jánimanrejata dyaú réjadbʰū́mirbʰiyásā svásya manyóḥ |
ṛgʰāyánta subʰvàḥ párvatāsa ā́rdandʰánvāni saráyanta ā́paḥ || 2||











bʰinádgiríṃ śávasā vájramiṣṇánnāviṣkṛṇvānáḥ sahasāná ójaḥ |
vádʰīdvṛtráṃ vájreṇa mandasānáḥ sárannā́po jávasā hatávṛṣṇīḥ || 3||











suvī́raste janitā́ manyata dyaúríndrasya kartā́ svápastamo bʰūt |
yá īṃ jajā́na svaryàṃ suvájramánapacyutaṃ sádaso ná bʰū́ma || 4||











yá éka iccyāváyati prá bʰū́mā rā́jā kṛṣṭīnā́ṃ puruhūtá índraḥ |
satyámenamánu víśve madanti rātíṃ devásya gṛṇató magʰónaḥ || 5||











satrā́ sómā abʰavannasya víśve satrā́ mádāso bṛható mádiṣṭʰāḥ |
satrā́bʰavo vásupatirvásūnāṃ dátre víśvā adʰitʰā indra kṛṣṭī́ḥ || 6||











tvámádʰa pratʰamáṃ jā́yamānó'me víśvā adʰitʰā indra kṛṣṭī́ḥ |
tváṃ práti praváta āśáyānamáhiṃ vájreṇa magʰavanví vṛścaḥ || 7||











satrāháṇaṃ dā́dʰṛṣiṃ túmramíndraṃ mahā́mapāráṃ vṛṣabʰáṃ suvájram |
hántā yó vṛtráṃ sánitotá vā́jaṃ dā́tā magʰā́ni magʰávā surā́dʰāḥ || 8||











ayáṃ vṛ́taścātayate samīcī́ryá ājíṣu magʰávā śṛṇvá ékaḥ |
ayáṃ vā́jaṃ bʰarati yáṃ sanótyasyá priyā́saḥ sakʰyé syāma || 9||











ayáṃ śṛṇve ádʰa jáyannutá gʰnánnayámutá prá kṛṇute yudʰā́ gā́ḥ |
yadā́ satyáṃ kṛṇuté manyúmíndro víśvaṃ dṛḷháṃ bʰayata éjadasmāt || 10||











sámíndro gā́ ajayatsáṃ híraṇyā sámaśviyā́ magʰávā yó ha pūrvī́ḥ |
ebʰírnṛ́bʰirnṛ́tamo asya śākaí rāyó vibʰaktā́ sambʰaráśca vásvaḥ || 11||











kíyatsvidíndro ádʰyeti mātúḥ kíyatpitúrjanitúryó jajā́na |
yó asya śúṣmaṃ muhukaíríyarti vā́to ná jūtá stanáyadbʰirabʰraíḥ || 12||











kṣiyántaṃ tvamákṣiyantaṃ kṛṇotī́yarti reṇúṃ magʰávā samóham |
vibʰañjanúraśánimām̐ iva dyaúrutá stotā́raṃ magʰávā vásau dʰāt || 13||











ayáṃ cakrámiṣaṇatsū́ryasya nyétaśaṃ rīramatsasṛmāṇám |
ā́ kṛṣṇá īṃ juhurāṇó jigʰarti tvacó budʰné rájaso asyá yónau || 14||











ásiknyāṃ yájamāno ná hótā || 15||











gavyánta índraṃ sakʰyā́ya víprā aśvāyánto vṛ́ṣaṇaṃ vājáyantaḥ |
janīyánto janidā́mákṣitotimā́ cyāvayāmo'vaté ná kóśam || 16||











trātā́ no bodʰi dádṛśāna āpírabʰikʰyātā́ marḍitā́ somyā́nām |
sákʰā pitā́ pitṛ́tamaḥ pitṝṇā́ṃ kártemu lokámuśaté vayodʰā́ḥ || 17||











sakʰīyatā́mavitā́ bodʰi sákʰā gṛṇāná indra stuvaté váyo dʰāḥ |
vayáṃ hyā́ te cakṛmā́ sabā́dʰa ābʰíḥ śámībʰirmaháyanta indra || 18||











stutá índro magʰávā yáddʰa vṛtrā́ bʰū́rīṇyéko apratī́ni hanti |
asyá priyó jaritā́ yásya śármannákirdevā́ vāráyante ná mártāḥ || 19||











evā́ na índro magʰávā virapśī́ káratsatyā́ carṣaṇīdʰṛ́danarvā́ |
tváṃ rā́jā janúṣāṃ dʰehyasmé ádʰi śrávo mā́hinaṃ yájjaritré || 20||











nū́ ṣṭutá indra nū́ gṛṇāná íṣaṃ jaritré nadyò ná pīpeḥ |
ákāri te harivo bráhma návyaṃ dʰiyā́ syāma ratʰyàḥ sadāsā́ḥ || 21||












Sūkta 4.18 

ayáṃ pántʰā ánuvittaḥ purāṇó yáto devā́ udájāyanta víśve |
átaścidā́ janiṣīṣṭa právṛddʰo mā́ mātáramamuyā́ páttave kaḥ || 1||











nā́hámáto nírayā durgáhaitáttiraścátā pārśvā́nnírgamāṇi |
bahū́ni me ákṛtā kártvāni yúdʰyai tvena sáṃ tvena pṛcʰai || 2||











parāyatī́ṃ mātáramánvacaṣṭa ná nā́nu gānyánu nū́ gamāni |
tváṣṭurgṛhé apibatsómamíndraḥ śatadʰanyàṃ camvòḥ sutásya || 3||











kíṃ sá ṛ́dʰakkṛṇavadyáṃ sahásraṃ māsó jabʰā́ra śarádaśca pūrvī́ḥ |
nahī́ nvasya pratimā́namástyantárjātéṣūtá yé jánitvāḥ || 4||











avadyámiva mányamānā gúhākaríndraṃ mātā́ vīryèṇā nyṛ̀ṣṭam |
átʰódastʰātsvayámátkaṃ vásāna ā́ ródasī apṛṇājjā́yamānaḥ || 5||











etā́ arṣantyalalābʰávantīrṛtā́varīriva saṃkróśamānāḥ |
etā́ ví pṛcʰa kímidáṃ bʰananti kámā́po ádriṃ paridʰíṃ rujanti || 6||











kímu ṣvidasmai nivído bʰananténdrasyāvadyáṃ didʰiṣanta ā́paḥ |
mámaitā́nputró mahatā́ vadʰéna vṛtráṃ jagʰanvā́m̐ asṛjadví síndʰūn || 7||











mámaccaná tvā yuvatíḥ parā́sa mámaccaná tvā kuṣávā jagā́ra |
mámaccidā́paḥ śíśave mamṛḍyurmámaccidíndraḥ sáhasódatiṣṭʰat || 8||











mámaccaná te magʰavanvyàṃso nivividʰvā́m̐ ápa hánū jagʰā́na |
ádʰā níviddʰa úttaro babʰūvā́ñcʰíro dāsásya sáṃ piṇagvadʰéna || 9||











gṛṣṭíḥ sasūva stʰáviraṃ tavāgā́manādʰṛṣyáṃ vṛṣabʰáṃ túmramíndram |
árīḷhaṃ vatsáṃ carátʰāya mātā́ svayáṃ gātúṃ tanvà icʰámānam || 10||











utá mātā́ mahiṣámánvavenadamī́ tvā jahati putra devā́ḥ |
átʰābravīdvṛtrámíndro haniṣyánsákʰe viṣṇo vitaráṃ ví kramasva || 11||











káste mātáraṃ vidʰávāmacakracʰayúṃ kástvā́majigʰāṃsaccárantam |
káste devó ádʰi mārḍīká āsīdyátprā́kṣiṇāḥ pitáraṃ pādagṛ́hya || 12||











ávartyā śúna āntrā́ṇi pece ná devéṣu vivide marḍitā́ram |
ápaśyaṃ jāyā́mámahīyamānāmádʰā me śyenó mádʰvā́ jabʰāra || 13||












Sūkta 4.19 

evā́ tvā́mindra vajrinnátra víśve devā́saḥ suhávāsa ū́māḥ |
mahā́mubʰé ródasī vṛddʰámṛṣváṃ nírékamídvṛṇate vṛtrahátye || 1||











ávāsṛjanta jívrayo ná devā́ bʰúvaḥ samrā́ḷindra satyáyoniḥ |
áhannáhiṃ pariśáyānamárṇaḥ prá vartanī́rarado viśvádʰenāḥ || 2||











átṛpṇuvantaṃ víyatamabudʰyámábudʰyamānaṃ suṣupāṇámindra |
saptá práti praváta āśáyānamáhiṃ vájreṇa ví riṇā aparván || 3||











ákṣodayacʰávasā kṣā́ma budʰnáṃ vā́rṇá vā́tastáviṣībʰiríndraḥ |
dṛḷhā́nyaubʰnāduśámāna ójó'vābʰinatkakúbʰaḥ párvatānām || 4||











abʰí prá dadrurjánayo ná gárbʰaṃ rátʰā iva prá yayuḥ sākámádrayaḥ |
átarpayo visṛ́ta ubjá ūrmī́ntváṃ vṛtā́m̐ ariṇā indra síndʰūn || 5||











tváṃ mahī́mavániṃ viśvádʰenāṃ turvī́taye vayyā̀ya kṣárantīm |
áramayo námasaíjadárṇaḥ sutaraṇā́m̐ akṛṇorindra síndʰūn || 6||











prā́grúvo nabʰanvò ná vákvā dʰvasrā́ apinvadyuvatī́rṛtajñā́ḥ |
dʰánvānyájrām̐ apṛṇaktṛṣāṇā́m̐ ádʰogíndra staryò dáṃsupatnīḥ || 7||











pūrvī́ruṣásaḥ śarádaśca gūrtā́ vṛtráṃ jagʰanvā́m̐ asṛjadví síndʰūn |
páriṣṭʰitā atṛṇadbadbadʰānā́ḥ sīrā́ índraḥ srávitave pṛtʰivyā́ || 8||











vamrī́bʰiḥ putrámagrúvo adānáṃ nivéśanāddʰariva ā́ jabʰartʰa |
vyàndʰó akʰyadáhimādadānó nírbʰūdukʰacʰítsámaranta párva || 9||











prá te pū́rvāṇi káraṇāni viprāvidvā́m̐ āha vidúṣe kárāṃsi |
yátʰāyatʰā vṛ́ṣṇyāni svágūrtā́pāṃsi rājannáryā́viveṣīḥ || 10||











nū́ ṣṭutá indra nū́ gṛṇāná íṣaṃ jaritré nadyò ná pīpeḥ |
ákāri te harivo bráhma návyaṃ dʰiyā́ syāma ratʰyàḥ sadāsā́ḥ || 11||












Sūkta 4.20 

ā́ na índro dūrā́dā́ na āsā́dabʰiṣṭikṛ́dávase yāsadugráḥ |
ójiṣṭʰebʰirnṛpátirvájrabāhuḥ saṃgé samátsu turváṇiḥ pṛtanyū́n || 1||











ā́ na índro háribʰiryātvácʰārvācīnó'vase rā́dʰase ca |
tíṣṭʰāti vajrī́ magʰávā virapśī́máṃ yajñámánu no vā́jasātau || 2||











imáṃ yajñáṃ tvámasmā́kamindra puró dádʰatsaniṣyasi krátuṃ naḥ |
śvagʰnī́va vajrinsanáye dʰánānāṃ tváyā vayámaryá ājíṃ jayema || 3||











uśánnu ṣú ṇaḥ sumánā upāké sómasya nú súṣutasya svadʰāvaḥ |
pā́ indra prátibʰṛtasya mádʰvaḥ sámándʰasā mamadaḥ pṛṣṭʰyèna || 4||











ví yó rarapśá ṛ́ṣibʰirnávebʰirvṛkṣó ná pakváḥ sṛ́ṇyo ná jétā |
máryo ná yóṣāmabʰí mányamānó'cʰā vivakmi puruhūtámíndram || 5||











girírná yáḥ svátavām̐ ṛṣvá índraḥ sanā́devá sáhase jātá ugráḥ |
ā́dartā vájraṃ stʰáviraṃ ná bʰīmá udnéva kóśaṃ vásunā nyṛ̀ṣṭam || 6||











ná yásya vartā́ janúṣā nvásti ná rā́dʰasa āmarītā́ magʰásya |
udvāvṛṣāṇástaviṣīva ugrāsmábʰyaṃ daddʰi puruhūta rāyáḥ || 7||











