;

Sūkta 3.1 

sómasya mā tavásaṃ vákṣyagne váhniṃ cakartʰa vidátʰe yájadʰyai |
devā́m̐ ácʰā dī́dyadyuñjé ádriṃ śamāyé agne tanvàṃ juṣasva || 1|| 






























prā́ñcaṃ yajñáṃ cakṛma várdʰatāṃ gī́ḥ samídbʰiragníṃ námasā duvasyan |

diváḥ śaśāsurvidátʰā kavīnā́ṃ gṛ́tsāya cittaváse gātúmīṣuḥ || 2||







































máyo dadʰe médʰiraḥ pūtádakṣo diváḥ subándʰurjanúṣā pṛtʰivyā́ḥ |

ávindannu darśatámapsvàntárdevā́so agnímapási svásṝṇām || 3||







































ávardʰayansubʰágaṃ saptá yahvī́ḥ śvetáṃ jajñānámaruṣáṃ mahitvā́ |

śíśuṃ ná jātámabʰyā̀ruráśvā devā́so agníṃ jánimanvapuṣyan || 4||







































śukrébʰiráṅgai rája ātatanvā́nkrátuṃ punānáḥ kavíbʰiḥ pavítraiḥ |

śocírvásānaḥ páryā́yurapā́ṃ śríyo mimīte bṛhatī́ránūnāḥ || 5||







































vavrā́jā sīmánadatīrádabdʰā divó yahvī́rávasānā ánagnāḥ |

sánā átra yuvatáyaḥ sáyonīrékaṃ gárbʰaṃ dadʰire saptá vā́ṇīḥ || 6||







































stīrṇā́ asya saṃháto viśvárūpā gʰṛtásya yónau sravátʰe mádʰūnām |

ástʰurátra dʰenávaḥ pínvamānā mahī́ dasmásya mātárā samīcī́ || 7||







































babʰrāṇáḥ sūno sahaso vyàdyauddádʰānaḥ śukrā́ rabʰasā́ vápūṃṣi |

ścótanti dʰā́rā mádʰuno gʰṛtásya vṛ́ṣā yátra vāvṛdʰé kā́vyena || 8||







































pitúścidū́dʰarjanúṣā viveda vyàsya dʰā́rā asṛjadví dʰénāḥ |

gúhā cárantaṃ sákʰibʰiḥ śivébʰirdivó yahvī́bʰirná gúhā babʰūva || 9||







































pitúśca gárbʰaṃ janitúśca babʰre pūrvī́réko adʰayatpī́pyānāḥ |

vṛ́ṣṇe sapátnī śúcaye sábandʰū ubʰé asmai manuṣyè ní pāhi || 10||







































uraú mahā́m̐ anibādʰé vavardʰā́po agníṃ yaśásaḥ sáṃ hí pūrvī́ḥ |

ṛtásya yónāvaśayaddámūnā jāmīnā́magnírapási svásṝṇām || 11||







































akró ná babʰríḥ samitʰé mahī́nāṃ didṛkṣéyaḥ sūnáve bʰā́ṛjīkaḥ |

údusríyā jánitā yó jajā́nāpā́ṃ gárbʰo nṛ́tamo yahvó agníḥ || 12||







































apā́ṃ gárbʰaṃ darśatámóṣadʰīnāṃ vánā jajāna subʰágā vírūpam |

devā́saścinmánasā sáṃ hí jagmúḥ pániṣṭʰaṃ jātáṃ tavásaṃ duvasyan || 13||







































bṛhánta ídbʰānávo bʰā́ṛjīkamagníṃ sacanta vidyúto ná śukrā́ḥ |

gúheva vṛddʰáṃ sádasi své antárapārá ūrvé amṛ́taṃ dúhānāḥ || 14||







































ī́ḷe ca tvā yájamāno havírbʰirī́ḷe sakʰitváṃ sumatíṃ níkāmaḥ |

devaírávo mimīhi sáṃ jaritré rákṣā ca no dámyebʰiránīkaiḥ || 15||







































upakṣetā́rastáva supraṇīté'gne víśvāni dʰányā dádʰānāḥ |

surétasā śrávasā túñjamānā abʰí ṣyāma pṛtanāyū́m̐rádevān || 16||







































ā́ devā́nāmabʰavaḥ ketúragne mandró víśvāni kā́vyāni vidvā́n |

práti mártām̐ avāsayo dámūnā ánu devā́nratʰiró yāsi sā́dʰan || 17||







































ní duroṇé amṛ́to mártyānāṃ rā́jā sasāda vidátʰāni sā́dʰan |

gʰṛtápratīka urviyā́ vyadyaudagnírvíśvāni kā́vyāni vidvā́n || 18||







































ā́ no gahi sakʰyébʰiḥ śivébʰirmahā́nmahī́bʰirūtíbʰiḥ saraṇyán |

asmé rayíṃ bahuláṃ sáṃtarutraṃ suvā́caṃ bʰāgáṃ yaśásaṃ kṛdʰī naḥ || 19||







































etā́ te agne jánimā sánāni prá pūrvyā́ya nū́tanāni vocam |

mahā́nti vṛ́ṣṇe sávanā kṛtémā́ jánmañjanmanníhito jātávedāḥ || 20||







































jánmañjanmanníhito jātávedā viśvā́mitrebʰiridʰyate ájasraḥ |

tásya vayáṃ sumataú yajñíyasyā́pi bʰadré saumanasé syāma || 21||







































imáṃ yajñáṃ sahasāvantváṃ no devatrā́ dʰehi sukrato rárāṇaḥ |

prá yaṃsi hotarbṛhatī́ríṣo nó'gne máhi dráviṇamā́ yajasva || 22||







































íḷāmagne purudáṃsaṃ saníṃ góḥ śaśvattamáṃ hávamānāya sādʰa |

syā́nnaḥ sūnústánayo vijā́vā́gne sā́ te sumatírbʰūtvasmé || 23||




































 

 


Sūkta 3.2 








vaiśvānarā́ya dʰiṣáṇāmṛtāvṛ́dʰe gʰṛtáṃ ná pūtámagnáye janāmasi |

dvitā́ hótāraṃ mánuṣaśca vāgʰáto dʰiyā́ rátʰaṃ ná kúliśaḥ sámṛṇvati || 1||







































sá rocayajjanúṣā ródasī ubʰé sá mātrórabʰavatputrá ī́ḍyaḥ |

havyavā́ḷagnírajáraścánohito dūḷábʰo viśā́mátitʰirvibʰā́vasuḥ || 2||







































krátvā dákṣasya táruṣo vídʰarmaṇi devā́so agníṃ janayanta cíttibʰiḥ |

rurucānáṃ bʰānúnā jyótiṣā mahā́mátyaṃ ná vā́jaṃ saniṣyánnúpa bruve || 3||







































ā́ mandrásya saniṣyánto váreṇyaṃ vṛṇīmáhe áhrayaṃ vā́jamṛgmíyam |

rātíṃ bʰṛ́gūṇāmuśíjaṃ kavíkratumagníṃ rā́jantaṃ divyéna śocíṣā || 4||







































agníṃ sumnā́ya dadʰire puró jánā vā́jaśravasamihá vṛktábarhiṣaḥ |

yatásrucaḥ surúcaṃ viśvádevyaṃ rudráṃ yajñā́nāṃ sā́dʰadiṣṭimapásām || 5||







































pā́vakaśoce táva hí kṣáyaṃ pári hótaryajñéṣu vṛktábarhiṣo náraḥ |

ágne dúva icʰámānāsa ā́pyamúpāsate dráviṇaṃ dʰehi tébʰyaḥ || 6||







































ā́ ródasī apṛṇadā́ svarmahájjātáṃ yádenamapáso ádʰārayan |

só adʰvarā́ya pári ṇīyate kavírátyo ná vā́jasātaye cánohitaḥ || 7||







































namasyáta havyádātiṃ svadʰvaráṃ duvasyáta dámyaṃ jātávedasam |

ratʰī́rṛtásya bṛható vícarṣaṇiragnírdevā́nāmabʰavatpuróhitaḥ || 8||







































tisró yahvásya samídʰaḥ párijmano'gnérapunannuśíjo ámṛtyavaḥ |

tā́sāmékāmádadʰurmártye bʰújamu lokámu dvé úpa jāmímīyatuḥ || 9||







































viśā́ṃ kavíṃ viśpátiṃ mā́nuṣīríṣaḥ sáṃ sīmakṛṇvansvádʰitiṃ ná téjase |

sá udváto niváto yāti véviṣatsá gárbʰameṣú bʰúvaneṣu dīdʰarat || 10||







































sá jinvate jaṭʰáreṣu prajajñivā́nvṛ́ṣā citréṣu nā́nadanná siṃháḥ |

vaiśvānaráḥ pṛtʰupā́jā ámartyo vásu rátnā dáyamāno ví dāśúṣe || 11||







































vaiśvānaráḥ pratnátʰā nā́kamā́ruhaddiváspṛṣṭʰáṃ bʰándamānaḥ sumánmabʰiḥ |

sá pūrvavájjanáyañjantáve dʰánaṃ samānámájmaṃ páryeti jā́gṛviḥ || 12||







































ṛtā́vānaṃ yajñíyaṃ vípramuktʰyàmā́ yáṃ dadʰé mātaríśvā diví kṣáyam |

táṃ citráyāmaṃ hárikeśamīmahe sudītímagníṃ suvitā́ya návyase || 13||







































śúciṃ ná yā́manniṣiráṃ svardṛ́śaṃ ketúṃ divó rocanastʰā́muṣarbúdʰam |

agníṃ mūrdʰā́naṃ divó ápratiṣkutaṃ támīmahe námasā vājínaṃ bṛhát || 14||







































mandráṃ hótāraṃ śúcimádvayāvinaṃ dámūnasamuktʰyàṃ viśvácarṣaṇim |

rátʰaṃ ná citráṃ vápuṣāya darśatáṃ mánurhitaṃ sádamídrāyá īmahe || 15||




































 

 