ī́kṣe rāyáḥ kṣáyasya carṣaṇīnā́mutá vrajámapavartā́si gónām |
śikṣānaráḥ samitʰéṣu prahā́vānvásvo rāśímabʰinetā́si bʰū́rim || 8||











káyā tácʰṛṇve śácyā śáciṣṭʰo yáyā kṛṇóti múhu kā́ cidṛṣváḥ |
purú dāśúṣe vícayiṣṭʰo áṃhó'tʰā dadʰāti dráviṇaṃ jaritré || 9||











mā́ no mardʰīrā́ bʰarā daddʰí tánnaḥ prá dāśúṣe dā́tave bʰū́ri yátte |
návye deṣṇé śasté asmínta uktʰé prá bravāma vayámindra stuvántaḥ || 10||











nū́ ṣṭutá indra nū́ gṛṇāná íṣaṃ jaritré nadyò ná pīpeḥ |
ákāri te harivo bráhma návyaṃ dʰiyā́ syāma ratʰyàḥ sadāsā́ḥ || 11||












Sūkta 4.21 

ā́ yātvíndró'vasa úpa na ihá stutáḥ sadʰamā́dastu śū́raḥ |
vāvṛdʰānástáviṣīryásya pūrvī́rdyaúrná kṣatrámabʰíbʰūti púṣyāt || 1||











tásyédihá stavatʰa vṛ́ṣṇyāni tuvidyumnásya tuvirā́dʰaso nṝ́n |
yásya kráturvidatʰyò ná samrā́ṭ sāhvā́ntárutro abʰyásti kṛṣṭī́ḥ || 2||











ā́ yātvíndro divá ā́ pṛtʰivyā́ makṣū́ samudrā́dutá vā púrīṣāt |
svàrṇarādávase no marútvānparāváto vā sádanādṛtásya || 3||











stʰūrásya rāyó bṛható yá ī́śe támu ṣṭavāma vidátʰeṣvíndram |
yó vāyúnā jáyati gómatīṣu prá dʰṛṣṇuyā́ náyati vásyo ácʰa || 4||











úpa yó námo námasi stabʰāyánníyarti vā́caṃ janáyanyájadʰyai |
ṛñjasānáḥ puruvā́ra uktʰaíréndraṃ kṛṇvīta sádaneṣu hótā || 5||











dʰiṣā́ yádi dʰiṣaṇyántaḥ saraṇyā́nsádanto ádrimauśijásya góhe |
ā́ duróṣāḥ pāstyásya hótā yó no mahā́nsaṃváraṇeṣu váhniḥ || 6||











satrā́ yádīṃ bʰārvarásya vṛ́ṣṇaḥ síṣakti śúṣma stuvaté bʰárāya |
gúhā yádīmauśijásya góhe prá yáddʰiyé prā́yase mádāya || 7||











ví yádvárāṃsi párvatasya vṛṇvé páyobʰirjinvé apā́ṃ jávāṃsi |
vidádgaurásya gavayásya góhe yádī vā́jāya sudʰyò váhanti || 8||











bʰadrā́ te hástā súkṛtotá pāṇī́ prayantā́rā stuvaté rā́dʰa indra |
kā́ te níṣattiḥ kímu nó mamatsi kíṃ nódudu harṣase dā́tavā́ u || 9||











evā́ vásva índraḥ satyáḥ samrā́ḍḍʰántā vṛtráṃ várivaḥ pūráve kaḥ |
púruṣṭuta krátvā naḥ śagdʰi rāyó bʰakṣīyá té'vaso daívyasya || 10||











nū́ ṣṭutá indra nū́ gṛṇāná íṣaṃ jaritré nadyò ná pīpeḥ |
ákāri te harivo bráhma návyaṃ dʰiyā́ syāma ratʰyàḥ sadāsā́ḥ || 11||












Sūkta 4.22 

yánna índro jujuṣé yácca váṣṭi tánno mahā́nkarati śuṣmyā́ cit |
bráhma stómaṃ magʰávā sómamuktʰā́ yó áśmānaṃ śávasā bíbʰradéti || 1||











vṛ́ṣā vṛ́ṣandʰiṃ cáturaśrimásyannugró bāhúbʰyāṃ nṛ́tamaḥ śácīvān |
śriyé páruṣṇīmuṣámāṇa ū́rṇāṃ yásyāḥ párvāṇi sakʰyā́ya vivyé || 2||











yó devó devátamo jā́yamāno mahó vā́jebʰirmahádbʰiśca śúṣmaiḥ |
dádʰāno vájraṃ bāhvóruśántaṃ dyā́mámena rejayatprá bʰū́ma || 3||











víśvā ródʰāṃsi pravátaśca pūrvī́rdyaúrṛṣvā́jjánimanrejata kṣā́ḥ |
ā́ mātárā bʰárati śuṣmyā́ górnṛvátpárijmannonuvanta vā́tāḥ || 4||











tā́ tū́ ta indra maható mahā́ni víśveṣvítsávaneṣu pravā́cyā |
yácʰūra dʰṛṣṇo dʰṛṣatā́ dadʰṛṣvā́náhiṃ vájreṇa śávasā́viveṣīḥ || 5||











tā́ tū́ te satyā́ tuvinṛmṇa víśvā prá dʰenávaḥ sisrate vṛ́ṣṇa ū́dʰnaḥ |
ádʰā ha tvádvṛṣamaṇo bʰiyānā́ḥ prá síndʰavo jávasā cakramanta || 6||











átrā́ha te harivastā́ u devī́rávobʰirindra stavanta svásāraḥ |
yátsīmánu prá mucó badbadʰānā́ dīrgʰā́mánu prásitiṃ syandayádʰyai || 7||











pipīḷé aṃśúrmádyo ná síndʰurā́ tvā śámī śaśamānásya śaktíḥ |
asmadryàkcʰuśucānásya yamyā āśúrná raśmíṃ tuvyójasaṃ góḥ || 8||











asmé várṣiṣṭʰā kṛṇuhi jyéṣṭʰā nṛmṇā́ni satrā́ sahure sáhāṃsi |
asmábʰyaṃ vṛtrā́ suhánāni randʰi jahí vádʰarvanúṣo mártyasya || 9||











asmā́kamítsú śṛṇuhi tvámindrāsmábʰyaṃ citrā́m̐ úpa māhi vā́jān |
asmábʰyaṃ víśvā iṣaṇaḥ púraṃdʰīrasmā́kaṃ sú magʰavanbodʰi godā́ḥ || 10||











nū́ ṣṭutá indra nū́ gṛṇāná íṣaṃ jaritré nadyò ná pīpeḥ |
ákāri te harivo bráhma návyaṃ dʰiyā́ syāma ratʰyàḥ sadāsā́ḥ || 11||












Sūkta 4.23 

katʰā́ mahā́mavṛdʰatkásya hóturyajñáṃ juṣāṇó abʰí sómamū́dʰaḥ |
píbannuśānó juṣámāṇo ándʰo vavakṣá ṛṣváḥ śucaté dʰánāya || 1||











kó asya vīráḥ sadʰamā́damāpa sámānaṃśa sumatíbʰiḥ kó asya |
kádasya citráṃ cikite kádūtī́ vṛdʰé bʰuvacʰaśamānásya yájyoḥ || 2||











katʰā́ śṛṇoti hūyámānamíndraḥ katʰā́ śṛṇvánnávasāmasya veda |
kā́ asya pūrvī́rúpamātayo ha katʰaínamāhuḥ pápuriṃ jaritré || 3||











katʰā́ sabā́dʰaḥ śaśamānó asya náśadabʰí dráviṇaṃ dī́dʰyānaḥ |
devó bʰuvannávedā ma ṛtā́nāṃ námo jagṛbʰvā́m̐ abʰí yájjújoṣat || 4||











katʰā́ kádasyā́ uṣáso vyùṣṭau devó mártasya sakʰyáṃ jujoṣa |
katʰā́ kádasya sakʰyáṃ sákʰibʰyo yé asminkā́maṃ suyújaṃ tatasré || 5||











kímā́dámatraṃ sakʰyáṃ sákʰibʰyaḥ kadā́ nú te bʰrātráṃ prá bravāma |
śriyé sudṛ́śo vápurasya sárgāḥ svàrṇá citrátamamiṣa ā́ góḥ || 6||











drúhaṃ jígʰāṃsandʰvarásamanindrā́ṃ tétikte tigmā́ tujáse ánīkā |
ṛṇā́ cidyátra ṛṇayā́ na ugró dūré ájñātā uṣáso babādʰé || 7||











ṛtásya hí śurúdʰaḥ sánti pūrvī́rṛtásya dʰītírvṛjinā́ni hanti |
ṛtásya ślóko badʰirā́ tatarda kárṇā budʰānáḥ śucámāna āyóḥ || 8||











ṛtásya dṛḷhā́ dʰarúṇāni santi purū́ṇi candrā́ vápuṣe vápūṃṣi |
ṛténa dīrgʰámiṣaṇanta pṛ́kṣa ṛténa gā́va ṛtámā́ viveśuḥ || 9||











ṛtáṃ yemāná ṛtámídvanotyṛtásya śúṣmasturayā́ u gavyúḥ |
ṛtā́ya pṛtʰvī́ bahulé gabʰīré ṛtā́ya dʰenū́ paramé duhāte || 10||











nū́ ṣṭutá indra nū́ gṛṇāná íṣaṃ jaritré nadyò ná pīpeḥ |
ákāri te harivo bráhma návyaṃ dʰiyā́ syāma ratʰyàḥ sadāsā́ḥ || 11||












Sūkta 4.24 

kā́ suṣṭutíḥ śávasaḥ sūnúmíndramarvācīnáṃ rā́dʰasa ā́ vavartat |
dadírhí vīró gṛṇaté vásūni sá gópatirniṣṣídʰāṃ no janāsaḥ || 1||











sá vṛtrahátye hávyaḥ sá ī́ḍyaḥ sá súṣṭuta índraḥ satyárādʰāḥ |
sá yā́mannā́ magʰávā mártyāya brahmaṇyaté súṣvaye várivo dʰāt || 2||











támínnáro ví hvayante samīké ririkvā́ṃsastanvàḥ kṛṇvata trā́m |
mitʰó yáttyāgámubʰáyāso ágmannárastokásya tánayasya sātaú || 3||











kratūyánti kṣitáyo yóga ugrāśuṣāṇā́so mitʰó árṇasātau |
sáṃ yádvíśó'vavṛtranta yudʰmā́ ā́dínnéma indrayante abʰī́ke || 4||