Sūkta 3.3 








vaiśvānarā́ya pṛtʰupā́jase vípo rátnā vidʰanta dʰarúṇeṣu gā́tave |

agnírhí devā́m̐ amṛ́to duvasyátyátʰā dʰármāṇi sanátā ná dūduṣat || 1||







































antárdūtó ródasī dasmá īyate hótā níṣatto mánuṣaḥ puróhitaḥ |

kṣáyaṃ bṛhántaṃ pári bʰūṣati dyúbʰirdevébʰiragníriṣitó dʰiyā́vasuḥ || 2||







































ketúṃ yajñā́nāṃ vidátʰasya sā́dʰanaṃ víprāso agníṃ mahayanta cíttibʰiḥ |

ápāṃsi yásminnádʰi saṃdadʰúrgírastásminsumnā́ni yájamāna ā́ cake || 3||







































pitā́ yajñā́nāmásuro vipaścítāṃ vimā́namagnírvayúnaṃ ca vāgʰátām |

ā́ viveśa ródasī bʰū́rivarpasā purupriyó bʰandate dʰā́mabʰiḥ kavíḥ || 4||







































candrámagníṃ candráratʰaṃ hárivrataṃ vaiśvānarámapsuṣádaṃ svarvídam |

vigāháṃ tū́rṇiṃ táviṣībʰirā́vṛtaṃ bʰū́rṇiṃ devā́sa ihá suśríyaṃ dadʰuḥ || 5||







































agnírdevébʰirmánuṣaśca jantúbʰistanvānó yajñáṃ purupéśasaṃ dʰiyā́ |

ratʰī́rantárīyate sā́dʰadiṣṭibʰirjīró dámūnā abʰiśasticā́tanaḥ || 6||







































ágne járasva svapatyá ā́yunyūrjā́ pinvasva sámíṣo didīhi naḥ |

váyāṃsi jinva bṛhatáśca jāgṛva uśígdevā́nāmási sukráturvipā́m || 7||







































viśpátiṃ yahvámátitʰiṃ náraḥ sádā yantā́raṃ dʰīnā́muśíjaṃ ca vāgʰátām |

adʰvarā́ṇāṃ cétanaṃ jātávedasaṃ prá śaṃsanti námasā jūtíbʰirvṛdʰé || 8||







































vibʰā́vā deváḥ suráṇaḥ pári kṣitī́ragnírbabʰūva śávasā sumádratʰaḥ |

tásya vratā́ni bʰūripoṣíṇo vayámúpa bʰūṣema dáma ā́ suvṛktíbʰiḥ || 9||







































vaíśvānara táva dʰā́mānyā́ cake yébʰiḥ svarvídábʰavo vicakṣaṇa |

jātá ā́pṛṇo bʰúvanāni ródasī ágne tā́ víśvā paribʰū́rasi tmánā || 10||







































vaiśvānarásya daṃsánābʰyo bṛhádáriṇādékaḥ svapasyáyā kavíḥ |

ubʰā́ pitárā maháyannajāyatāgnírdyā́vāpṛtʰivī́ bʰū́riretasā || 11||




































 

 


Sūkta 3.4 








samítsamitsumánā bodʰyasmé śucā́śucā sumatíṃ rāsi vásvaḥ |

ā́ deva devā́nyajátʰāya vakṣi sákʰā sákʰīnsumánā yakṣyagne || 1||







































yáṃ devā́sastríráhannāyájante divédive váruṇo mitró agníḥ |

sémáṃ yajñáṃ mádʰumantaṃ kṛdʰī nastánūnapādgʰṛtáyoniṃ vidʰántam || 2||







































prá dī́dʰitirviśvávārā jigāti hótāramiḷáḥ pratʰamáṃ yájadʰyai |

ácʰā námobʰirvṛṣabʰáṃ vandádʰyai sá devā́nyakṣadiṣitó yájīyān || 3||







































ūrdʰvó vāṃ gātúradʰvaré akāryūrdʰvā́ śocī́ṃṣi prástʰitā rájāṃsi |

divó vā nā́bʰā nyàsādi hótā stṛṇīmáhi devávyacā ví barhíḥ || 4||







































saptá hotrā́ṇi mánasā vṛṇānā́ ínvanto víśvaṃ práti yannṛténa |

nṛpéśaso vidátʰeṣu prá jātā́ abʰī̀máṃ yajñáṃ ví caranta pūrvī́ḥ || 5||







































ā́ bʰándamāne uṣásā úpāke utá smayete tanvā̀ vírūpe |

yátʰā no mitró váruṇo jújoṣadíndro marútvām̐ utá vā máhobʰiḥ || 6||







































daívyā hótārā pratʰamā́ nyṛñje saptá pṛkṣā́saḥ svadʰáyā madanti |

ṛtáṃ śáṃsanta ṛtámíttá āhuránu vratáṃ vratapā́ dī́dʰyānāḥ || 7||







































ā́ bʰā́ratī bʰā́ratībʰiḥ sajóṣā íḷā devaírmanuṣyèbʰiragníḥ |

sárasvatī sārasvatébʰirarvā́ktisró devī́rbarhírédáṃ sadantu || 8||







































tánnasturī́pamádʰa poṣayitnú déva tvaṣṭarví rarāṇáḥ syasva |

yáto vīráḥ karmaṇyàḥ sudákṣo yuktágrāvā jā́yate devákāmaḥ || 9||







































vánaspaté'va sṛjópa devā́nagnírhavíḥ śamitā́ sūdayāti |

sédu hótā satyátaro yajāti yátʰā devā́nāṃ jánimāni véda || 10||







































ā́ yāhyagne samidʰānó arvā́ṅíndreṇa devaíḥ sarátʰaṃ turébʰiḥ |

barhírna āstāmáditiḥ suputrā́ svā́hā devā́ amṛ́tā mādayantām || 11||




































 

 


Sūkta 3.5 








prátyagníruṣásaścékitānó'bodʰi vípraḥ padavī́ḥ kavīnā́m |

pṛtʰupā́jā devayádbʰiḥ sámiddʰó'pa dvā́rā támaso váhnirāvaḥ || 1||







































prédvagnírvāvṛdʰe stómebʰirgīrbʰí stotṝṇā́ṃ namasyà uktʰaíḥ |

pūrvī́rṛtásya saṃdṛ́śaścakānáḥ sáṃ dūtó adyauduṣáso viroké || 2||







































ádʰāyyagnírmā́nuṣīṣu vikṣvàpā́ṃ gárbʰo mitrá ṛténa sā́dʰan |

ā́ haryató yajatáḥ sā́nvastʰādábʰūdu vípro hávyo matīnā́m || 3||







































mitró agnírbʰavati yátsámiddʰo mitró hótā váruṇo jātávedāḥ |

mitró adʰvaryúriṣiró dámūnā mitráḥ síndʰūnāmutá párvatānām || 4||







































pā́ti priyáṃ ripó ágraṃ padáṃ véḥ pā́ti yahváścáraṇaṃ sū́ryasya |

pā́ti nā́bʰā saptáśīrṣāṇamagníḥ pā́ti devā́nāmupamā́damṛṣváḥ || 5||







































ṛbʰúścakra ī́ḍyaṃ cā́ru nā́ma víśvāni devó vayúnāni vidvā́n |

sasásya cárma gʰṛtávatpadáṃ véstádídagnī́ rakṣatyáprayucʰan || 6||







































ā́ yónimagnírgʰṛtávantamastʰātpṛtʰúpragāṇamuśántamuśānáḥ |

dī́dyānaḥ śúcirṛṣváḥ pāvakáḥ púnaḥpunarmātárā návyasī kaḥ || 7||







































sadyó jātá óṣadʰībʰirvavakṣe yádī várdʰanti prasvò gʰṛténa |

ā́pa iva pravátā śúmbʰamānā uruṣyádagníḥ pitrórupástʰe || 8||







































údu ṣṭutáḥ samídʰā yahvó adyaudvárṣmandivó ádʰi nā́bʰā pṛtʰivyā́ḥ |

mitró agnírī́ḍyo mātaríśvā́ dūtó vakṣadyajátʰāya devā́n || 9||







































údastambʰītsamídʰā nā́kamṛṣvò'gnírbʰávannuttamó rocanā́nām |

yádī bʰṛ́gubʰyaḥ pári mātaríśvā gúhā sántaṃ havyavā́haṃ samīdʰé || 10||







































íḷāmagne purudáṃsaṃ saníṃ góḥ śaśvattamáṃ hávamānāya sādʰa |

syā́nnaḥ sūnústánayo vijā́vā́gne sā́ te sumatírbʰūtvasmé || 11||




































 

 


Sūkta 3.6 








prá kāravo mananā́ vacyámānā devadrī́cīṃ nayata devayántaḥ |

dakṣiṇāvā́ḍvājínī prā́cyeti havírbʰárantyagnáye gʰṛtā́cī || 1||







































ā́ ródasī apṛṇā jā́yamāna utá prá riktʰā ádʰa nú prayajyo |

diváścidagne mahinā́ pṛtʰivyā́ vacyántāṃ te váhnayaḥ saptájihvāḥ || 2||







































dyaúśca tvā pṛtʰivī́ yajñíyāso ní hótāraṃ sādayante dámāya |

yádī víśo mā́nuṣīrdevayántīḥ práyasvatīrī́ḷate śukrámarcíḥ || 3||







































mahā́nsadʰástʰe dʰruvá ā́ níṣatto'ntárdyā́vā mā́hine háryamāṇaḥ |

ā́skre sapátnī ajáre ámṛkte sabardúgʰe urugāyásya dʰenū́ || 4||







































vratā́ te agne maható mahā́ni táva krátvā ródasī ā́ tatantʰa |

tváṃ dūtó abʰavo jā́yamānastváṃ netā́ vṛṣabʰa carṣaṇīnā́m || 5||







































ṛtásya vā keśínā yogyā́bʰirgʰṛtasnúvā róhitā dʰurí dʰiṣva |

átʰā́ vaha devā́ndeva víśvānsvadʰvarā́ kṛṇuhi jātavedaḥ || 6||







































diváścidā́ te rucayanta rokā́ uṣó vibʰātī́ránu bʰāsi pūrvī́ḥ |

apó yádagna uśádʰagváneṣu hóturmandrásya panáyanta devā́ḥ || 7||







































uraú vā yé antárikṣe mádanti divó vā yé rocané sánti devā́ḥ |

ū́mā vā yé suhávāso yájatrā āyemiré ratʰyò agne áśvāḥ || 8||







































aíbʰiragne sarátʰaṃ yāhyarvā́ṅnānāratʰáṃ vā vibʰávo hyáśvāḥ |

pátnīvatastriṃśátaṃ trī́m̐śca devā́nanuṣvadʰámā́ vaha mādáyasva || 9||







































sá hótā yásya ródasī cidurvī́ yajñáṃyajñamabʰí vṛdʰé gṛṇītáḥ |

prā́cī adʰvaréva tastʰatuḥ suméke ṛtā́varī ṛtájātasya satyé || 10||







































íḷāmagne purudáṃsaṃ saníṃ góḥ śaśvattamáṃ hávamānāya sādʰa |

syā́nnaḥ sūnústánayo vijā́vā́gne sā́ te sumatírbʰūtvasmé || 11||




































 