ā́díddʰa néma indriyáṃ yajanta ā́dítpaktíḥ puroḷā́śaṃ riricyāt |
ā́dítsómo ví papṛcyādásuṣvīnā́díjjujoṣa vṛṣabʰáṃ yájadʰyai || 5||











kṛṇótyasmai várivo yá ittʰéndrāya sómamuśaté sunóti |
sadʰrīcī́nena mánasā́vivenantámítsákʰāyaṃ kṛṇute samátsu || 6||











yá índrāya sunávatsómamadyá pácātpaktī́rutá bʰṛjjā́ti dʰānā́ḥ |
práti manāyórucátʰāni háryantásmindadʰadvṛ́ṣaṇaṃ śúṣmamíndraḥ || 7||











yadā́ samaryáṃ vyácedṛ́gʰāvā dīrgʰáṃ yádājímabʰyákʰyadaryáḥ |
ácikradadvṛ́ṣaṇaṃ pátnyácʰā duroṇá ā́ níśitaṃ somasúdbʰiḥ || 8||











bʰū́yasā vasnámacaratkánīyó'vikrīto akāniṣaṃ púnaryán |
sá bʰū́yasā kánīyo nā́rirecīddīnā́ dákṣā ví duhanti prá vāṇám || 9||











ká imáṃ daśábʰirmáméndraṃ krīṇāti dʰenúbʰiḥ |
yadā́ vṛtrā́ṇi jáṅgʰanadátʰainaṃ me púnardadat || 10||











nū́ ṣṭutá indra nū́ gṛṇāná íṣaṃ jaritré nadyò ná pīpeḥ |
ákāri te harivo bráhma návyaṃ dʰiyā́ syāma ratʰyàḥ sadāsā́ḥ || 11||












Sūkta 4.25 

kó adyá náryo devákāma uśánníndrasya sakʰyáṃ jujoṣa |
kó vā mahé'vase pā́ryāya sámiddʰe agnaú sutásoma īṭṭe || 1||











kó nānāma vácasā somyā́ya manāyúrvā bʰavati vásta usrā́ḥ |
ká índrasya yújyaṃ káḥ sakʰitváṃ kó bʰrātráṃ vaṣṭi kaváye ká ūtī́ || 2||











kó devā́nāmávo adyā́ vṛṇīte ká ādityā́m̐ áditiṃ jyótirīṭṭe |
kásyāśvínāvíndro agníḥ sutásyāṃśóḥ pibanti mánasā́vivenam || 3||











tásmā agnírbʰā́rataḥ śárma yaṃsajjyókpaśyātsū́ryamuccárantam |
yá índrāya sunávāmétyā́ha náre náryāya nṛ́tamāya nṛṇā́m || 4||











ná táṃ jinanti bahávo ná dabʰrā́ urvàsmā áditiḥ śárma yaṃsat |
priyáḥ sukṛ́tpriyá índre manāyúḥ priyáḥ suprāvī́ḥ priyó asya somī́ || 5||











suprāvyàḥ prāśuṣā́ḷeṣá vīráḥ súṣveḥ paktíṃ kṛṇute kévaléndraḥ |
nā́suṣverāpírná sákʰā ná jāmírduṣprāvyò'vahantédávācaḥ || 6||











ná revátā paṇínā sakʰyámíndró'sunvatā sutapā́ḥ sáṃ gṛṇīte |
ā́sya védaḥ kʰidáti hánti nagnáṃ ví súṣvaye paktáye kévalo bʰūt || 7||











índraṃ páré'vare madʰyamā́sa índraṃ yā́ntó'vasitāsa índram |
índraṃ kṣiyánta utá yúdʰyamānā índraṃ náro vājayánto havante || 8||












Sūkta 4.26 

aháṃ mánurabʰavaṃ sū́ryaścāháṃ kakṣī́vām̐ ṛ́ṣirasmi vípraḥ |
aháṃ kútsamārjuneyáṃ nyṛñje'háṃ kavíruśánā páśyatā mā || 1||











aháṃ bʰū́mimadadāmā́ryāyāháṃ vṛṣṭíṃ dāśúṣe mártyāya |
ahámapó anayaṃ vāvaśānā́ máma devā́so ánu kétamāyan || 2||











aháṃ púro mandasānó vyairaṃ náva sākáṃ navatī́ḥ śámbarasya |
śatatamáṃ veśyàṃ sarvátātā dívodāsamatitʰigváṃ yádā́vam || 3||











prá sú ṣá víbʰyo maruto vírastu prá śyenáḥ śyenébʰya āśupátvā |
acakráyā yátsvadʰáyā suparṇó havyáṃ bʰáranmánave devájuṣṭam || 4||











bʰáradyádi víráto vévijānaḥ patʰórúṇā mánojavā asarji |
tū́yaṃ yayau mádʰunā somyénotá śrávo vivide śyenó átra || 5||











ṛjīpī́ śyenó dádamāno aṃśúṃ parāvátaḥ śakunó mandráṃ mádam |
sómaṃ bʰaraddādṛhāṇó devā́vāndivó amúṣmādúttarādādā́ya || 6||











ādā́ya śyenó abʰaratsómaṃ sahásraṃ savā́m̐ ayútaṃ ca sākám |
átrā púraṃdʰirajahādárātīrmáde sómasya mūrā́ ámūraḥ || 7||












Sūkta 4.27 

gárbʰe nú sánnánveṣāmavedamaháṃ devā́nāṃ jánimāni víśvā |
śatáṃ mā púra ā́yasīrarakṣannádʰa śyenó javásā níradīyam || 1||











ná gʰā sá mā́mápa jóṣaṃ jabʰārābʰī́māsa tvákṣasā vīryèṇa |
īrmā́ púraṃdʰirajahādárātīrutá vā́tām̐ ataracʰū́śuvānaḥ || 2||











áva yácʰyenó ásvanīdádʰa dyórví yádyádi vā́ta ūhúḥ púraṃdʰim |
sṛjádyádasmā áva ha kṣipájjyā́ṃ kṛśā́nurástā mánasā bʰuraṇyán || 3||











ṛjipyá īmíndrāvato ná bʰujyúṃ śyenó jabʰāra bṛható ádʰi ṣṇóḥ |
antáḥ patatpatatryàsya parṇámádʰa yā́mani prásitasya tádvéḥ || 4||











ádʰa śvetáṃ kaláśaṃ góbʰiraktámāpipyānáṃ magʰávā śukrámándʰaḥ |
adʰvaryúbʰiḥ práyataṃ mádʰvo ágramíndro mádāya práti dʰatpíbadʰyai śū́ro mádāya práti dʰatpíbadʰyai || 5||












Sūkta 4.28 

tvā́ yujā́ táva tátsoma sakʰyá índro apó mánave sasrútaskaḥ |
áhannáhimáriṇātsaptá síndʰūnápāvṛṇodápihiteva kʰā́ni || 1||



1.  tvamr2msi yujnmsi«√yuj tvamr2msg tadc somaNmsv«√su sakʰyannsl«√sac  
    indraNmsn«√ind apnfpa manunmsd«√man sasrutjfpa«sa~√sru karvp·Ae3s«√kṛ |
    ahanvp·Aa3s«√han ahinmsa«√aṃh ariṇātvp·Aa3s«√rī saptau sindʰunmpa«√sindʰ  
    apap avṛṇotvp·Aa3s«√vṛ apihitajnpa«api~√dʰā ivac kʰannpa 



1.  Would Indra, joined with you, [and] in that case in-tune with you, O Soma,
    make this for an intelligent man: the waters streaming!
    He killed the snake, released seven rivers,
    he uncovered as-if-obstructed apertures.



tvā́ yujā́ ní kʰidatsū́ryasyéndraścakráṃ sáhasā sadyá indo |
ádʰi ṣṇúnā bṛhatā́ vártamānaṃ mahó druhó ápa viśvā́yu dʰāyi || 2||



2.  tvamr2msi yujnmsi«√yuj nip kʰidatvp·Ae3s«√kʰid sūryanmsg«√sūr  
    indraNmsn«√ind cakrannsa«√car sahasāa«√sah sadyasa indunmsv«√ind |
    adʰip sṇunnsi bṛhatjnsi«√bṛh vartamānajmsa«√vṛt  
    mahjmsb«√mah druhnmsb«√druh apap (viśvanns«√viś-āyunns«√i)nnsn adʰāyivp·U·3s«√dʰā 



2.  With you [and] with [your] companion would he, Indra,
    at that very moment forcefully press down sun's wheel, O Indu,
    [that is] rolling through a vast plato!
    The all-pervading lifeforce was moved away from the mighty foe!



áhanníndro ádahadagnírindo purā́ dásyūnmadʰyáṃdinādabʰī́ke |
durgé duroṇé krátvā ná yātā́ṃ purū́ sahásrā śárvā ní barhīt || 3||



3.  ahanvp·Aa3s«√han indraNmsn«√ind adahatvp·Aa3s«√dah agninmsn«√aṅg indunmsv«√ind  
    purāa«√pṝ (dasnfs«√das-yujms«√yu)nmpa (madʰyamnms-dinanms)nmsb abʰīkannsl«abʰi~√i |
    durganmsl«dus~√gam duroṇanmsl«√dṝ kratunmsi«√kṛ nac yātjmpg«√yāt  
    purua«√pṝ sahasrajnpa«√hasr śarunfsi«√śrī nip barhītvp·UE3s«√bṛh 



3.  In an encounter before the noon Indra did strike,
    Agni did scorch, O Indu, the impulses to suffer want.
    May he, using a missile, overthrow many a thousand of [them]
    as if willingly moving into difficult to access residence.



víśvasmātsīmadʰamā́m̐ indra dásyūnvíśo dā́sīrakṛṇorapraśastā́ḥ |
ábādʰetʰāmámṛṇataṃ ní śátrūnávindetʰāmápacitiṃ vádʰatraiḥ || 4||



4.  viśvanmsb«√viś sīma adʰamajmpa indraNmsv«√ind (dasnfs«√das-yujms«√yu)nmpa  
    viśnfpa«√viś dāsījfpa«√das akṛṇorvp·Aa2s«√kṛ apraśastajfpa«a-pra~√śaṃs |
    abādʰetʰāmva·Aa2d«√bādʰ amṛṇatamvp·Aa2d«√mṛṇ nip śatrunmpa«√śad  
    avindetʰāmva·Aa2d«√vid apacitinfsa«apa~√ci vadʰatrannpi«√vadʰ 



4.  O Indra, [you made] impulses to suffer want [to be] lower than all; 
    you made blamable the demonic troops;
    you two opposed and crushed the enemies, 
    you two partook of reverence using deadly weapons.



evā́ satyáṃ magʰavānā yuváṃ tádíndraśca somorvámáśvyaṃ góḥ |
ā́dardṛtamápihitānyáśnā riricátʰuḥ kṣā́ścittatṛdānā́ || 5||



5.  evac satyama«√as magʰavanjmdv«√maṃh tvamr2mdn  
    tadr3nsa indraNmsn«√ind cac somaNmsv«√su ūrvajmsa«√vṛ aśvyajmsa«√aś gonfsg |
    āp adardṛtamvp·Aa2d«√dṛ apihitajnpa«api~√dʰā aśannmsi«√aś2  
    riricatʰusvp·I·2d«√ric kṣānfsn cidc tatṛdānāta·Ifsn«√tṛd 



5.  Indeed, it's true --- you two, O munificent, [thou] and Indra, O Soma, 
    attended to this wide, coming from horses [space] of a cow,
    you set free obstructed by the firmament [apertures¹];
    the earth as well is becoming open.


1 kʰā́ni on the basis of 4.28.1d


Sūkta 4.29 

ā́ na stutá úpa vā́jebʰirūtī́ índra yāhí háribʰirmandasānáḥ |
tiráścidaryáḥ sávanā purū́ṇyāṅgūṣébʰirgṛṇānáḥ satyárādʰāḥ || 1||











ā́ hí ṣmā yā́ti náryaścikitvā́nhūyámānaḥ sotṛ́bʰirúpa yajñám |
sváśvo yó ábʰīrurmányamānaḥ suṣvāṇébʰirmádati sáṃ ha vīraíḥ || 2||











śrāváyédasya kárṇā vājayádʰyai júṣṭāmánu prá díśaṃ mandayádʰyai |
udvāvṛṣāṇó rā́dʰase túviṣmānkáranna índraḥ sutīrtʰā́bʰayaṃ ca || 3||











ácʰā yó gántā nā́dʰamānamūtī́ ittʰā́ vípraṃ hávamānaṃ gṛṇántam |
úpa tmáni dádʰāno dʰuryā̀śū́nsahásrāṇi śatā́ni vájrabāhuḥ || 4||











tvótāso magʰavannindra víprā vayáṃ te syāma sūráyo gṛṇántaḥ |
bʰejānā́so bṛháddivasya rāyá ākāyyàsya dāváne purukṣóḥ || 5||












Sūkta 4.30 

nákirindra tvádúttaro ná jyā́yām̐ asti vṛtrahan |
nákirevā́ yátʰā tvám || 1||











satrā́ te ánu kṛṣṭáyo víśvā cakréva vāvṛtuḥ |
satrā́ mahā́m̐ asi śrutáḥ || 2||











víśve canédanā́ tvā devā́sa indra yuyudʰuḥ |
yádáhā náktamā́tiraḥ || 3||











yátrotá bādʰitébʰyaścakráṃ kútsāya yúdʰyate |
muṣāyá indra sū́ryam || 4||











yátra devā́m̐ ṛgʰāyató víśvām̐ áyudʰya éka ít |
tvámindra vanū́m̐ráhan || 5||











yátrotá mártyāya kámáriṇā indra sū́ryam |
prā́vaḥ śácībʰirétaśam || 6||











kímā́dutā́si vṛtrahanmágʰavanmanyumáttamaḥ |
átrā́ha dā́numā́tiraḥ || 7||











etádgʰédutá vīryàmíndra cakártʰa paúṃsyam |
stríyaṃ yáddurhaṇāyúvaṃ vádʰīrduhitáraṃ diváḥ || 8||











diváścidgʰā duhitáraṃ mahā́nmahīyámānām |
uṣā́samindra sáṃ piṇak || 9||











ápoṣā́ ánasaḥ saratsámpiṣṭādáha bibʰyúṣī |
ní yátsīṃ śiśnátʰadvṛ́ṣā || 10||











etádasyā ánaḥ śaye súsampiṣṭaṃ vípāśyā́ |
sasā́ra sīṃ parāvátaḥ || 11||











utá síndʰuṃ vibālyàṃ vitastʰānā́mádʰi kṣámi |
pári ṣṭʰā indra māyáyā || 12||











utá śúṣṇasya dʰṛṣṇuyā́ prá mṛkṣo abʰí védanam |
púro yádasya sampiṇák || 13||











utá dāsáṃ kaulitaráṃ bṛhatáḥ párvatādádʰi |
ávāhannindra śámbaram || 14||











utá dāsásya varcínaḥ sahásrāṇi śatā́vadʰīḥ |
ádʰi páñca pradʰī́m̐riva || 15||











utá tyáṃ putrámagrúvaḥ párāvṛktaṃ śatákratuḥ |
uktʰéṣvíndra ā́bʰajat || 16||











utá tyā́ turváśāyádū asnātā́rā śácīpátiḥ |
índro vidvā́m̐ apārayat || 17||











utá tyā́ sadyá ā́ryā saráyorindra pārátaḥ |
árṇācitráratʰāvadʰīḥ || 18||











ánu dvā́ jahitā́ nayo'ndʰáṃ śroṇáṃ ca vṛtrahan |
ná tátte sumnámáṣṭave || 19||











śatámaśmanmáyīnāṃ purā́míndro vyā̀syat |
dívodāsāya dāśúṣe || 20||











ásvāpayaddabʰī́taye sahásrā triṃśátaṃ hátʰaiḥ |
dāsā́nāmíndro māyáyā || 21||











sá gʰédutā́si vṛtrahansamāná indra gópatiḥ |
yástā́ víśvāni cicyuṣé || 22||











utá nūnáṃ yádindriyáṃ kariṣyā́ indra paúṃsyam |
adyā́ nákiṣṭádā́ minat || 23||











vāmáṃvāmaṃ ta ādure devó dadātvaryamā́ |
vāmáṃ pūṣā́ vāmáṃ bʰágo vāmáṃ deváḥ kárūḷatī || 24||












Sūkta 4.31 

káyā naścitrá ā́ bʰuvadūtī́ sadā́vṛdʰaḥ sákʰā |
káyā śáciṣṭʰayā vṛtā́ || 1||











kástvā satyó mádānāṃ máṃhiṣṭʰo matsadándʰasaḥ |
dṛḷhā́ cidārúje vásu || 2||











abʰī́ ṣú ṇaḥ sákʰīnāmavitā́ jaritṝṇā́m |
śatáṃ bʰavāsyūtíbʰiḥ || 3||











abʰī́ na ā́ vavṛtsva cakráṃ ná vṛttámárvataḥ |
niyúdbʰiścarṣaṇīnā́m || 4||











pravátā hí krátūnāmā́ hā padéva gácʰasi |
ábʰakṣi sū́rye sácā || 5||











sáṃ yátta indra manyávaḥ sáṃ cakrā́ṇi dadʰanviré |
ádʰa tvé ádʰa sū́rye || 6||











utá smā hí tvā́māhúrínmagʰávānaṃ śacīpate |
dā́tāramávidīdʰayum || 7||











utá smā sadyá ítpári śaśamānā́ya sunvaté |
purū́ cinmaṃhase vásu || 8||











nahí ṣmā te śatáṃ caná rā́dʰo váranta āmúraḥ |
ná cyautnā́ni kariṣyatáḥ || 9||











asmā́m̐ avantu te śatámasmā́nsahásramūtáyaḥ |
asmā́nvíśvā abʰíṣṭayaḥ || 10||











asmā́m̐ ihā́ vṛṇīṣva sakʰyā́ya svastáye |
mahó rāyé divítmate || 11||











asmā́m̐ aviḍḍʰi viśváhéndra rāyā́ párīṇasā |
asmā́nvíśvābʰirūtíbʰiḥ || 12||











asmábʰyaṃ tā́m̐ ápā vṛdʰi vrajā́m̐ ásteva gómataḥ |
návābʰirindrotíbʰiḥ || 13||











asmā́kaṃ dʰṛṣṇuyā́ rátʰo dyumā́m̐ indrā́napacyutaḥ |
gavyúraśvayúrīyate || 14||











asmā́kamuttamáṃ kṛdʰi śrávo devéṣu sūrya |
várṣiṣṭʰaṃ dyā́mivopári || 15||












Sūkta 4.32 

ā́ tū́ na indra vṛtrahannasmā́kamardʰámā́ gahi |
mahā́nmahī́bʰirūtíbʰiḥ || 1||











bʰṛ́miścidgʰāsi tū́tujirā́ citra citríṇīṣvā́ |
citráṃ kṛṇoṣyūtáye || 2||











dabʰrébʰiścicʰáśīyāṃsaṃ háṃsi vrā́dʰantamójasā |
sákʰibʰiryé tvé sácā || 3||











vayámindra tvé sácā vayáṃ tvābʰí nonumaḥ |
asmā́m̐asmām̐ ídúdava || 4||











sá naścitrā́bʰiradrivo'navadyā́bʰirūtíbʰiḥ |
ánādʰṛṣṭābʰirā́ gahi || 5||











bʰūyā́mo ṣú tvā́vataḥ sákʰāya indra gómataḥ |
yújo vā́jāya gʰṛ́ṣvaye || 6||











tváṃ hyéka ī́śiṣa índra vā́jasya gómataḥ |
sá no yandʰi mahī́míṣam || 7||











ná tvā varante anyátʰā yáddítsasi stutó magʰám |
stotṛ́bʰya indra girvaṇaḥ || 8||











abʰí tvā gótamā girā́nūṣata prá dāváne |
índra vā́jāya gʰṛ́ṣvaye || 9||











prá te vocāma vīryā̀ yā́ mandasāná ā́rujaḥ |
púro dā́sīrabʰī́tya || 10||











tā́ te gṛṇanti vedʰáso yā́ni cakártʰa paúṃsyā |
sutéṣvindra girvaṇaḥ || 11||











ávīvṛdʰanta gótamā índra tvé stómavāhasaḥ |
aíṣu dʰā vīrávadyáśaḥ || 12||











yácciddʰí śáśvatāmásī́ndra sā́dʰāraṇastvám |
táṃ tvā vayáṃ havāmahe || 13||











arvācīnó vaso bʰavāsmé sú matsvā́ndʰasaḥ |
sómānāmindra somapāḥ || 14||











asmā́kaṃ tvā matīnā́mā́ stóma indra yacʰatu |
arvā́gā́ vartayā hárī || 15||











puroḷā́śaṃ ca no gʰáso joṣáyāse gíraśca naḥ |
vadʰūyúriva yóṣaṇām || 16||











sahásraṃ vyátīnāṃ yuktā́nāmíndramīmahe |
śatáṃ sómasya kʰāryàḥ || 17||











sahásrā te śatā́ vayáṃ gávāmā́ cyāvayāmasi |
asmatrā́ rā́dʰa etu te || 18||











dáśa te kaláśānāṃ híraṇyānāmadʰīmahi |
bʰūridā́ asi vṛtrahan || 19||











bʰū́ridā bʰū́ri dehi no mā́ dabʰráṃ bʰū́ryā́ bʰara |
bʰū́ri gʰédindra ditsasi || 20||











bʰūridā́ hyási śrutáḥ purutrā́ śūra vṛtrahan |
ā́ no bʰajasva rā́dʰasi || 21||











prá te babʰrū́ vicakṣaṇa śáṃsāmi goṣaṇo napāt |
mā́bʰyāṃ gā́ ánu śiśratʰaḥ || 22||











kanīnakéva vidradʰé náve drupadé arbʰaké |
babʰrū́ yā́meṣu śobʰete || 23||











áraṃ ma usráyāmṇé'ramánusrayāmṇe |
babʰrū́ yā́meṣvasrídʰā || 24||












Sūkta 4.33 

prá ṛbʰúbʰyo dūtámiva vā́camiṣya upastíre śvaítarīṃ dʰenúmīḷe |
yé vā́tajūtāstaráṇibʰirévaiḥ pári dyā́ṃ sadyó apáso babʰūvúḥ || 1||











yadā́ramákrannṛbʰávaḥ pitṛ́bʰyāṃ páriviṣṭī veṣáṇā daṃsánābʰiḥ |
ā́díddevā́nāmúpa sakʰyámāyandʰī́rāsaḥ puṣṭímavahanmanā́yai || 2||











púnaryé cakrúḥ pitárā yúvānā sánā yū́peva jaraṇā́ śáyānā |
té vā́jo víbʰvām̐ ṛbʰúríndravanto mádʰupsaraso no'vantu yajñám || 3||











yátsaṃvátsamṛbʰávo gā́márakṣanyátsaṃvátsamṛbʰávo mā́ ápiṃśan |
yátsaṃvátsamábʰaranbʰā́so asyāstā́bʰiḥ śámībʰiramṛtatvámāśuḥ || 4||











jyeṣṭʰá āha camasā́ dvā́ karéti kánīyāntrī́nkṛṇavāmétyāha |
kaniṣṭʰá āha catúraskaréti tváṣṭa ṛbʰavastátpanayadváco vaḥ || 5||











satyámūcurnára evā́ hí cakrúránu svadʰā́mṛbʰávo jagmuretā́m |
vibʰrā́jamānām̐ścamasā́m̐ áhevā́venattváṣṭā catúro dadṛśvā́n || 6||











dvā́daśa dyū́nyádágohyasyātitʰyé ráṇannṛbʰávaḥ sasántaḥ |
sukṣétrākṛṇvannánayanta síndʰūndʰánvā́tiṣṭʰannóṣadʰīrnimnámā́paḥ || 7||











rátʰaṃ yé cakrúḥ suvṛ́taṃ nareṣṭʰā́ṃ yé dʰenúṃ viśvajúvaṃ viśvárūpām |
tá ā́ takṣantvṛbʰávo rayíṃ naḥ svávasaḥ svápasaḥ suhástāḥ || 8||