 


Sūkta 3.7 








prá yá ārúḥ śitipṛṣṭʰásya dʰāsérā́ mātárā viviśuḥ saptá vā́ṇīḥ |

parikṣítā pitárā sáṃ carete prá sarsrāte dīrgʰámā́yuḥ prayákṣe || 1||







































divákṣaso dʰenávo vṛ́ṣṇo áśvā devī́rā́ tastʰau mádʰumadváhantīḥ |

ṛtásya tvā sádasi kṣemayántaṃ páryékā carati vartaníṃ gaúḥ || 2||







































ā́ sīmarohatsuyámā bʰávantīḥ pátiścikitvā́nrayivídrayīṇā́m |

prá nī́lapṛṣṭʰo atasásya dʰāséstā́ avāsayatpurudʰápratīkaḥ || 3||







































máhi tvāṣṭrámūrjáyantīrajuryáṃ stabʰūyámānaṃ vaháto vahanti |

vyáṅgebʰirdidyutānáḥ sadʰástʰa ékāmiva ródasī ā́ viveśa || 4||







































jānánti vṛ́ṣṇo aruṣásya śévamutá bradʰnásya śā́sane raṇanti |

divorúcaḥ surúco rócamānā íḷā yéṣāṃ gáṇyā mā́hinā gī́ḥ || 5||







































utó pitṛ́bʰyāṃ pravídā́nu gʰóṣaṃ mahó mahádbʰyāmanayanta śūṣám |

ukṣā́ ha yátra pári dʰā́namaktóránu sváṃ dʰā́ma jaritúrvavákṣa || 6||







































adʰvaryúbʰiḥ pañcábʰiḥ saptá víprāḥ priyáṃ rakṣante níhitaṃ padáṃ véḥ |

prā́ñco madantyukṣáṇo ajuryā́ devā́ devā́nāmánu hí vratā́ gúḥ || 7||







































daívyā hótārā pratʰamā́ nyṛñje saptá pṛkṣā́saḥ svadʰáyā madanti |

ṛtáṃ śáṃsanta ṛtámíttá āhuránu vratáṃ vratapā́ dī́dʰyānāḥ || 8||







































vṛṣāyánte mahé átyāya pūrvī́rvṛ́ṣṇe citrā́ya raśmáyaḥ suyāmā́ḥ |

déva hotarmandrátaraścikitvā́nmahó devā́nródasī éhá vakṣi || 9||







































pṛkṣáprayajo draviṇaḥ suvā́caḥ suketáva uṣáso revádūṣuḥ |

utó cidagne mahinā́ pṛtʰivyā́ḥ kṛtáṃ cidénaḥ sáṃ mahé daśasya || 10||







































íḷāmagne purudáṃsaṃ saníṃ góḥ śaśvattamáṃ hávamānāya sādʰa |

syā́nnaḥ sūnústánayo vijā́vā́gne sā́ te sumatírbʰūtvasmé || 11||




































 

 


Sūkta 3.8 








añjánti tvā́madʰvaré devayánto vánaspate mádʰunā daívyena |

yádūrdʰvástíṣṭʰā dráviṇehá dʰattādyádvā kṣáyo mātúrasyā́ upástʰe || 1||







































sámiddʰasya śráyamāṇaḥ purástādbráhma vanvānó ajáraṃ suvī́ram |

āré asmádámatiṃ bā́dʰamāna úcʰrayasva mahaté saúbʰagāya || 2||







































úcʰrayasva vanaspate várṣmanpṛtʰivyā́ ádʰi |

súmitī mīyámāno várco dʰā yajñávāhase || 3||







































yúvā suvā́sāḥ párivīta ā́gātsá u śréyānbʰavati jā́yamānaḥ |

táṃ dʰī́rāsaḥ kaváya únnayanti svādʰyò mánasā devayántaḥ || 4||







































jātó jāyate sudinatvé áhnāṃ samaryá ā́ vidátʰe várdʰamānaḥ |

punánti dʰī́rā apáso manīṣā́ devayā́ vípra údiyarti vā́cam || 5||







































yā́nvo náro devayánto nimimyúrvánaspate svádʰitirvā tatákṣa |

té devā́saḥ sváravastastʰivā́ṃsaḥ prajā́vadasmé didʰiṣantu rátnam || 6||







































yé vṛkṇā́so ádʰi kṣámi nímitāso yatásrucaḥ |

té no vyantu vā́ryaṃ devatrā́ kṣetrasā́dʰasaḥ || 7||







































ādityā́ rudrā́ vásavaḥ sunītʰā́ dyā́vākṣā́mā pṛtʰivī́ antárikṣam |

sajóṣaso yajñámavantu devā́ ūrdʰváṃ kṛṇvantvadʰvarásya ketúm || 8||







































haṃsā́ iva śreṇiśó yátānāḥ śukrā́ vásānāḥ sváravo na ā́guḥ |

unnīyámānāḥ kavíbʰiḥ purástāddevā́ devā́nāmápi yanti pā́tʰaḥ || 9||







































śṛ́ṅgāṇīvécʰṛṅgíṇāṃ sáṃ dadṛśre caṣā́lavantaḥ sváravaḥ pṛtʰivyā́m |

vāgʰádbʰirvā vihavé śróṣamāṇā asmā́m̐ avantu pṛtanā́jyeṣu || 10||







































vánaspate śatávalśo ví roha sahásravalśā ví vayáṃ ruhema |

yáṃ tvā́mayáṃ svádʰitistéjamānaḥ praṇinā́ya mahaté saúbʰagāya || 11||




































 

 


Sūkta 3.9 








sákʰāyastvā vavṛmahe deváṃ mártāsa ūtáye |

apā́ṃ nápātaṃ subʰágaṃ sudī́ditiṃ suprátūrtimanehásam || 1||







































kā́yamāno vanā́ tváṃ yánmātṝ́rájagannapáḥ |

ná tátte agne pramṛ́ṣe nivártanaṃ yáddūré sánnihā́bʰavaḥ || 2||







































áti tṛṣṭáṃ vavakṣitʰā́tʰaivá sumánā asi |

práprānyé yánti páryanyá āsate yéṣāṃ sakʰyé ási śritáḥ || 3||







































īyivā́ṃsamáti srídʰaḥ śáśvatīráti saścátaḥ |

ánvīmavindannicirā́so adrúho'psú siṃhámiva śritám || 4||







































sasṛvā́ṃsamiva tmánāgnímittʰā́ tiróhitam |

aínaṃ nayanmātaríśvā parāváto devébʰyo matʰitáṃ pári || 5||







































táṃ tvā mártā agṛbʰṇata devébʰyo havyavāhana |

víśvānyádyajñā́m̐ abʰipā́si mānuṣa táva krátvā yaviṣṭʰya || 6||







































tádbʰadráṃ táva daṃsánā pā́kāya cicʰadayati |

tvā́ṃ yádagne paśávaḥ samā́sate sámiddʰamapiśarvaré || 7||







































ā́ juhotā svadʰvaráṃ śīráṃ pāvakáśociṣam |

āśúṃ dūtámajiráṃ pratnámī́ḍyaṃ śruṣṭī́ deváṃ saparyata || 8||







































trī́ṇi śatā́ trī́ sahásrāṇyagníṃ triṃśácca devā́ náva cāsaparyan |

aúkṣangʰṛtaírástṛṇanbarhírasmā ā́díddʰótāraṃ nyàsādayanta || 9||




































 

 


Sūkta 3.10 








tvā́magne manīṣíṇaḥ samrā́jaṃ carṣaṇīnā́m |

deváṃ mártāsa indʰate sámadʰvaré || 1||







































tvā́ṃ yajñéṣvṛtvíjamágne hótāramīḷate |

gopā́ ṛtásya dīdihi své dáme || 2||







































sá gʰā yáste dádāśati samídʰā jātávedase |

só agne dʰatte suvī́ryaṃ sá puṣyati || 3||







































sá ketúradʰvarā́ṇāmagnírdevébʰirā́ gamat |

añjānáḥ saptá hótṛbʰirhavíṣmate || 4||







































prá hótre pūrvyáṃ váco'gnáye bʰaratā bṛhát |

vipā́ṃ jyótīṃṣi bíbʰrate ná vedʰáse || 5||







































agníṃ vardʰantu no gíro yáto jā́yata uktʰyàḥ |

mahé vā́jāya dráviṇāya darśatáḥ || 6||







































ágne yájiṣṭʰo adʰvaré devā́ndevayaté yaja |

hótā mandró ví rājasyáti srídʰaḥ || 7||







































sá naḥ pāvaka dīdihi dyumádasmé suvī́ryam |

bʰávā stotṛ́bʰyo ántamaḥ svastáye || 8||







































táṃ tvā víprā vipanyávo jāgṛvā́ṃsaḥ sámindʰate |

havyavā́hamámartyaṃ sahovṛ́dʰam || 9||




































 

 


Sūkta 3.11 








agnírhótā puróhito'dʰvarásya vícarṣaṇiḥ |

sá veda yajñámānuṣák || 1||







































sá havyavā́ḷámartya uśígdūtáścánohitaḥ |

agnírdʰiyā́ sámṛṇvati || 2||







































agnírdʰiyā́ sá cetati ketúryajñásya pūrvyáḥ |

ártʰaṃ hyàsya taráṇi || 3||







































agníṃ sūnúṃ sánaśrutaṃ sáhaso jātávedasam |

váhniṃ devā́ akṛṇvata || 4||







































ádābʰyaḥ puraetā́ viśā́magnírmā́nuṣīṇām |

tū́rṇī rátʰaḥ sádā návaḥ || 5||







































sāhvā́nvíśvā abʰiyújaḥ kráturdevā́nāmámṛktaḥ |

agnístuvíśravastamaḥ || 6||







































abʰí práyāṃsi vā́hasā dāśvā́m̐ aśnoti mártyaḥ |

kṣáyaṃ pāvakáśociṣaḥ || 7||







































pári víśvāni súdʰitāgnéraśyāma mánmabʰiḥ |

víprāso jātávedasaḥ || 8||







































ágne víśvāni vā́ryā vā́jeṣu saniṣāmahe |

tvé devā́sa érire || 9||




































 

 