ápo hyèṣāmájuṣanta devā́ abʰí krátvā mánasā dī́dʰyānāḥ |
vā́jo devā́nāmabʰavatsukárméndrasya ṛbʰukṣā́ váruṇasya víbʰvā || 9||











yé hárī medʰáyoktʰā́ mádanta índrāya cakrúḥ suyújā yé áśvā |
té rāyáspóṣaṃ dráviṇānyasmé dʰattá ṛbʰavaḥ kṣemayánto ná mitrám || 10||











idā́hnaḥ pītímutá vo mádaṃ dʰurná ṛté śrāntásya sakʰyā́ya devā́ḥ |
té nūnámasmé ṛbʰavo vásūni tṛtī́ye asmínsávane dadʰāta || 11||












Sūkta 4.34 

ṛbʰúrvíbʰvā vā́ja índro no ácʰemáṃ yajñáṃ ratnadʰéyópa yāta |
idā́ hí vo dʰiṣáṇā devyáhnāmádʰātpītíṃ sáṃ mádā agmatā vaḥ || 1||











vidānā́so jánmano vājaratnā utá ṛtúbʰirṛbʰavo mādayadʰvam |
sáṃ vo mádā ágmata sáṃ púraṃdʰiḥ suvī́rāmasmé rayímérayadʰvam || 2||











ayáṃ vo yajñá ṛbʰavo'kāri yámā́ manuṣvátpradívo dadʰidʰvé |
prá vó'cʰā jujuṣāṇā́so astʰurábʰūta víśve agriyótá vājāḥ || 3||











ábʰūdu vo vidʰaté ratnadʰéyamidā́ naro dāśúṣe mártyāya |
píbata vājā ṛbʰavo dadé vo máhi tṛtī́yaṃ sávanaṃ mádāya || 4||











ā́ vājā yātópa na ṛbʰukṣā mahó naro dráviṇaso gṛṇānā́ḥ |
ā́ vaḥ pītáyo'bʰipitvé áhnāmimā́ ástaṃ navasvà iva gman || 5||











ā́ napātaḥ śavaso yātanópemáṃ yajñáṃ námasā hūyámānāḥ |
sajóṣasaḥ sūrayo yásya ca stʰá mádʰvaḥ pāta ratnadʰā́ índravantaḥ || 6||











sajóṣā indra váruṇena sómaṃ sajóṣāḥ pāhi girvaṇo marúdbʰiḥ |
agrepā́bʰirṛtupā́bʰiḥ sajóṣā gnā́spátnībʰī ratnadʰā́bʰiḥ sajóṣāḥ || 7||











sajóṣasa ādityaírmādayadʰvaṃ sajóṣasa ṛbʰavaḥ párvatebʰiḥ |
sajóṣaso daívyenā savitrā́ sajóṣasaḥ síndʰubʰī ratnadʰébʰiḥ || 8||











yé aśvínā yé pitárā yá ūtī́ dʰenúṃ tatakṣúrṛbʰávo yé áśvā |
yé áṃsatrā yá ṛ́dʰagródasī yé víbʰvo náraḥ svapatyā́ni cakrúḥ || 9||











yé gómantaṃ vā́javantaṃ suvī́raṃ rayíṃ dʰattʰá vásumantaṃ purukṣúm |
té agrepā́ ṛbʰavo mandasānā́ asmé dʰatta yé ca rātíṃ gṛṇánti || 10||











nā́pābʰūta ná vo'tītṛṣāmā́niḥśastā ṛbʰavo yajñé asmín |
sámíndreṇa mádatʰa sáṃ marúdbʰiḥ sáṃ rā́jabʰī ratnadʰéyāya devāḥ || 11||












Sūkta 4.35 

ihópa yāta śavaso napātaḥ saúdʰanvanā ṛbʰavo mā́pa bʰūta |
asmínhí vaḥ sávane ratnadʰéyaṃ gámantvíndramánu vo mádāsaḥ || 1||











ā́gannṛbʰūṇā́mihá ratnadʰéyamábʰūtsómasya súṣutasya pītíḥ |
sukṛtyáyā yátsvapasyáyā cam̐ ékaṃ vicakrá camasáṃ caturdʰā́ || 2||











vyàkṛṇota camasáṃ caturdʰā́ sákʰe ví śikṣétyabravīta |
átʰaita vājā amṛ́tasya pántʰāṃ gaṇáṃ devā́nāmṛbʰavaḥ suhastāḥ || 3||











kimmáyaḥ sviccamasá eṣá āsa yáṃ kā́vyena catúro vicakrá |
átʰā sunudʰvaṃ sávanaṃ mádāya pātá ṛbʰavo mádʰunaḥ somyásya || 4||











śácyākarta pitárā yúvānā śácyākarta camasáṃ devapā́nam |
śácyā hárī dʰánutarāvataṣṭendravā́hāvṛbʰavo vājaratnāḥ || 5||











yó vaḥ sunótyabʰipitvé áhnāṃ tīvráṃ vājāsaḥ sávanaṃ mádāya |
tásmai rayímṛbʰavaḥ sárvavīramā́ takṣata vṛṣaṇo mandasānā́ḥ || 6||











prātáḥ sutámapibo haryaśva mā́dʰyaṃdinaṃ sávanaṃ kévalaṃ te |
sámṛbʰúbʰiḥ pibasva ratnadʰébʰiḥ sákʰīm̐ryā́m̐ indra cakṛṣé sukṛtyā́ || 7||











yé devā́so ábʰavatā sukṛtyā́ śyenā́ ivédádʰi diví niṣedá |
té rátnaṃ dʰāta śavaso napātaḥ saúdʰanvanā ábʰavatāmṛ́tāsaḥ || 8||











yáttṛtī́yaṃ sávanaṃ ratnadʰéyamákṛṇudʰvaṃ svapasyā́ suhastāḥ |
tádṛbʰavaḥ páriṣiktaṃ va etátsáṃ mádebʰirindriyébʰiḥ pibadʰvam || 9||












Sūkta 4.36 

anaśvó jātó anabʰīśúruktʰyò rátʰastricakráḥ pári vartate rájaḥ |
maháttádvo devyàsya pravā́canaṃ dyā́mṛbʰavaḥ pṛtʰivī́ṃ yácca púṣyatʰa || 1||











rátʰaṃ yé cakrúḥ suvṛ́taṃ sucétasó'vihvarantaṃ mánasaspári dʰyáyā |
tā́m̐ ū nvàsyá sávanasya pītáya ā́ vo vājā ṛbʰavo vedayāmasi || 2||











tádvo vājā ṛbʰavaḥ supravācanáṃ devéṣu vibʰvo abʰavanmahitvanám |
jívrī yátsántā pitárā sanājúrā púnaryúvānā carátʰāya tákṣatʰa || 3||











ékaṃ ví cakra camasáṃ cáturvayaṃ níścármaṇo gā́mariṇīta dʰītíbʰiḥ |
átʰā devéṣvamṛtatvámānaśa śruṣṭī́ vājā ṛbʰavastádva uktʰyàm || 4||











ṛbʰutó rayíḥ pratʰamáśravastamo vā́jaśrutāso yámájījanannáraḥ |
vibʰvataṣṭó vidátʰeṣu pravā́cyo yáṃ devāsó'vatʰā sá vícarṣaṇiḥ || 5||











sá vājyárvā sá ṛ́ṣirvacasyáyā sá śū́ro ástā pṛ́tanāsu duṣṭáraḥ |
sá rāyáspóṣaṃ sá suvī́ryaṃ dadʰe yáṃ vā́jo víbʰvām̐ ṛbʰávo yámā́viṣuḥ || 6||











śréṣṭʰaṃ vaḥ péśo ádʰi dʰāyi darśatáṃ stómo vājā ṛbʰavastáṃ jujuṣṭana |
dʰī́rāso hí ṣṭʰā́ kaváyo vipaścítastā́nva enā́ bráhmaṇā́ vedayāmasi || 7||











yūyámasmábʰyaṃ dʰiṣáṇābʰyaspári vidvā́ṃso víśvā náryāṇi bʰójanā |
dyumántaṃ vā́jaṃ vṛ́ṣaśuṣmamuttamámā́ no rayímṛbʰavastakṣatā́ váyaḥ || 8||











ihá prajā́mihá rayíṃ rárāṇā ihá śrávo vīrávattakṣatā naḥ |
yéna vayáṃ citáyemā́tyanyā́ntáṃ vā́jaṃ citrámṛbʰavo dadā naḥ || 9||












Sūkta 4.37 

úpa no vājā adʰvarámṛbʰukṣā dévā yātá patʰíbʰirdevayā́naiḥ |
yátʰā yajñáṃ mánuṣo vikṣvā̀sú dadʰidʰvé raṇvāḥ sudíneṣváhnām || 1||











té vo hṛdé mánase santu yajñā́ júṣṭāso adyá gʰṛtánirṇijo guḥ |
prá vaḥ sutā́so harayanta pūrṇā́ḥ krátve dákṣāya harṣayanta pītā́ḥ || 2||











tryudāyáṃ deváhitaṃ yátʰā va stómo vājā ṛbʰukṣaṇo dadé vaḥ |
juhvé manuṣvádúparāsu vikṣú yuṣmé sácā bṛháddiveṣu sómam || 3||











pī́voaśvāḥ śucádratʰā hí bʰūtā́yaḥśiprā vājinaḥ suniṣkā́ḥ |
índrasya sūno śavaso napātó'nu vaścetyagriyáṃ mádāya || 4||











ṛbʰúmṛbʰukṣaṇo rayíṃ vā́je vājíntamaṃ yújam |
índrasvantaṃ havāmahe sadāsā́tamamaśvínam || 5||











sédṛbʰavo yámávatʰa yūyámíndraśca mártyam |
sá dʰībʰírastu sánitā medʰásātā só árvatā || 6||











ví no vājā ṛbʰukṣaṇaḥ patʰáścitana yáṣṭave |
asmábʰyaṃ sūraya stutā́ víśvā ā́śāstarīṣáṇi || 7||











táṃ no vājā ṛbʰukṣaṇa índra nā́satyā rayím |
sámáśvaṃ carṣaṇíbʰya ā́ purú śasta magʰáttaye || 8||












Sūkta 4.38 

utó hí vāṃ dātrā́ sánti pū́rvā yā́ pūrúbʰyastrasádasyurnitośé |
kṣetrāsā́ṃ dadatʰururvarāsā́ṃ gʰanáṃ dásyubʰyo abʰíbʰūtimugrám || 1||











utá vājínaṃ puruniṣṣídʰvānaṃ dadʰikrā́mu dadatʰurviśvákṛṣṭim |
ṛjipyáṃ śyenáṃ pruṣitápsumāśúṃ carkṛ́tyamaryó nṛpátiṃ ná śū́ram || 2||











yáṃ sīmánu praváteva drávantaṃ víśvaḥ pūrúrmádati hárṣamāṇaḥ |
paḍbʰírgṛ́dʰyantaṃ medʰayúṃ ná śū́raṃ ratʰatúraṃ vā́tamiva dʰrájantam || 3||











yáḥ smārundʰānó gádʰyā samátsu sánutaraścárati góṣu gácʰan |
āvírṛjīko vidátʰā nicíkyattiró aratíṃ páryā́pa āyóḥ || 4||











utá smainaṃ vastramátʰiṃ ná tāyúmánu krośanti kṣitáyo bʰáreṣu |
nīcā́yamānaṃ jásuriṃ ná śyenáṃ śrávaścā́cʰā paśumácca yūtʰám || 5||











utá smāsu pratʰamáḥ sariṣyánní veveti śréṇibʰī rátʰānām |
srájaṃ kṛṇvānó jányo ná śúbʰvā reṇúṃ rérihatkiráṇaṃ dadaśvā́n || 6||











utá syá vājī́ sáhurirṛtā́vā śúśrūṣamāṇastanvā̀ samaryé |
túraṃ yatī́ṣu turáyannṛjipyó'dʰi bʰruvóḥ kirate reṇúmṛñján || 7||











utá smāsya tanyatóriva dyórṛgʰāyató abʰiyújo bʰayante |
yadā́ sahásramabʰí ṣīmáyodʰīddurvártuḥ smā bʰavati bʰīmá ṛñján || 8||











utá smāsya panayanti jánā jūtíṃ kṛṣṭipró abʰíbʰūtimāśóḥ |
utaínamāhuḥ samitʰé viyántaḥ párā dadʰikrā́ asaratsahásraiḥ || 9||











ā́ dadʰikrā́ḥ śávasā páñca kṛṣṭī́ḥ sū́rya iva jyótiṣāpástatāna |
sahasrasā́ḥ śatasā́ vājyárvā pṛṇáktu mádʰvā sámimā́ vácāṃsi || 10||












Sūkta 4.39 

āśúṃ dadʰikrā́ṃ támu nú ṣṭavāma diváspṛtʰivyā́ utá carkirāma |
ucʰántīrmā́muṣásaḥ sūdayantváti víśvāni duritā́ni parṣan || 1||











maháścarkarmyárvataḥ kratuprā́ dadʰikrā́vṇaḥ puruvā́rasya vṛ́ṣṇaḥ |
yáṃ pūrúbʰyo dīdivā́ṃsaṃ nā́gníṃ dadátʰurmitrāvaruṇā táturim || 2||











yó áśvasya dadʰikrā́vṇo ákārītsámiddʰe agnā́ uṣáso vyùṣṭau |
ánāgasaṃ támáditiḥ kṛṇotu sá mitréṇa váruṇenā sajóṣāḥ || 3||











dadʰikrā́vṇa iṣá ūrjó mahó yádámanmahi marútāṃ nā́ma bʰadrám |
svastáye váruṇaṃ mitrámagníṃ hávāmaha índraṃ vájrabāhum || 4||











índramivédubʰáye ví hvayanta udī́rāṇā yajñámupaprayántaḥ |
dadʰikrā́mu sū́danaṃ mártyāya dadátʰurmitrāvaruṇā no áśvam || 5||











dadʰikrā́vṇo akāriṣaṃ jiṣṇóráśvasya vājínaḥ |
surabʰí no múkʰā karatprá ṇa ā́yūṃṣi tāriṣat || 6||












Sūkta 4.40 

dadʰikrā́vṇa ídu nú carkirāma víśvā ínmā́muṣásaḥ sūdayantu |
apā́magnéruṣásaḥ sū́ryasya bṛ́haspáterāṅgirasásya jiṣṇóḥ || 1||











sátvā bʰariṣó gaviṣó duvanyasácʰravasyā́diṣá uṣásasturaṇyasát |
satyó dravó dravaráḥ pataṃgaró dadʰikrā́véṣamū́rjaṃ svàrjanat || 2||











utá smāsya drávatasturaṇyatáḥ parṇáṃ ná véránu vāti pragardʰínaḥ |
śyenásyeva dʰrájato aṅkasáṃ pári dadʰikrā́vṇaḥ sahórjā́ táritrataḥ || 3||











utá syá vājī́ kṣipaṇíṃ turaṇyati grīvā́yāṃ baddʰó apikakṣá āsáni |
krátuṃ dadʰikrā́ ánu saṃtávītvatpatʰā́máṅkāṃsyánvāpánīpʰaṇat || 4||











haṃsáḥ śuciṣádvásurantarikṣasáddʰótā vediṣádátitʰirduroṇasát |
nṛṣádvarasádṛtasádvyomasádabjā́ gojā́ ṛtajā́ adrijā́ ṛtám || 5||












Sūkta 4.41 

índrā kó vāṃ varuṇā sumnámāpa stómo havíṣmām̐ amṛ́to ná hótā |
yó vāṃ hṛdí krátumām̐ asmáduktáḥ paspárśadindrāvaruṇā námasvān || 1||











índrā ha yó váruṇā cakrá āpī́ devaú mártaḥ sakʰyā́ya práyasvān |
sá hanti vṛtrā́ samitʰéṣu śátrūnávobʰirvā mahádbʰiḥ sá prá śṛṇve || 2||











índrā ha rátnaṃ váruṇā dʰéṣṭʰettʰā́ nṛ́bʰyaḥ śaśamānébʰyastā́ |
yádī sákʰāyā sakʰyā́ya sómaiḥ sutébʰiḥ suprayásā mādáyaite || 3||











índrā yuváṃ varuṇā didyúmasminnójiṣṭʰamugrā ní vadʰiṣṭaṃ vájram |
yó no durévo vṛkátirdabʰī́tistásminmimātʰāmabʰíbʰūtyójaḥ || 4||











índrā yuváṃ varuṇā bʰūtámasyā́ dʰiyáḥ pretā́rā vṛṣabʰéva dʰenóḥ |
sā́ no duhīyadyávaseva gatvī́ sahásradʰārā páyasā mahī́ gaúḥ || 5||











toké hité tánaya urvárāsu sū́ro dṛ́śīke vṛ́ṣaṇaśca paúṃsye |
índrā no átra váruṇā syātāmávobʰirdasmā́ páritakmyāyām || 6||











yuvā́míddʰyávase pūrvyā́ya pári prábʰūtī gavíṣaḥ svāpī |
vṛṇīmáhe sakʰyā́ya priyā́ya śū́rā máṃhiṣṭʰā pitáreva śambʰū́ || 7||











tā́ vāṃ dʰíyó'vase vājayántīrājíṃ ná jagmuryuvayū́ḥ sudānū |
śriyé ná gā́va úpa sómamastʰuríndraṃ gíro váruṇaṃ me manīṣā́ḥ || 8||











imā́ índraṃ váruṇaṃ me manīṣā́ ágmannúpa dráviṇamicʰámānāḥ |
úpemastʰurjoṣṭā́ra iva vásvo ragʰvī́riva śrávaso bʰíkṣamāṇāḥ || 9||











áśvyasya tmánā rátʰyasya puṣṭérnítyasya rāyáḥ pátayaḥ syāma |
tā́ cakrāṇā́ ūtíbʰirnávyasībʰirasmatrā́ rā́yo niyútaḥ sacantām || 10||











ā́ no bṛhantā bṛhatī́bʰirūtī́ índra yātáṃ varuṇa vā́jasātau |
yáddidyávaḥ pṛ́tanāsu prakrī́ḷāntásya vāṃ syāma sanitā́ra ājéḥ || 11||












Sūkta 4.42 

máma dvitā́ rāṣṭráṃ kṣatríyasya viśvā́yorvíśve amṛ́tā yátʰā naḥ |
krátuṃ sacante váruṇasya devā́ rā́jāmi kṛṣṭérupamásya vavréḥ || 1||











aháṃ rā́jā váruṇo máhyaṃ tā́nyasuryā̀ṇi pratʰamā́ dʰārayanta |
krátuṃ sacante váruṇasya devā́ rā́jāmi kṛṣṭérupamásya vavréḥ || 2||











ahámíndro váruṇasté mahitvórvī́ gabʰīré rájasī suméke |
tváṣṭeva víśvā bʰúvanāni vidvā́nsámairayaṃ ródasī dʰāráyaṃ ca || 3||











ahámapó apinvamukṣámāṇā dʰāráyaṃ dívaṃ sádana ṛtásya |
ṛténa putró áditerṛtā́votá tridʰā́tu pratʰayadví bʰū́ma || 4||











mā́ṃ náraḥ sváśvā vājáyanto mā́ṃ vṛtā́ḥ samáraṇe havante |
kṛṇómyājíṃ magʰávāhámíndra íyarmi reṇúmabʰíbʰūtyojāḥ || 5||











aháṃ tā́ víśvā cakaraṃ nákirmā daívyaṃ sáho varate ápratītam |
yánmā sómāso mamádanyáduktʰóbʰé bʰayete rájasī apāré || 6||











vidúṣṭe víśvā bʰúvanāni tásya tā́ prá bravīṣi váruṇāya vedʰaḥ |
tváṃ vṛtrā́ṇi śṛṇviṣe jagʰanvā́ntváṃ vṛtā́m̐ ariṇā indra síndʰūn || 7||











asmā́kamátra pitárastá āsansaptá ṛ́ṣayo daurgahé badʰyámāne |
tá ā́yajanta trasádasyumasyā índraṃ ná vṛtratúramardʰadevám || 8||











purukútsānī hí vāmádāśaddʰavyébʰirindrāvaruṇā námobʰiḥ |
átʰā rā́jānaṃ trasádasyumasyā vṛtraháṇaṃ dadatʰurardʰadevám || 9||











rāyā́ vayáṃ sasavā́ṃso madema havyéna devā́ yávasena gā́vaḥ |
tā́ṃ dʰenúmindrāvaruṇā yuváṃ no viśvā́hā dʰattamánapaspʰurantīm || 10||












Sūkta 4.43 

ká u śravatkatamó yajñíyānāṃ vandā́ru deváḥ katamó juṣāte |
kásyemā́ṃ devī́mamṛ́teṣu préṣṭʰāṃ hṛdí śreṣāma suṣṭutíṃ suhavyā́m || 1||











kó mṛḷāti katamá ā́gamiṣṭʰo devā́nāmu katamáḥ śámbʰaviṣṭʰaḥ |
rátʰaṃ kámāhurdravádaśvamāśúṃ yáṃ sū́ryasya duhitā́vṛṇīta || 2||











makṣū́ hí ṣmā gácʰatʰa ī́vato dyū́níndro ná śaktíṃ páritakmyāyām |
divá ā́jātā divyā́ suparṇā́ káyā śácīnāṃ bʰavatʰaḥ śáciṣṭʰā || 3||











kā́ vāṃ bʰūdúpamātiḥ káyā na ā́śvinā gamatʰo hūyámānā |
kó vāṃ maháścittyájaso abʰī́ka uruṣyátaṃ mādʰvī dasrā na ūtī́ || 4||











urú vāṃ rátʰaḥ pári nakṣati dyā́mā́ yátsamudrā́dabʰí vártate vām |
mádʰvā mādʰvī mádʰu vāṃ pruṣāyanyátsīṃ vāṃ pṛ́kṣo bʰurájanta pakvā́ḥ || 5||











síndʰurha vāṃ rasáyā siñcadáśvāngʰṛṇā́ váyo'ruṣā́saḥ pári gman |
tádū ṣú vāmajiráṃ ceti yā́naṃ yéna pátī bʰávatʰaḥ sūryā́yāḥ || 6||











ihéha yádvāṃ samanā́ papṛkṣé séyámasmé sumatírvājaratnā |
uruṣyátaṃ jaritā́raṃ yuváṃ ha śritáḥ kā́mo nāsatyā yuvadrík || 7||












Sūkta 4.44 

táṃ vāṃ rátʰaṃ vayámadyā́ huvema pṛtʰujráyamaśvinā sáṃgatiṃ góḥ |
yáḥ sūryā́ṃ váhati vandʰurāyúrgírvāhasaṃ purutámaṃ vasūyúm || 1||











yuváṃ śríyamaśvinā devátā tā́ṃ dívo napātā vanatʰaḥ śácībʰiḥ |
yuvórvápurabʰí pṛ́kṣaḥ sacante váhanti yátkakuhā́so rátʰe vām || 2||











kó vāmadyā́ karate rātáhavya ūtáye vā sutapéyāya vārkaíḥ |
ṛtásya vā vanúṣe pūrvyā́ya námo yemānó aśvinā́ vavartat || 3||











hiraṇyáyena purubʰū rátʰenemáṃ yajñáṃ nāsatyópa yātam |
píbātʰa ínmádʰunaḥ somyásya dádʰatʰo rátnaṃ vidʰaté jánāya || 4||