Sūkta 3.12 








índrāgnī ā́ gataṃ sutáṃ gīrbʰírnábʰo váreṇyam |

asyá pātaṃ dʰiyéṣitā́ || 1||







































índrāgnī jaritúḥ sácā yajñó jigāti cétanaḥ |

ayā́ pātamimáṃ sutám || 2||







































índramagníṃ kavicʰádā yajñásya jūtyā́ vṛṇe |

tā́ sómasyehá tṛmpatām || 3||







































tośā́ vṛtraháṇā huve sajítvānā́parājitā |

indrāgnī́ vājasā́tamā || 4||







































prá vāmarcantyuktʰíno nītʰāvído jaritā́raḥ |

índrāgnī íṣa ā́ vṛṇe || 5||







































índrāgnī navatíṃ púro dāsápatnīradʰūnutam |

sākámékena kármaṇā || 6||







































índrāgnī ápasaspáryúpa prá yanti dʰītáyaḥ |

ṛtásya patʰyā̀ ánu || 7||







































índrāgnī taviṣā́ṇi vāṃ sadʰástʰāni práyāṃsi ca |

yuvóraptū́ryaṃ hitám || 8||







































índrāgnī rocanā́ diváḥ pári vā́jeṣu bʰūṣatʰaḥ |

tádvāṃ ceti prá vīryàm || 9||




































 

 


Sūkta 3.13 








prá vo devā́yāgnáye bárhiṣṭʰamarcāsmai |

gámaddevébʰirā́ sá no yájiṣṭʰo barhírā́ sadat || 1||







































ṛtā́vā yásya ródasī dákṣaṃ sácanta ūtáyaḥ |

havíṣmantastámīḷate táṃ saniṣyántó'vase || 2||







































sá yantā́ vípra eṣāṃ sá yajñā́nāmátʰā hí ṣáḥ |

agníṃ táṃ vo duvasyata dā́tā yó vánitā magʰám || 3||







































sá naḥ śármāṇi vītáye'gníryacʰatu śáṃtamā |

yáto naḥ pruṣṇávadvásu diví kṣitíbʰyo apsvā́ || 4||







































dīdivā́ṃsamápūrvyaṃ vásvībʰirasya dʰītíbʰiḥ |

ṛ́kvāṇo agnímindʰate hótāraṃ viśpátiṃ viśā́m || 5||







































utá no bráhmannaviṣa uktʰéṣu devahū́tamaḥ |

śáṃ naḥ śocā marúdvṛdʰó'gne sahasrasā́tamaḥ || 6||







































nū́ no rāsva sahásravattokávatpuṣṭimádvásu |

dyumádagne suvī́ryaṃ várṣiṣṭʰamánupakṣitam || 7||




































 

 


Sūkta 3.14 








ā́ hótā mandró vidátʰānyastʰātsatyó yájvā kavítamaḥ sá vedʰā́ḥ |

vidyúdratʰaḥ sáhasasputró agníḥ śocíṣkeśaḥ pṛtʰivyā́ṃ pā́jo aśret || 1||







































áyāmi te náma{ukti.m ju.sasva .r'taavastu'bhya.m ce'tate sahasva.h |
}
vidvā́m̐ ā́ vakṣi vidúṣo ní ṣatsi mádʰya ā́ barhírūtáye yajatra || 2||







































drávatāṃ ta uṣásā vājáyantī ágne vā́tasya patʰyā̀bʰirácʰa |

yátsīmañjánti pūrvyáṃ havírbʰirā́ vandʰúreva tastʰaturduroṇé || 3||







































mitráśca túbʰyaṃ váruṇaḥ sahasvó'gne víśve marútaḥ sumnámarcan |

yácʰocíṣā sahasasputra tíṣṭʰā abʰí kṣitī́ḥ pratʰáyansū́ryo nṝ́n || 4||







































vayáṃ te adyá rarimā́ hí kā́mamuttānáhastā námasopasádya |

yájiṣṭʰena mánasā yakṣi devā́násredʰatā mánmanā vípro agne || 5||







































tváddʰí putra sahaso ví pūrvī́rdevásya yántyūtáyo ví vā́jāḥ |

tváṃ dehi sahasríṇaṃ rayíṃ no'drogʰéṇa vácasā satyámagne || 6||







































túbʰyaṃ dakṣa kavikrato yā́nīmā́ déva mártāso adʰvaré ákarma |

tváṃ víśvasya surátʰasya bodʰi sárvaṃ tádagne amṛta svadehá || 7||




































 

 


Sūkta 3.15 








ví pā́jasā pṛtʰúnā śóśucāno bā́dʰasva dviṣó rakṣáso ámīvāḥ |

suśármaṇo bṛhatáḥ śármaṇi syāmagnéraháṃ suhávasya práṇītau || 1||







































tváṃ no asyā́ uṣáso vyùṣṭau tváṃ sū́ra údite bodʰi gopā́ḥ |

jánmeva nítyaṃ tánayaṃ juṣasva stómaṃ me agne tanvā̀ sujāta || 2||







































tváṃ nṛcákṣā vṛṣabʰā́nu pūrvī́ḥ kṛṣṇā́svagne aruṣó ví bʰāhi |

váso néṣi ca párṣi cā́tyáṃhaḥ kṛdʰī́ no rāyá uśíjo yaviṣṭʰa || 3||







































áṣāḷho agne vṛṣabʰó didīhi púro víśvāḥ saúbʰagā saṃjigīvā́n |

yajñásya netā́ pratʰamásya pāyórjā́tavedo bṛhatáḥ supraṇīte || 4||







































ácʰidrā śárma jaritaḥ purū́ṇi devā́m̐ ácʰā dī́dyānaḥ sumedʰā́ḥ |

rátʰo ná sásnirabʰí vakṣi vā́jamágne tváṃ ródasī naḥ suméke || 5||







































prá pīpaya vṛṣabʰa jínva vā́jānágne tváṃ ródasī naḥ sudógʰe |

devébʰirdeva surúcā rucānó mā́ no mártasya durmatíḥ pári ṣṭʰāt || 6||







































íḷāmagne purudáṃsaṃ saníṃ góḥ śaśvattamáṃ hávamānāya sādʰa |

syā́nnaḥ sūnústánayo vijā́vā́gne sā́ te sumatírbʰūtvasmé || 7||




































 

 


Sūkta 3.16 








ayámagníḥ suvī́ryasyéśe maháḥ saúbʰagasya |

rāyá īśe svapatyásya gómata ī́śe vṛtrahátʰānām || 1||







































imáṃ naro marutaḥ saścatā vṛ́dʰaṃ yásminrā́yaḥ śévṛdʰāsaḥ |

abʰí yé sánti pṛ́tanāsu dūḍʰyò viśvā́hā śátrumādabʰúḥ || 2||







































sá tváṃ no rāyáḥ śiśīhi mī́ḍʰvo agne suvī́ryasya |

túvidyumna várṣiṣṭʰasya prajā́vato'namīvásya śuṣmíṇaḥ || 3||







































cákriryó víśvā bʰúvanābʰí sāsahíścákrirdevéṣvā́ dúvaḥ |

ā́ devéṣu yátata ā́ suvī́rya ā́ śáṃsa utá nṛṇā́m || 4||







































mā́ no agné'mataye mā́vī́ratāyai rīradʰaḥ |

mā́gótāyai sahasasputra mā́ nidé'pa dvéṣāṃsyā́ kṛdʰi || 5||







































śagdʰí vā́jasya subʰaga prajā́vató'gne bṛható adʰvaré |

sáṃ rāyā́ bʰū́yasā sṛja mayobʰúnā túvidyumna yáśasvatā || 6||




































 

 


Sūkta 3.17 








samidʰyámānaḥ pratʰamā́nu dʰármā sámaktúbʰirajyate viśvávāraḥ |

śocíṣkeśo gʰṛtánirṇikpāvakáḥ suyajñó agníryajátʰāya devā́n || 1||







































yátʰā́yajo hotrámagne pṛtʰivyā́ yátʰā divó jātavedaścikitvā́n |

evā́néna havíṣā yakṣi devā́nmanuṣvádyajñáṃ prá tiremámadyá || 2||







































trī́ṇyā́yūṃṣi táva jātavedastisrá ājā́nīruṣásaste agne |

tā́bʰirdevā́nāmávo yakṣi vidvā́nátʰā bʰava yájamānāya śáṃ yóḥ || 3||







































agníṃ sudītíṃ sudṛ́śaṃ gṛṇánto namasyā́mastvéḍyaṃ jātavedaḥ |

tvā́ṃ dūtámaratíṃ havyavā́haṃ devā́ akṛṇvannamṛ́tasya nā́bʰim || 4||







































yástváddʰótā pū́rvo agne yájīyāndvitā́ ca sáttā svadʰáyā ca śambʰúḥ |

tásyā́nu dʰárma prá yajā cikitvó'tʰa no dʰā adʰvaráṃ devávītau || 5||




































 

 


Sūkta 3.18 








bʰávā no agne sumánā úpetau sákʰeva sákʰye pitáreva sādʰúḥ |

purudrúho hí kṣitáyo jánānāṃ práti pratīcī́rdahatādárātīḥ || 1||







































tápo ṣvàgne ántarām̐ amítrāntápā śáṃsamáraruṣaḥ párasya |

tápo vaso cikitānó acíttānví te tiṣṭʰantāmajárā ayā́saḥ || 2||







































idʰménāgna icʰámāno gʰṛténa juhómi havyáṃ tárase bálāya |

yā́vadī́śe bráhmaṇā vándamāna imā́ṃ dʰíyaṃ śataséyāya devī́m || 3||







































úcʰocíṣā sahasasputra stutó bṛhádváyaḥ śaśamānéṣu dʰehi |

revádagne viśvā́mitreṣu śáṃ yórmarmṛjmā́ te tanvàṃ bʰūri kṛ́tvaḥ || 4||







































kṛdʰí rátnaṃ susanitardʰánānāṃ sá gʰédagne bʰavasi yátsámiddʰaḥ |

stotúrduroṇé subʰágasya revátsṛprā́ karásnā dadʰiṣe vápūṃṣi || 5||




































 

 


Sūkta 3.19 








agníṃ hótāraṃ prá vṛṇe miyédʰe gṛ́tsaṃ kavíṃ viśvavídamámūram |

sá no yakṣaddevátātā yájīyānrāyé vā́jāya vanate magʰā́ni || 1||







































prá te agne havíṣmatīmiyarmyácʰā sudyumnā́ṃ rātínīṃ gʰṛtā́cīm |

pradakṣiṇíddevátātimurāṇáḥ sáṃ rātíbʰirvásubʰiryajñámaśret || 2||







































sá téjīyasā mánasā tvóta utá śikṣa svapatyásya śikṣóḥ |

ágne rāyó nṛ́tamasya prábʰūtau bʰūyā́ma te suṣṭutáyaśca vásvaḥ || 3||







































bʰū́rīṇi hí tvé dadʰiré ánīkā́gne devásya yájyavo jánāsaḥ |

sá ā́ vaha devátātiṃ yaviṣṭʰa śárdʰo yádadyá divyáṃ yájāsi || 4||







































yáttvā hótāramanájanmiyédʰe niṣādáyanto yajátʰāya devā́ḥ |

sá tváṃ no agne'vitéhá bodʰyádʰi śrávāṃsi dʰehi nastanū́ṣu || 5||




































 

 


Sūkta 3.20 








agnímuṣásamaśvínā dadʰikrā́ṃ vyuṣṭiṣu havate váhniruktʰaíḥ |

sujyótiṣo naḥ śṛṇvantu devā́ḥ sajóṣaso adʰvaráṃ vāvaśānā́ḥ || 1||







































ágne trī́ te vā́jinā trī́ ṣadʰástʰā tisráste jihvā́ ṛtajāta pūrvī́ḥ |

tisrá u te tanvò devávātāstā́bʰirnaḥ pāhi gíro áprayucʰan || 2||







































ágne bʰū́rīṇi táva jātavedo déva svadʰāvo'mṛ́tasya nā́ma |

yā́śca māyā́ māyínāṃ viśvaminva tvé pūrvī́ḥ saṃdadʰúḥ pṛṣṭabandʰo || 3||







































agnírnetā́ bʰága iva kṣitīnā́ṃ daívīnāṃ devá ṛtupā́ ṛtā́vā |

sá vṛtrahā́ sanáyo viśvávedāḥ párṣadvíśvā́ti duritā́ gṛṇántam || 4||







































dadʰikrā́magnímuṣásaṃ ca devī́ṃ bṛ́haspátiṃ savitā́raṃ ca devám |

aśvínā mitrā́váruṇā bʰágaṃ ca vásūnrudrā́m̐ ādityā́m̐ ihá huve || 5||




































 

 


Sūkta 3.21 








imáṃ no yajñámamṛ́teṣu dʰehīmā́ havyā́ jātavedo juṣasva |

stokā́nāmagne médaso gʰṛtásya hótaḥ prā́śāna pratʰamó niṣádya || 1||







































gʰṛtávantaḥ pāvaka te stokā́ ścotanti médasaḥ |

svádʰarmandevávītaye śréṣṭʰaṃ no dʰehi vā́ryam || 2||







































túbʰyaṃ stokā́ gʰṛtaścútó'gne víprāya santya |

ṛ́ṣiḥ śréṣṭʰaḥ sámidʰyase yajñásya prāvitā́ bʰava || 3||







































túbʰyaṃ ścotantyadʰrigo śacīva stokā́so agne médaso gʰṛtásya |

kaviśastó bṛhatā́ bʰānúnā́gā havyā́ juṣasva medʰira || 4||







































ójiṣṭʰaṃ te madʰyató méda údbʰṛtaṃ prá te vayáṃ dadāmahe |

ścótanti te vaso stokā́ ádʰi tvací práti tā́ndevaśó vihi || 5||




































 

 


Sūkta 3.22 








ayáṃ só agníryásminsómamíndraḥ sutáṃ dadʰé jaṭʰáre vāvaśānáḥ |

sahasríṇaṃ vā́jamátyaṃ ná sáptiṃ sasavā́nsánstūyase jātavedaḥ || 1||







































ágne yátte diví várcaḥ pṛtʰivyā́ṃ yádóṣadʰīṣvapsvā́ yajatra |

yénāntárikṣamurvā̀tatántʰa tveṣáḥ sá bʰānúrarṇavó nṛcákṣāḥ || 2||







































ágne divó árṇamácʰā jigāsyácʰā devā́m̐ ūciṣe dʰíṣṇyā yé |

yā́ rocané parástātsū́ryasya yā́ścāvástādupatíṣṭʰanta ā́paḥ || 3||







































purīṣyā̀so agnáyaḥ prāvaṇébʰiḥ sajóṣasaḥ |

juṣántāṃ yajñámadrúho'namīvā́ íṣo mahī́ḥ || 4||







































íḷāmagne purudáṃsaṃ saníṃ góḥ śaśvattamáṃ hávamānāya sādʰa |

syā́nnaḥ sūnústánayo vijā́vā́gne sā́ te sumatírbʰūtvasmé || 5||




































 

 


Sūkta 3.23 








nírmatʰitaḥ súdʰita ā́ sadʰástʰe yúvā kavíradʰvarásya praṇetā́ |

jū́ryatsvagnírajáro váneṣvátrā dadʰe amṛ́taṃ jātávedāḥ || 1||







































ámantʰiṣṭāṃ bʰā́ratā revádagníṃ deváśravā devávātaḥ sudákṣam |

ágne ví paśya bṛhatā́bʰí rāyéṣā́ṃ no netā́ bʰavatādánu dyū́n || 2||







































dáśa kṣípaḥ pūrvyáṃ sīmajījanansújātaṃ mātṛ́ṣu priyám |

agníṃ stuhi daivavātáṃ devaśravo yó jánānāmásadvaśī́ || 3||







































ní tvā dadʰe vára ā́ pṛtʰivyā́ íḷāyāspadé sudinatvé áhnām |

dṛṣádvatyāṃ mā́nuṣa āpayā́yāṃ sárasvatyāṃ revádagne didīhi || 4||







































íḷāmagne purudáṃsaṃ saníṃ góḥ śaśvattamáṃ hávamānāya sādʰa |

syā́nnaḥ sūnústánayo vijā́vā́gne sā́ te sumatírbʰūtvasmé || 5||




































 

 


Sūkta 3.24 








ágne sáhasva pṛ́tanā abʰímātīrápāsya |

duṣṭárastárannárātīrvárco dʰā yajñávāhase || 1||







































ágna iḷā́ sámidʰyase vītíhotro ámartyaḥ |

juṣásva sū́ no adʰvarám || 2||







































ágne dyumnéna jāgṛve sáhasaḥ sūnavāhuta |

édáṃ barhíḥ sado máma || 3||







































ágne víśvebʰiragníbʰirdevébʰirmahayā gíraḥ |

yajñéṣu yá u cāyávaḥ || 4||







































ágne dā́ dāśúṣe rayíṃ vīrávantaṃ párīṇasam |

śiśīhí naḥ sūnumátaḥ || 5||




































 

 


Sūkta 3.25 








ágne diváḥ sūnúrasi prácetāstánā pṛtʰivyā́ utá viśvávedāḥ |

ṛ́dʰagdevā́m̐ ihá yajā cikitvaḥ || 1||







































agníḥ sanoti vīryā̀ṇi vidvā́nsanóti vā́jamamṛ́tāya bʰū́ṣan |

sá no devā́m̐ éhá vahā purukṣo || 2||







































agnírdyā́vāpṛtʰivī́ viśvájanye ā́ bʰāti devī́ amṛ́te ámūraḥ |

kṣáyanvā́jaiḥ puruścandró námobʰiḥ || 3||







































ágna índraśca dāśúṣo duroṇé sutā́vato yajñámihópa yātam |

ámardʰantā somapéyāya devā || 4||







































ágne apā́ṃ sámidʰyase duroṇé nítyaḥ sūno sahaso jātavedaḥ |

sadʰástʰāni maháyamāna ūtī́ || 5||




































 

 


Sūkta 3.26 








vaiśvānaráṃ mánasāgníṃ nicā́yyā havíṣmanto anuṣatyáṃ svarvídam |

sudā́nuṃ deváṃ ratʰiráṃ vasūyávo gīrbʰī́ raṇváṃ kuśikā́so havāmahe || 1||







































táṃ śubʰrámagnímávase havāmahe vaiśvānaráṃ mātaríśvānamuktʰyàm |

bṛ́haspátiṃ mánuṣo devátātaye vípraṃ śrótāramátitʰiṃ ragʰuṣyádam || 2||







































áśvo ná krándañjánibʰiḥ sámidʰyate vaiśvānaráḥ kuśikébʰiryugéyuge |

sá no agníḥ suvī́ryaṃ sváśvyaṃ dádʰātu rátnamamṛ́teṣu jā́gṛviḥ || 3||







































prá yantu vā́jāstáviṣībʰiragnáyaḥ śubʰé sámmiślāḥ pṛ́ṣatīrayukṣata |

bṛhadúkṣo marúto viśvávedasaḥ prá vepayanti párvatām̐ ádābʰyāḥ || 4||











4.  prap yantuvp·Ao3p«√i vājanmpn taviṣīnfpi agninmpn  
    śubʰev···D··«√śubʰ sammiślajmpn pṛṣatījfpa ayukṣatava·U·3p«√yuj |
    (bṛhata-ukṣjms)jmsn marutNmpn (viśvanns-vedasnns)jmpn  
    prap vepayantivpCA·3p«√vip parvatanmpa adābʰyajmpn 












4.  May fiery rushes of vigour together with powers to control [them] come forth!
    Commingled to enhance, they employ dappled mares.
    Sprinkling abundantly Marut-s, known to everyone,
    free from deceit, shake the knotty ones.
















agniśríyo marúto viśvákṛṣṭaya ā́ tveṣámugrámáva īmahe vayám |

té svāníno rudríyā varṣánirṇijaḥ siṃhā́ ná heṣákratavaḥ sudā́navaḥ || 5||











5.  (agninms-śrīnfs)jmpa marutNmpa (viśvajms-kṛṣṭinfs)jmpn  
    āp tveṣajnsa ugrajnsa avasnnsa īmaheva·A·1p«√i vayamr1mpn |
    tasr3mpn svāninjmpn rudriyajmpn (varṣanns-nirṇijnfs)jmpn  
    siṃhanmpn nac (heṣajms-kratunms)jmpn sudānujmpn 












5.  We, of every race of men, approach having auspiciousness of fire Marut-s
    with request for vehement energetic assistance.
    They [are] noisy, agreeable to Rudra, having rain for a garment,
    like lions acting effectively and fast, generous.
















vrā́taṃvrātaṃ gaṇáṃgaṇaṃ suśastíbʰiragnérbʰā́maṃ marútāmója īmahe |

pṛ́ṣadaśvāso anavabʰrárādʰaso gántāro yajñáṃ vidátʰeṣu dʰī́rāḥ || 6||











6.  (vrātanms-vrātanms)a (gaṇanms-gaṇanms)a suśastinfpi  
    agninmsg bʰāmannsa marutNmpg ojasnnsa īmaheva·A·1p«√i |
    (pṛṣatjms-aśvanms)jmpn (anavabʰrajns-rādʰasnns)jmpn  
    gantṛnmpn yajñanmsa vidatʰannpl dʰīrajmpn 