ā́ no yātaṃ divó ácʰā pṛtʰivyā́ hiraṇyáyena suvṛ́tā rátʰena |
mā́ vāmanyé ní yamandevayántaḥ sáṃ yáddadé nā́bʰiḥ pūrvyā́ vām || 5||











nū́ no rayíṃ puruvī́raṃ bṛhántaṃ dásrā mímātʰāmubʰáyeṣvasmé |
náro yádvāmaśvinā stómamā́vansadʰástutimājamīḷhā́so agman || 6||











ihéha yádvāṃ samanā́ papṛkṣé séyámasmé sumatírvājaratnā |
uruṣyátaṃ jaritā́raṃ yuváṃ ha śritáḥ kā́mo nāsatyā yuvadrík || 7||












Sūkta 4.45 

eṣá syá bʰānúrúdiyarti yujyáte rátʰaḥ párijmā divó asyá sā́navi |
pṛkṣā́so asminmitʰunā́ ádʰi tráyo dṛ́tisturī́yo mádʰuno ví rapśate || 1||











údvāṃ pṛkṣā́so mádʰumanta īrate rátʰā áśvāsa uṣáso vyùṣṭiṣu |
aporṇuvántastáma ā́ párīvṛtaṃ svàrṇá śukráṃ tanvánta ā́ rájaḥ || 2||











mádʰvaḥ pibataṃ madʰupébʰirāsábʰirutá priyáṃ mádʰune yuñjātʰāṃ rátʰam |
ā́ vartaníṃ mádʰunā jinvatʰaspatʰó dṛ́tiṃ vahetʰe mádʰumantamaśvinā || 3||











haṃsā́so yé vāṃ mádʰumanto asrídʰo híraṇyaparṇā uhúva uṣarbúdʰaḥ |
udaprúto mandíno mandinispṛ́śo mádʰvo ná mákṣaḥ sávanāni gacʰatʰaḥ || 4||











svadʰvarā́so mádʰumanto agnáya usrā́ jarante práti vástoraśvínā |
yánniktáhastastaráṇirvicakṣaṇáḥ sómaṃ suṣā́va mádʰumantamádribʰiḥ || 5||











ākenipā́so áhabʰirdávidʰvataḥ svàrṇá śukráṃ tanvánta ā́ rájaḥ |
sū́raścidáśvānyuyujāná īyate víśvām̐ ánu svadʰáyā cetatʰaspatʰáḥ || 6||











prá vāmavocamaśvinā dʰiyaṃdʰā́ rátʰaḥ sváśvo ajáro yó ásti |
yéna sadyáḥ pári rájāṃsi yātʰó havíṣmantaṃ taráṇiṃ bʰojámácʰa || 7||












Sūkta 4.46 

ágraṃ pibā mádʰūnāṃ sutáṃ vāyo díviṣṭiṣu |
tváṃ hí pūrvapā́ ási || 1||











śaténā no abʰíṣṭibʰirniyútvām̐ índrasāratʰiḥ |
vā́yo sutásya tṛmpatam || 2||











ā́ vāṃ sahásraṃ háraya índravāyū abʰí práyaḥ |
váhantu sómapītaye || 3||











rátʰaṃ híraṇyavandʰuramíndravāyū svadʰvarám |
ā́ hí stʰā́tʰo divispṛ́śam || 4||











rátʰena pṛtʰupā́jasā dāśvā́ṃsamúpa gacʰatam |
índravāyū ihā́ gatam || 5||











índravāyū ayáṃ sutástáṃ devébʰiḥ sajóṣasā |
píbataṃ dāśúṣo gṛhé || 6||











ihá prayā́ṇamastu vāmíndravāyū vimócanam |
ihá vāṃ sómapītaye || 7||












Sūkta 4.47 

vā́yo śukró ayāmi te mádʰvo ágraṃ díviṣṭiṣu |
ā́ yāhi sómapītaye spārhó deva niyútvatā || 1||











índraśca vāyaveṣāṃ sómānāṃ pītímarhatʰaḥ |
yuvā́ṃ hí yántī́ndavo nimnámā́po ná sadʰryàk || 2||











vā́yavíndraśca śuṣmíṇā sarátʰaṃ śavasaspatī |
niyútvantā na ūtáya ā́ yātaṃ sómapītaye || 3||











yā́ vāṃ sánti puruspṛ́ho niyúto dāśúṣe narā |
asmé tā́ yajñavāhaséndravāyū ní yacʰatam || 4||












Sūkta 4.48 

vihí hótrā ávītā vípo ná rā́yo aryáḥ |
vā́yavā́ candréṇa rátʰena yāhí sutásya pītáye || 1||











niryuvāṇó áśastīrniyútvām̐ índrasāratʰiḥ |
vā́yavā́ candréṇa rátʰena yāhí sutásya pītáye || 2||











ánu kṛṣṇé vásudʰitī yemā́te viśvápeśasā |
vā́yavā́ candréṇa rátʰena yāhí sutásya pītáye || 3||











váhantu tvā manoyújo yuktā́so navatírnáva |
vā́yavā́ candréṇa rátʰena yāhí sutásya pītáye || 4||











vā́yo śatáṃ hárīṇāṃ yuvásva póṣyāṇām |
utá vā te sahasríṇo rátʰa ā́ yātu pā́jasā || 5||












Sūkta 4.49 

idáṃ vāmāsyè havíḥ priyámindrābṛhaspatī |
uktʰáṃ mádaśca śasyate || 1||











ayáṃ vāṃ pári ṣicyate sóma indrābṛhaspatī |
cā́rurmádāya pītáye || 2||











ā́ na indrābṛhaspatī gṛhámíndraśca gacʰatam |
somapā́ sómapītaye || 3||











asmé indrābṛhaspatī rayíṃ dʰattaṃ śatagvínam |
áśvāvantaṃ sahasríṇam || 4||











índrābṛ́haspátī vayáṃ suté gīrbʰírhavāmahe |
asyá sómasya pītáye || 5||











sómamindrābṛhaspatī píbataṃ dāśúṣo gṛhé |
mādáyetʰāṃ tádokasā || 6||












Sūkta 4.50 

yástastámbʰa sáhasā ví jmó ántānbṛ́haspátistriṣadʰastʰó ráveṇa |
táṃ pratnā́sa ṛ́ṣayo dī́dʰyānāḥ puró víprā dadʰire mandrájihvam || 1||











dʰunétayaḥ supraketáṃ mádanto bṛ́haspate abʰí yé nastatasré |
pṛ́ṣantaṃ sṛprámádabdʰamūrváṃ bṛ́haspate rákṣatādasya yónim || 2||











bṛ́haspate yā́ paramā́ parāvádáta ā́ ta ṛtaspṛ́śo ní ṣeduḥ |
túbʰyaṃ kʰātā́ avatā́ ádridugdʰā mádʰva ścotantyabʰíto virapśám || 3||











bṛ́haspátiḥ pratʰamáṃ jā́yamāno mahó jyótiṣaḥ paramé vyoman |
saptā́syastuvijātó ráveṇa ví saptáraśmiradʰamattámāṃsi || 4||











sá suṣṭúbʰā sá ṛ́kvatā gaṇéna valáṃ ruroja pʰaligáṃ ráveṇa |
bṛ́haspátirusríyā havyasū́daḥ kánikradadvā́vaśatīrúdājat || 5||











evā́ pitré viśvádevāya vṛ́ṣṇe yajñaírvidʰema námasā havírbʰiḥ |
bṛ́haspate suprajā́ vīrávanto vayáṃ syāma pátayo rayīṇā́m || 6||











sá ídrā́jā prátijanyāni víśvā śúṣmeṇa tastʰāvabʰí vīryèṇa |
bṛ́haspátiṃ yáḥ súbʰṛtaṃ bibʰárti valgūyáti vándate pūrvabʰā́jam || 7||











sá ítkṣeti súdʰita ókasi své tásmā íḷā pinvate viśvadā́nīm |
tásmai víśaḥ svayámevā́ namante yásminbrahmā́ rā́jani pū́rva éti || 8||











ápratīto jayati sáṃ dʰánāni prátijanyānyutá yā́ sájanyā |
avasyáve yó várivaḥ kṛṇóti brahmáṇe rā́jā támavanti devā́ḥ || 9||











índraśca sómaṃ pibataṃ bṛhaspate'smínyajñé mandasānā́ vṛṣaṇvasū |
ā́ vāṃ viśantvíndavaḥ svābʰúvo'smé rayíṃ sárvavīraṃ ní yacʰatam || 10||











bṛ́haspata indra várdʰataṃ naḥ sácā sā́ vāṃ sumatírbʰūtvasmé |
aviṣṭáṃ dʰíyo jigṛtáṃ púraṃdʰīrjajastámaryó vanúṣāmárātīḥ || 11||












Sūkta 4.51 

idámu tyátpurutámaṃ purástājjyótistámaso vayúnāvadastʰāt |
nūnáṃ divó duhitáro vibʰātī́rgātúṃ kṛṇavannuṣáso jánāya || 1||











ástʰuru citrā́ uṣásaḥ purástānmitā́ iva sváravo'dʰvaréṣu |
vyū̀ vrajásya támaso dvā́rocʰántīravrañcʰúcayaḥ pāvakā́ḥ || 2||











ucʰántīradyá citayanta bʰojā́nrādʰodéyāyoṣáso magʰónīḥ |
acitré antáḥ paṇáyaḥ sasantvábudʰyamānāstámaso vímadʰye || 3||











kuvítsá devīḥ sanáyo návo vā yā́mo babʰūyā́duṣaso vo adyá |
yénā návagve áṅgire dáśagve saptā́sye revatī revádūṣá || 4||











yūyáṃ hí devīrṛtayúgbʰiráśvaiḥ pariprayātʰá bʰúvanāni sadyáḥ |
prabodʰáyantīruṣasaḥ sasántaṃ dvipā́ccátuṣpāccarátʰāya jīvám || 5||











kvà svidāsāṃ katamā́ purāṇī́ yáyā vidʰā́nā vidadʰúrṛbʰūṇā́m |
śúbʰaṃ yácʰubʰrā́ uṣásaścáranti ná ví jñāyante sadṛ́śīrajuryā́ḥ || 6||











tā́ gʰā tā́ bʰadrā́ uṣásaḥ purā́surabʰiṣṭídyumnā ṛtájātasatyāḥ |
yā́svījānáḥ śaśamāná uktʰaí stuváñcʰáṃsandráviṇaṃ sadyá ā́pa || 7||











tā́ ā́ caranti samanā́ purástātsamānátaḥ samanā́ papratʰānā́ḥ |
ṛtásya devī́ḥ sádaso budʰānā́ gávāṃ ná sárgā uṣáso jarante || 8||











tā́ ínnvèvá samanā́ samānī́rámītavarṇā uṣásaścaranti |
gū́hantīrábʰvamásitaṃ rúśadbʰiḥ śukrā́stanū́bʰiḥ śúcayo rucānā́ḥ || 9||











rayíṃ divo duhitaro vibʰātī́ḥ prajā́vantaṃ yacʰatāsmā́su devīḥ |
syonā́dā́ vaḥ pratibúdʰyamānāḥ suvī́ryasya pátayaḥ syāma || 10||











tádvo divo duhitaro vibʰātī́rúpa bruva uṣaso yajñáketuḥ |
vayáṃ syāma yaśáso jáneṣu táddyaúśca dʰattā́ṃ pṛtʰivī́ ca devī́ || 11||