6.  Swarm after swarm, troop after troop, with good hymns of praise
    we approach Marut-s vigour to [reach] the wrath of fire.
    Having dappled horses, they, who give satisfaction that does not fade,
    possessing schemas for contemplation during teaching sessions, [are] arriving at the sacrifice.
















agnírasmi jánmanā jātávedā gʰṛtáṃ me cákṣuramṛ́taṃ ma āsán |

arkástridʰā́tū rájaso vimā́nó'jasro gʰarmó havírasmi nā́ma || 7||







































tribʰíḥ pavítrairápupoddʰyàrkáṃ hṛdā́ matíṃ jyótiránu prajānán |

várṣiṣṭʰaṃ rátnamakṛta svadʰā́bʰirā́díddyā́vāpṛtʰivī́ páryapaśyat || 8||







































śatádʰāramútsamákṣīyamāṇaṃ vipaścítaṃ pitáraṃ váktvānām |

meḷíṃ mádantaṃ pitrórupástʰe táṃ rodasī pipṛtaṃ satyavā́cam || 9||








































 

 


Sūkta 3.27 








prá vo vā́jā abʰídyavo havíṣmanto gʰṛtā́cyā |

devā́ñjigāti sumnayúḥ || 1||







































ī́ḷe agníṃ vipaścítaṃ girā́ yajñásya sā́dʰanam |

śruṣṭīvā́naṃ dʰitā́vānam || 2||







































ágne śakéma te vayáṃ yámaṃ devásya vājínaḥ |

áti dvéṣāṃsi tarema || 3||







































samidʰyámāno adʰvarè'gníḥ pāvaká ī́ḍyaḥ |

śocíṣkeśastámīmahe || 4||







































pṛtʰupā́jā ámartyo gʰṛtánirṇiksvā̀hutaḥ |

agníryajñásya havyavā́ṭ || 5||







































táṃ sabā́dʰo yatásruca ittʰā́ dʰiyā́ yajñávantaḥ |

ā́ cakruragnímūtáye || 6||







































hótā devó ámartyaḥ purástādeti māyáyā |

vidátʰāni pracodáyan || 7||







































vājī́ vā́jeṣu dʰīyate'dʰvaréṣu prá ṇīyate |

vípro yajñásya sā́dʰanaḥ || 8||







































dʰiyā́ cakre váreṇyo bʰūtā́nāṃ gárbʰamā́ dadʰe |

dákṣasya pitáraṃ tánā || 9||







































ní tvā dadʰe váreṇyaṃ dákṣasyeḷā́ sahaskṛta |

ágne sudītímuśíjam || 10||







































agníṃ yantúramaptúramṛtásya yóge vanúṣaḥ |

víprā vā́jaiḥ sámindʰate || 11||







































ūrjó nápātamadʰvaré dīdivā́ṃsamúpa dyávi |

agnímīḷe kavíkratum || 12||







































īḷényo namasyàstirástámāṃsi darśatáḥ |

sámagníridʰyate vṛ́ṣā || 13||







































vṛ́ṣo agníḥ sámidʰyaté'śvo ná devavā́hanaḥ |

táṃ havíṣmanta īḷate || 14||







































vṛ́ṣaṇaṃ tvā vayáṃ vṛṣanvṛ́ṣaṇaḥ sámidʰīmahi |

ágne dī́dyataṃ bṛhát || 15||




































 

 


Sūkta 3.28 








ágne juṣásva no havíḥ puroḷā́śaṃ jātavedaḥ |

prātaḥsāvé dʰiyāvaso || 1||







































puroḷā́ agne pacatástúbʰyaṃ vā gʰā páriṣkṛtaḥ |

táṃ juṣasva yaviṣṭʰya || 2||







































ágne vīhí puroḷā́śamā́hutaṃ tiróahnyam |

sáhasaḥ sūnúrasyadʰvaré hitáḥ || 3||







































mā́dʰyaṃdine sávane jātavedaḥ puroḷā́śamihá kave juṣasva |

ágne yahvásya táva bʰāgadʰéyaṃ ná prá minanti vidátʰeṣu dʰī́rāḥ || 4||







































ágne tṛtī́ye sávane hí kā́niṣaḥ puroḷā́śaṃ sahasaḥ sūnavā́hutam |

átʰā devéṣvadʰvaráṃ vipanyáyā dʰā́ rátnavantamamṛ́teṣu jā́gṛvim || 5||







































ágne vṛdʰāná ā́hutiṃ puroḷā́śaṃ jātavedaḥ |

juṣásva tiróahnyam || 6||




































 

 


Sūkta 3.29 








ástīdámadʰimántʰanamásti prajánanaṃ kṛtám |

etā́ṃ viśpátnīmā́ bʰarāgníṃ mantʰāma pūrvátʰā || 1||







































aráṇyorníhito jātávedā gárbʰa iva súdʰito garbʰíṇīṣu |

divédiva ī́ḍyo jāgṛvádbʰirhavíṣmadbʰirmanuṣyèbʰiragníḥ || 2||







































uttānā́yāmáva bʰarā cikitvā́nsadyáḥ právītā vṛ́ṣaṇaṃ jajāna |

aruṣástūpo rúśadasya pā́ja íḷāyāsputró vayúne'janiṣṭa || 3||







































íḷāyāstvā padé vayáṃ nā́bʰā pṛtʰivyā́ ádʰi |

jā́tavedo ní dʰīmahyágne havyā́ya vóḷhave || 4||







































mántʰatā naraḥ kavímádvayantaṃ prácetasamamṛ́taṃ suprátīkam |

yajñásya ketúṃ pratʰamáṃ purástādagníṃ naro janayatā suśévam || 5||







































yádī mántʰanti bāhúbʰirví rocaté'śvo ná vājyàruṣó váneṣvā́ |

citró ná yā́mannaśvínoránivṛtaḥ pári vṛṇaktyáśmanastṛ́ṇā dáhan || 6||







































jātó agnī́ rocate cékitāno vājī́ vípraḥ kaviśastáḥ sudā́nuḥ |

yáṃ devā́sa ī́ḍyaṃ viśvavídaṃ havyavā́hamádadʰuradʰvaréṣu || 7||







































sī́da hotaḥ svá u loké cikitvā́nsādáyā yajñáṃ sukṛtásya yónau |

devāvī́rdevā́nhavíṣā yajāsyágne bṛhádyájamāne váyo dʰāḥ || 8||







































kṛṇóta dʰūmáṃ vṛ́ṣaṇaṃ sakʰāyó'sredʰanta itana vā́jamácʰa |

ayámagníḥ pṛtanāṣā́ṭ suvī́ro yéna devā́so ásahanta dásyūn || 9||







































ayáṃ te yónirṛtvíyo yáto jātó árocatʰāḥ |

táṃ jānánnagna ā́ sīdā́tʰā no vardʰayā gíraḥ || 10||







































tánūnápāducyate gárbʰa āsuró nárāśáṃso bʰavati yádvijā́yate |

mātaríśvā yádámimīta mātári vā́tasya sárgo abʰavatsárīmaṇi || 11||







































sunirmátʰā nírmatʰitaḥ sunidʰā́ níhitaḥ kavíḥ |

ágne svadʰvarā́ kṛṇu devā́ndevayaté yaja || 12||







































ájījanannamṛ́taṃ mártyāso'sremā́ṇaṃ taráṇiṃ vīḷújambʰam |

dáśa svásāro agrúvaḥ samīcī́ḥ púmāṃsaṃ jātámabʰí sáṃ rabʰante || 13||







































prá saptáhotā sanakā́darocata mātúrupástʰe yádáśocadū́dʰani |

ná ní miṣati suráṇo divédive yádásurasya jaṭʰárādájāyata || 14||







































amitrāyúdʰo marútāmiva prayā́ḥ pratʰamajā́ bráhmaṇo víśvamídviduḥ |

dyumnávadbráhma kuśikā́sa érira ékaeko dáme agníṃ sámīdʰire || 15||







































yádadyá tvā prayatí yajñé asmínhótaścikitvó'vṛṇīmahīhá |

dʰruvámayā dʰruvámutā́śamiṣṭʰāḥ prajānánvidvā́m̐ úpa yāhi sómam || 16||




































 

 