Sūkta 4.52 

práti ṣyā́ sūnárī jánī vyucʰántī pári svásuḥ |
divó adarśi duhitā́ || 1||











áśveva citrā́ruṣī mātā́ gávāmṛtā́varī |
sákʰābʰūdaśvínoruṣā́ḥ || 2||











utá sákʰāsyaśvínorutá mātā́ gávāmasi |
utóṣo vásva īśiṣe || 3||











yāvayáddveṣasaṃ tvā cikitvítsūnṛtāvari |
práti stómairabʰutsmahi || 4||











práti bʰadrā́ adṛkṣata gávāṃ sárgā ná raśmáyaḥ |
óṣā́ aprā urú jráyaḥ || 5||











āpaprúṣī vibʰāvari vyā̀varjyótiṣā támaḥ |
úṣo ánu svadʰā́mava || 6||











ā́ dyā́ṃ tanoṣi raśmíbʰirā́ntárikṣamurú priyám |
úṣaḥ śukréṇa śocíṣā || 7||












Sūkta 4.53 

táddevásya savitúrvā́ryaṃ mahádvṛṇīmáhe ásurasya prácetasaḥ |
cʰardíryéna dāśúṣe yácʰati tmánā tánno mahā́m̐ údayāndevó aktúbʰiḥ || 1||











divó dʰartā́ bʰúvanasya prajā́patiḥ piśáṅgaṃ drāpíṃ práti muñcate kavíḥ |
vicakṣaṇáḥ pratʰáyannāpṛṇánnurvájījanatsavitā́ sumnámuktʰyàm || 2||











ā́prā rájāṃsi divyā́ni pā́rtʰivā ślókaṃ deváḥ kṛṇute svā́ya dʰármaṇe |
prá bāhū́ asrāksavitā́ sávīmani niveśáyanprasuvánnaktúbʰirjágat || 3||











ádābʰyo bʰúvanāni pracā́kaśadvratā́ni deváḥ savitā́bʰí rakṣate |
prā́srāgbāhū́ bʰúvanasya prajā́bʰyo dʰṛtávrato mahó ájmasya rājati || 4||











trírantárikṣaṃ savitā́ mahitvanā́ trī́ rájāṃsi paribʰústrī́ṇi rocanā́ |
tisró dívaḥ pṛtʰivī́stisrá invati tribʰírvrataírabʰí no rakṣati tmánā || 5||











bṛhátsumnaḥ prasavītā́ nivéśano jágata stʰātúrubʰáyasya yó vaśī́ |
sá no deváḥ savitā́ śárma yacʰatvasmé kṣáyāya trivárūtʰamáṃhasaḥ || 6||











ā́gandevá ṛtúbʰirvárdʰatu kṣáyaṃ dádʰātu naḥ savitā́ suprajā́míṣam |
sá naḥ kṣapā́bʰiráhabʰiśca jinvatu prajā́vantaṃ rayímasmé sáminvatu || 7||












Sūkta 4.54 

ábʰūddeváḥ savitā́ vándyo nú na idā́nīmáhna upavā́cyo nṛ́bʰiḥ |
ví yó rátnā bʰájati mānavébʰyaḥ śréṣṭʰaṃ no átra dráviṇaṃ yátʰā dádʰat || 1||











devébʰyo hí pratʰamáṃ yajñíyebʰyo'mṛtatváṃ suvási bʰāgámuttamám |
ā́díddāmā́naṃ savitarvyū̀rṇuṣe'nūcīnā́ jīvitā́ mā́nuṣebʰyaḥ || 2||











ácittī yáccakṛmā́ daívye jáne dīnaírdákṣaiḥ prábʰūtī pūruṣatvátā |
devéṣu ca savitarmā́nuṣeṣu ca tváṃ no átra suvatādánāgasaḥ || 3||











ná pramíye savitúrdaívyasya tádyátʰā víśvaṃ bʰúvanaṃ dʰārayiṣyáti |
yátpṛtʰivyā́ várimannā́ svaṅgurírvárṣmandiváḥ suváti satyámasya tát || 4||











índrajyeṣṭʰānbṛhádbʰyaḥ párvatebʰyaḥ kṣáyām̐ ebʰyaḥ suvasi pastyā̀vataḥ |
yátʰāyatʰā patáyanto viyemirá evaívá tastʰuḥ savitaḥ savā́ya te || 5||











yé te tríráhansavitaḥ savā́so divédive saúbʰagamāsuvánti |
índro dyā́vāpṛtʰivī́ síndʰuradbʰírādityaírno áditiḥ śárma yaṃsat || 6||












Sūkta 4.55 

kó vastrātā́ vasavaḥ kó varūtā́ dyā́vābʰūmī adite trā́sītʰāṃ naḥ |
sáhīyaso varuṇa mitra mártātkó vo'dʰvaré várivo dʰāti devāḥ || 1||











prá yé dʰā́māni pūrvyā́ṇyárcānví yáducʰā́nviyotā́ro ámūrāḥ |
vidʰātā́ro ví té dadʰurájasrā ṛtádʰītayo rurucanta dasmā́ḥ || 2||











prá pastyā̀máditiṃ síndʰumarkaíḥ svastímīḷe sakʰyā́ya devī́m |
ubʰé yátʰā no áhanī nipā́ta uṣā́sānáktā karatāmádabdʰe || 3||











vyàryamā́ váruṇaśceti pántʰāmiṣáspátiḥ suvitáṃ gātúmagníḥ |
índrāviṣṇū nṛvádu ṣú stávānā śárma no yantamámavadvárūtʰam || 4||











ā́ párvatasya marútāmávāṃsi devásya trātúravri bʰágasya |
pā́tpátirjányādáṃhaso no mitró mitríyādutá na uruṣyet || 5||











nū́ rodasī áhinā budʰnyèna stuvītá devī ápyebʰiriṣṭaíḥ |
samudráṃ ná saṃcáraṇe saniṣyávo gʰarmásvaraso nadyò ápa vran || 6||











devaírno devyáditirní pātu devástrātā́ trāyatāmáprayucʰan |
nahí mitrásya váruṇasya dʰāsímárhāmasi pramíyaṃ sā́nvagnéḥ || 7||











agnírīśe vasavyàsyāgnírmaháḥ saúbʰagasya |
tā́nyasmábʰyaṃ rāsate || 8||











úṣo magʰonyā́ vaha sū́nṛte vā́ryā purú |
asmábʰyaṃ vājinīvati || 9||











tátsú naḥ savitā́ bʰágo váruṇo mitró aryamā́ |
índro no rā́dʰasā́ gamat || 10||












Sūkta 4.56 

mahī́ dyā́vāpṛtʰivī́ ihá jyéṣṭʰe rucā́ bʰavatāṃ śucáyadbʰirarkaíḥ |
yátsīṃ váriṣṭʰe bṛhatī́ viminvánruváddʰokṣā́ papratʰānébʰirévaiḥ || 1||











devī́ devébʰiryajaté yájatrairáminatī tastʰaturukṣámāṇe |
ṛtā́varī adrúhā deváputre yajñásya netrī́ śucáyadbʰirarkaíḥ || 2||











sá ítsvápā bʰúvaneṣvāsa yá imé dyā́vāpṛtʰivī́ jajā́na |
urvī́ gabʰīré rájasī suméke avaṃśé dʰī́raḥ śácyā sámairat || 3||











nū́ rodasī bṛhádbʰirno várūtʰaiḥ pátnīvadbʰiriṣáyantī sajóṣāḥ |
urūcī́ víśve yajaté ní pātaṃ dʰiyā́ syāma ratʰyàḥ sadāsā́ḥ || 4||











prá vāṃ máhi dyávī abʰyúpastutiṃ bʰarāmahe |
śúcī úpa práśastaye || 5||











punāné tanvā̀ mitʰáḥ svéna dákṣeṇa rājatʰaḥ |
ūhyā́tʰe sanā́dṛtám || 6||











mahī́ mitrásya sādʰatʰastárantī pípratī ṛtám |
pári yajñáṃ ní ṣedatʰuḥ || 7||












Sūkta 4.57 

kṣétrasya pátinā vayáṃ hiténeva jayāmasi |
gā́máśvaṃ poṣayitnvā́ sá no mṛḷātīdṛ́śe || 1||











kṣétrasya pate mádʰumantamūrmíṃ dʰenúriva páyo asmā́su dʰukṣva |
madʰuścútaṃ gʰṛtámiva súpūtamṛtásya naḥ pátayo mṛḷayantu || 2||











mádʰumatīróṣadʰīrdyā́va ā́po mádʰumanno bʰavatvantárikṣam |
kṣétrasya pátirmádʰumānno astváriṣyanto ánvenaṃ carema || 3||











śunáṃ vāhā́ḥ śunáṃ náraḥ śunáṃ kṛṣatu lā́ṅgalam |
śunáṃ varatrā́ badʰyantāṃ śunámáṣṭrāmúdiṅgaya || 4||











śúnāsīrāvimā́ṃ vā́caṃ juṣetʰāṃ yáddiví cakrátʰuḥ páyaḥ |
ténemā́múpa siñcatam || 5||











arvā́cī subʰage bʰava sī́te vándāmahe tvā |
yátʰā naḥ subʰágā́sasi yátʰā naḥ supʰálā́sasi || 6||











índraḥ sī́tāṃ ní gṛhṇātu tā́ṃ pūṣā́nu yacʰatu |
sā́ naḥ páyasvatī duhāmúttarāmuttarāṃ sámām || 7||











śunáṃ naḥ pʰā́lā ví kṛṣantu bʰū́miṃ śunáṃ kīnā́śā abʰí yantu vāhaíḥ |
śunáṃ parjányo mádʰunā páyobʰiḥ śúnāsīrā śunámasmā́su dʰattam || 8||












Sūkta 4.58 

samudrā́dūrmírmádʰumām̐ údāradúpāṃśúnā sámamṛtatvámānaṭ |
gʰṛtásya nā́ma gúhyaṃ yádásti jihvā́ devā́nāmamṛ́tasya nā́bʰiḥ || 1||











vayáṃ nā́ma prá bravāmā gʰṛtásyāsmínyajñé dʰārayāmā námobʰiḥ |
úpa brahmā́ śṛṇavacʰasyámānaṃ cátuḥśṛṅgo'vamīdgaurá etát || 2||











catvā́ri śṛ́ṅgā tráyo asya pā́dā dvé śīrṣé saptá hástāso asya |
trídʰā baddʰó vṛṣabʰó roravīti mahó devó mártyām̐ ā́ viveśa || 3||











trídʰā hitáṃ paṇíbʰirguhyámānaṃ gávi devā́so gʰṛtámánvavindan |
índra ékaṃ sū́rya ékaṃ jajāna venā́dékaṃ svadʰáyā níṣṭatakṣuḥ || 4||











etā́ arṣanti hṛ́dyātsamudrā́cʰatávrajā ripúṇā nā́vacákṣe |
gʰṛtásya dʰā́rā abʰí cākaśīmi hiraṇyáyo vetasó mádʰya āsām || 5||











samyáksravanti saríto ná dʰénā antárhṛdā́ mánasā pūyámānāḥ |
eté arṣantyūrmáyo gʰṛtásya mṛgā́ iva kṣipaṇórī́ṣamāṇāḥ || 6||











síndʰoriva prādʰvané śūgʰanā́so vā́tapramiyaḥ patayanti yahvā́ḥ |
gʰṛtásya dʰā́rā aruṣó ná vājī́ kā́ṣṭʰā bʰindánnūrmíbʰiḥ pínvamānaḥ || 7||











abʰí pravanta sámaneva yóṣāḥ kalyāṇyàḥ smáyamānāso agním |
gʰṛtásya dʰā́rāḥ samídʰo nasanta tā́ juṣāṇó haryati jātávedāḥ || 8||











kanyā̀ iva vahatúmétavā́ u añjyàñjānā́ abʰí cākaśīmi |
yátra sómaḥ sūyáte yátra yajñó gʰṛtásya dʰā́rā abʰí tátpavante || 9||











abʰyàrṣata suṣṭutíṃ gávyamājímasmā́su bʰadrā́ dráviṇāni dʰatta |
imáṃ yajñáṃ nayata devátā no gʰṛtásya dʰā́rā mádʰumatpavante || 10||











dʰā́mante víśvaṃ bʰúvanamádʰi śritámantáḥ samudré hṛdyàntárā́yuṣi |
apā́mánīke samitʰé yá ā́bʰṛtastámaśyāma mádʰumantaṃ ta ūrmím || 11||