Sūkta 3.30 








icʰánti tvā somyā́saḥ sákʰāyaḥ sunvánti sómaṃ dádʰati práyāṃsi |

títikṣante abʰíśastiṃ jánānāmíndra tvádā́ káścaná hí praketáḥ || 1||







































ná te dūré paramā́ cidrájāṃsyā́ tú prá yāhi harivo háribʰyām |

stʰirā́ya vṛ́ṣṇe sávanā kṛtémā́ yuktā́ grā́vāṇaḥ samidʰāné agnaú || 2||







































índraḥ suśípro magʰávā tárutro mahā́vrātastuvikūrmírṛ́gʰāvān |

yádugró dʰā́ bādʰitó mártyeṣu kvà tyā́ te vṛṣabʰa vīryā̀ṇi || 3||







































tváṃ hí ṣmā cyāváyannácyutānyéko vṛtrā́ cárasi jígʰnamānaḥ |

táva dyā́vāpṛtʰivī́ párvatāsó'nu vratā́ya nímiteva tastʰuḥ || 4||







































utā́bʰaye puruhūta śrávobʰiréko dṛḷhámavado vṛtrahā́ sán |

imé cidindra ródasī apāré yátsaṃgṛbʰṇā́ magʰavankāśírítte || 5||







































prá sū́ ta indra pravátā háribʰyāṃ prá te vájraḥ pramṛṇánnetu śátrūn |

jahí pratīcó anūcáḥ párāco víśvaṃ satyáṃ kṛṇuhi viṣṭámastu || 6||







































yásmai dʰā́yurádadʰā mártyāyā́bʰaktaṃ cidbʰajate gehyàṃ saḥ |

bʰadrā́ ta indra sumatírgʰṛtā́cī sahásradānā puruhūta rātíḥ || 7||







































sahádānuṃ puruhūta kṣiyántamahastámindra sáṃ piṇakkúṇārum |

abʰí vṛtráṃ várdʰamānaṃ píyārumapā́damindra tavásā jagʰantʰa || 8||







































ní sāmanā́miṣirā́mindra bʰū́miṃ mahī́mapārā́ṃ sádane sasattʰa |

ástabʰnāddyā́ṃ vṛṣabʰó antárikṣamárṣantvā́pastváyehá prásūtāḥ || 9||







































alātṛṇó valá indra vrajó góḥ purā́ hántorbʰáyamāno vyā̀ra |

sugā́npatʰó akṛṇonniráje gā́ḥ prā́vanvā́ṇīḥ puruhūtáṃ dʰámantīḥ || 10||







































éko dvé vásumatī samīcī́ índra ā́ paprau pṛtʰivī́mutá dyā́m |

utā́ntárikṣādabʰí naḥ samīká iṣó ratʰī́ḥ sayújaḥ śūra vā́jān || 11||







































díśaḥ sū́ryo ná mināti prádiṣṭā divédive háryaśvaprasūtāḥ |

sáṃ yádā́naḷádʰvana ā́dídáśvairvimócanaṃ kṛṇute táttvasya || 12||







































dídṛkṣanta uṣáso yā́mannaktórvivásvatyā máhi citrámánīkam |

víśve jānanti mahinā́ yádā́gādíndrasya kárma súkṛtā purū́ṇi || 13||







































máhi jyótirníhitaṃ vakṣáṇāsvāmā́ pakváṃ carati bíbʰratī gaúḥ |

víśvaṃ svā́dma sámbʰṛtamusríyāyāṃ yátsīmíndro ádadʰādbʰójanāya || 14||







































índra dṛ́hya yāmakośā́ abʰūvanyajñā́ya śikṣa gṛṇaté sákʰibʰyaḥ |

durmāyávo durévā mártyāso niṣaṅgíṇo ripávo hántvāsaḥ || 15||







































sáṃ gʰóṣaḥ śṛṇve'vamaíramítrairjahī́ nyeṣvaśániṃ tápiṣṭʰām |

vṛścémadʰástādví rujā sáhasva jahí rákṣo magʰavanrandʰáyasva || 16||







































údvṛha rákṣaḥ sahámūlamindra vṛścā́ mádʰyaṃ prátyágraṃ śṛṇīhi |

ā́ kī́vataḥ salalū́kaṃ cakartʰa brahmadvíṣe tápuṣiṃ hetímasya || 17||







































svastáye vājíbʰiśca praṇetaḥ sáṃ yánmahī́ríṣa āsátsi pūrvī́ḥ |

rāyó vantā́ro bṛhatáḥ syāmāsmé astu bʰága indra prajā́vān || 18||







































ā́ no bʰara bʰágamindra dyumántaṃ ní te deṣṇásya dʰīmahi prareké |

ūrvá iva papratʰe kā́mo asmé támā́ pṛṇa vasupate vásūnām || 19||







































imáṃ kā́maṃ mandayā góbʰiráśvaiścandrávatā rā́dʰasā paprátʰaśca |

svaryávo matíbʰistúbʰyaṃ víprā índrāya vā́haḥ kuśikā́so akran || 20||







































ā́ no gotrā́ dardṛhi gopate gā́ḥ sámasmábʰyaṃ sanáyo yantu vā́jāḥ |

divákṣā asi vṛṣabʰa satyáśuṣmo'smábʰyaṃ sú magʰavanbodʰi godā́ḥ || 21||







































śunáṃ huvema magʰávānamíndramasmínbʰáre nṛ́tamaṃ vā́jasātau |

śṛṇvántamugrámūtáye samátsu gʰnántaṃ vṛtrā́ṇi saṃjítaṃ dʰánānām || 22||




































 

 


Sūkta 3.31 








śā́sadváhnirduhitúrnaptyàṃ gādvidvā́m̐ ṛtásya dī́dʰitiṃ saparyán |

pitā́ yátra duhitúḥ sékamṛñjánsáṃ śagmyèna mánasā dadʰanvé || 1||







































ná jāmáye tā́nvo riktʰámāraikcakā́ra gárbʰaṃ sanitúrnidʰā́nam |

yádī mātáro janáyanta váhnimanyáḥ kartā́ sukṛ́toranyá ṛndʰán || 2||







































agnírjajñe juhvā̀ réjamāno mahásputrā́m̐ aruṣásya prayákṣe |

mahā́ngárbʰo máhyā́ jātámeṣāṃ mahī́ pravṛ́ddʰáryaśvasya yajñaíḥ || 3||







































abʰí jaítrīrasacanta spṛdʰānáṃ máhi jyótistámaso nírajānan |

táṃ jānatī́ḥ prátyúdāyannuṣā́saḥ pátirgávāmabʰavadéka índraḥ || 4||







































vīḷaú satī́rabʰí dʰī́rā atṛndanprācā́hinvanmánasā saptá víprāḥ |

víśvāmavindanpatʰyā̀mṛtásya prajānánníttā́ námasā́ viveśa || 5||







































vidádyádī sarámā rugṇámádrermáhi pā́tʰaḥ pūrvyáṃ sadʰryàkkaḥ |

ágraṃ nayatsupádyákṣarāṇāmácʰā rávaṃ pratʰamā́ jānatī́ gāt || 6||







































ágacʰadu vípratamaḥ sakʰīyánnásūdayatsukṛ́te gárbʰamádriḥ |

sasā́na máryo yúvabʰirmakʰasyánnátʰābʰavadáṅgirāḥ sadyó árcan || 7||







































satáḥsataḥ pratimā́naṃ purobʰū́rvíśvā veda jánimā hánti śúṣṇam |

prá ṇo diváḥ padavī́rgavyúrárcansákʰā sákʰīm̐ramuñcanníravadyā́t || 8||







































ní gavyatā́ mánasā sedurarkaíḥ kṛṇvānā́so amṛtatvā́ya gātúm |

idáṃ cinnú sádanaṃ bʰū́ryeṣāṃ yéna mā́sām̐ ásiṣāsannṛténa || 9||







































sampáśyamānā amadannabʰí sváṃ páyaḥ pratnásya rétaso dúgʰānāḥ |

ví ródasī atapadgʰóṣa eṣāṃ jāté niṣṭʰā́mádadʰurgóṣu vīrā́n || 10||







































sá jātébʰirvṛtrahā́ sédu havyaírúdusríyā asṛjadíndro arkaíḥ |

urūcyàsmai gʰṛtávadbʰárantī mádʰu svā́dma duduhe jényā gaúḥ || 11||







































pitré ciccakruḥ sádanaṃ sámasmai máhi tvíṣīmatsukṛ́to ví hí kʰyán |

viṣkabʰnánta skámbʰanenā jánitrī ā́sīnā ūrdʰváṃ rabʰasáṃ ví minvan || 12||







































mahī́ yádi dʰiṣáṇā śiśnátʰe dʰā́tsadyovṛ́dʰaṃ vibʰvàṃ rodasyoḥ |

gíro yásminnanavadyā́ḥ samīcī́rvíśvā índrāya táviṣīránuttāḥ || 13||







































máhyā́ te sakʰyáṃ vaśmi śaktī́rā́ vṛtragʰné niyúto yanti pūrvī́ḥ |

máhi stotrámáva ā́ganma sūrérasmā́kaṃ sú magʰavanbodʰi gopā́ḥ || 14||







































máhi kṣétraṃ purú ścandráṃ vividvā́nā́dítsákʰibʰyaścarátʰaṃ sámairat |

índro nṛ́bʰirajanaddī́dyānaḥ sākáṃ sū́ryamuṣásaṃ gātúmagním || 15||







































apáścideṣá vibʰvò dámūnāḥ prá sadʰrī́cīrasṛjadviśváścandrāḥ |

mádʰvaḥ punānā́ḥ kavíbʰiḥ pavítrairdyúbʰirhinvantyaktúbʰirdʰánutrīḥ || 16||







































ánu kṛṣṇé vásudʰitī jihāte ubʰé sū́ryasya maṃhánā yájatre |

pári yátte mahimā́naṃ vṛjádʰyai sákʰāya indra kā́myā ṛjipyā́ḥ || 17||







































pátirbʰava vṛtrahansūnṛ́tānāṃ girā́ṃ viśvā́yurvṛṣabʰó vayodʰā́ḥ |

ā́ no gahi sakʰyébʰiḥ śivébʰirmahā́nmahī́bʰirūtíbʰiḥ saraṇyán || 18||







































támaṅgirasvánnámasā saparyánnávyaṃ kṛṇomi sányase purājā́m |

drúho ví yāhi bahulā́ ádevīḥ svàśca no magʰavansātáye dʰāḥ || 19||







































míhaḥ pāvakā́ḥ prátatā abʰūvansvastí naḥ pipṛhi pārámāsām |

índra tváṃ ratʰiráḥ pāhi no riṣó makṣū́makṣū kṛṇuhi gojíto naḥ || 20||







































ádediṣṭa vṛtrahā́ gópatirgā́ antáḥ kṛṣṇā́m̐ aruṣaírdʰā́mabʰirgāt |

prá sūnṛ́tā diśámāna ṛténa dúraśca víśvā avṛṇodápa svā́ḥ || 21||







































śunáṃ huvema magʰávānamíndramasmínbʰáre nṛ́tamaṃ vā́jasātau |

śṛṇvántamugrámūtáye samátsu gʰnántaṃ vṛtrā́ṇi saṃjítaṃ dʰánānām || 22||




































 

 


Sūkta 3.32 








índra sómaṃ somapate píbemáṃ mā́dʰyaṃdinaṃ sávanaṃ cā́ru yátte |

praprútʰyā śípre magʰavannṛjīṣinvimúcyā hárī ihá mādayasva || 1||







































gávāśiraṃ mantʰínamindra śukráṃ píbā sómaṃ rarimā́ te mádāya |

brahmakṛ́tā mā́rutenā gaṇéna sajóṣā rudraístṛpádā́ vṛṣasva || 2||







































yé te śúṣmaṃ yé táviṣīmávardʰannárcanta indra marútasta ójaḥ |

mā́dʰyaṃdine sávane vajrahasta píbā rudrébʰiḥ ságaṇaḥ suśipra || 3||







































tá ínnvasya mádʰumadvivipra índrasya śárdʰo marúto yá ā́san |

yébʰirvṛtrásyeṣitó vivédāmarmáṇo mányamānasya márma || 4||







































manuṣvádindra sávanaṃ juṣāṇáḥ píbā sómaṃ śáśvate vīryā̀ya |

sá ā́ vavṛtsva haryaśva yajñaíḥ saraṇyúbʰirapó árṇā sisarṣi || 5||







































tvámapó yáddʰa vṛtráṃ jagʰanvā́m̐ átyām̐ iva prā́sṛjaḥ sártavā́jaú |

śáyānamindra cáratā vadʰéna vavrivā́ṃsaṃ pári devī́rádevam || 6||







































yájāma ínnámasā vṛddʰámíndraṃ bṛhántamṛṣvámajáraṃ yúvānam |

yásya priyé mamáturyajñíyasya ná ródasī mahimā́naṃ mamā́te || 7||







































índrasya kárma súkṛtā purū́ṇi vratā́ni devā́ ná minanti víśve |

dādʰā́ra yáḥ pṛtʰivī́ṃ dyā́mutémā́ṃ jajā́na sū́ryamuṣásaṃ sudáṃsāḥ || 8||







































ádrogʰa satyáṃ táva tánmahitváṃ sadyó yájjātó ápibo ha sómam |

ná dyā́va indra tavásasta ójo nā́hā ná mā́sāḥ śarádo varanta || 9||







































tváṃ sadyó apibo jātá indra mádāya sómaṃ paramé vyoman |

yáddʰa dyā́vāpṛtʰivī́ ā́viveśīrátʰābʰavaḥ pūrvyáḥ kārúdʰāyāḥ || 10||







































áhannáhiṃ pariśáyānamárṇa ojāyámānaṃ tuvijāta távyān |

ná te mahitvámánu bʰūdádʰa dyaúryádanyáyā spʰigyā̀ kṣā́mávastʰāḥ || 11||







































yajñó hí ta indra várdʰano bʰū́dutá priyáḥ sutásomo miyédʰaḥ |

yajñéna yajñámava yajñíyaḥ sányajñáste vájramahihátya āvat || 12||







































yajñénéndramávasā́ cakre arvā́gaínaṃ sumnā́ya návyase vavṛtyām |

yá stómebʰirvāvṛdʰé pūrvyébʰiryó madʰyamébʰirutá nū́tanebʰiḥ || 13||







































vivéṣa yánmā dʰiṣáṇā jajā́na stávai purā́ pā́ryādíndramáhnaḥ |

áṃhaso yátra pīpáradyátʰā no nāvéva yā́ntamubʰáye havante || 14||







































ā́pūrṇo asya kaláśaḥ svā́hā sékteva kóśaṃ sisice píbadʰyai |

sámu priyā́ ā́vavṛtranmádāya pradakṣiṇídabʰí sómāsa índram || 15||







































ná tvā gabʰīráḥ puruhūta síndʰurnā́drayaḥ pári ṣánto varanta |

ittʰā́ sákʰibʰya iṣitó yádindrā́ dṛḷháṃ cidárujo gávyamūrvám || 16||







































śunáṃ huvema magʰávānamíndramasmínbʰáre nṛ́tamaṃ vā́jasātau |

śṛṇvántamugrámūtáye samátsu gʰnántaṃ vṛtrā́ṇi saṃjítaṃ dʰánānām || 17||




































 

 


Sūkta 3.33 








prá párvatānāmuśatī́ upástʰādáśve iva víṣite hā́samāne |

gā́veva śubʰré mātárā rihāṇé vípāṭ cʰutudrī́ páyasā javete || 1||







































índreṣite prasaváṃ bʰíkṣamāṇe ácʰā samudráṃ ratʰyèva yātʰaḥ |

samārāṇé ūrmíbʰiḥ pínvamāne anyā́ vāmanyā́mápyeti śubʰre || 2||







































ácʰā síndʰuṃ mātṛ́tamāmayāsaṃ vípāśamurvī́ṃ subʰágāmaganma |

vatsámiva mātárā saṃrihāṇé samānáṃ yónimánu saṃcárantī || 3||







































enā́ vayáṃ páyasā pínvamānā ánu yóniṃ devákṛtaṃ cárantīḥ |

ná vártave prasaváḥ sárgataktaḥ kiṃyúrvípro nadyò johavīti || 4||







































rámadʰvaṃ me vácase somyā́ya ṛ́tāvarīrúpa muhūrtámévaiḥ |

prá síndʰumácʰā bṛhatī́ manīṣā́vasyúrahve kuśikásya sūnúḥ || 5||







































índro asmā́m̐ aradadvájrabāhurápāhanvṛtráṃ paridʰíṃ nadī́nām |

devò'nayatsavitā́ supāṇístásya vayáṃ prasavé yāma urvī́ḥ || 6||







































pravā́cyaṃ śaśvadʰā́ vīryàṃ tadindrasya kárma yádáhiṃ vivṛścát |

ví vájreṇa pariṣádo jagʰānā́yannā́pó'yanamicʰámānāḥ || 7||







































etádváco jaritarmā́pi mṛṣṭʰā ā́ yátte gʰóṣānúttarā yugā́ni |

uktʰéṣu kāro práti no juṣasva mā́ no ní kaḥ puruṣatrā́ námaste || 8||







































ó ṣú svasāraḥ kāráve śṛṇota yayaú vo dūrā́dánasā rátʰena |

ní ṣū́ namadʰvaṃ bʰávatā supārā́ adʰoakṣā́ḥ sindʰavaḥ srotyā́bʰiḥ || 9||







































ā́ te kāro śṛṇavāmā vácāṃsi yayā́tʰa dūrā́dánasā rátʰena |

ní te naṃsai pīpyānéva yóṣā máryāyeva kanyā̀ śaśvacaí te || 10||







































yádaṅgá tvā bʰaratā́ḥ saṃtáreyurgavyángrā́ma iṣitá índrajūtaḥ |

árṣādáha prasaváḥ sárgatakta ā́ vo vṛṇe sumatíṃ yajñíyānām || 11||







































átāriṣurbʰaratā́ gavyávaḥ sámábʰakta vípraḥ sumatíṃ nadī́nām |

prá pinvadʰvamiṣáyantīḥ surā́dʰā ā́ vakṣáṇāḥ pṛṇádʰvaṃ yātá śī́bʰam || 12||







































údva ūrmíḥ śámyā hantvā́po yóktrāṇi muñcata |

mā́duṣkṛtau vyènasāgʰnyaú śū́namā́ratām || 13||




































 

 


Sūkta 3.34 








índraḥ pūrbʰídā́tiraddā́samarkaírvidádvasurdáyamāno ví śátrūn |

bráhmajūtastanvā̀ vāvṛdʰānó bʰū́ridātra ā́pṛṇadródasī ubʰé || 1||







































makʰásya te taviṣásya prá jūtímíyarmi vā́camamṛ́tāya bʰū́ṣan |

índra kṣitīnā́masi mā́nuṣīṇāṃ viśā́ṃ daívīnāmutá pūrvayā́vā || 2||







































índro vṛtrámavṛṇocʰárdʰanītiḥ prá māyínāmaminādvárpaṇītiḥ |

áhanvyàṃsamuśádʰagváneṣvāvírdʰénā akṛṇodrāmyā́ṇām || 3||







































índraḥ svarṣā́ janáyannáhāni jigā́yośígbʰiḥ pṛ́tanā abʰiṣṭíḥ |

prā́rocayanmánave ketúmáhnāmávindajjyótirbṛhaté ráṇāya || 4||







































índrastújo barháṇā ā́ viveśa nṛváddádʰāno náryā purū́ṇi |

ácetayaddʰíya imā́ jaritré prémáṃ várṇamatiracʰukrámāsām || 5||







































mahó mahā́ni panayantyasyéndrasya kárma súkṛtā purū́ṇi |

vṛjánena vṛjinā́nsáṃ pipeṣa māyā́bʰirdásyūm̐rabʰíbʰūtyojāḥ || 6||







































yudʰéndro mahnā́ várivaścakāra devébʰyaḥ sátpatiścarṣaṇiprā́ḥ |

vivásvataḥ sádane asya tā́ni víprā uktʰébʰiḥ kaváyo gṛṇanti || 7||







































satrāsā́haṃ váreṇyaṃ sahodā́ṃ sasavā́ṃsaṃ svàrapáśca devī́ḥ |

sasā́na yáḥ pṛtʰivī́ṃ dyā́mutémā́míndraṃ madantyánu dʰī́raṇāsaḥ || 8||







































sasā́nā́tyām̐ utá sū́ryaṃ sasānéndraḥ sasāna purubʰójasaṃ gā́m |

hiraṇyáyamutá bʰógaṃ sasāna hatvī́ dásyūnprā́ryaṃ várṇamāvat || 9||







































índra óṣadʰīrasanodáhāni vánaspátīm̐rasanodantárikṣam |

bibʰéda valáṃ nunudé vívācó'tʰābʰavaddamitā́bʰíkratūnām || 10||







































śunáṃ huvema magʰávānamíndramasmínbʰáre nṛ́tamaṃ vā́jasātau |

śṛṇvántamugrámūtáye samátsu gʰnántaṃ vṛtrā́ṇi saṃjítaṃ dʰánānām || 11||




































 

 


Sūkta 3.35 








tíṣṭʰā hárī rátʰa ā́ yujyámānā yāhí vāyúrná niyúto no ácʰa |

píbāsyándʰo abʰísṛṣṭo asmé índra svā́hā rarimā́ te mádāya || 1||







































úpājirā́ puruhūtā́ya sáptī hárī rátʰasya dʰūrṣvā́ yunajmi |

dravádyátʰā sámbʰṛtaṃ viśvátaścidúpemáṃ yajñámā́ vahāta índram || 2||







































úpo nayasva vṛ́ṣaṇā tapuṣpótémava tváṃ vṛṣabʰa svadʰāvaḥ |

grásetāmáśvā ví mucehá śóṇā divédive sadṛ́śīraddʰi dʰānā́ḥ || 3||







































bráhmaṇā te brahmayújā yunajmi hárī sákʰāyā sadʰamā́da āśū́ |

stʰiráṃ rátʰaṃ sukʰámindrādʰitíṣṭʰanprajānánvidvā́m̐ úpa yāhi sómam || 4||







































mā́ te hárī vṛ́ṣaṇā vītápṛṣṭʰā ní rīramanyájamānāso anyé |

atyā́yāhi śáśvato vayáṃ té'raṃ sutébʰiḥ kṛṇavāma sómaiḥ || 5||







































távāyáṃ sómastváméhyarvā́ṅcʰaśvattamáṃ sumánā asyá pāhi |

asmínyajñé barhíṣyā́ niṣádyā dadʰiṣvémáṃ jaṭʰára índumindra || 6||







































stīrṇáṃ te barhíḥ sutá indra sómaḥ kṛtā́ dʰānā́ áttave te háribʰyām |

tádokase puruśā́kāya vṛ́ṣṇe marútvate túbʰyaṃ rātā́ havī́ṃṣi || 7||







































imáṃ náraḥ párvatāstúbʰyamā́paḥ sámindra góbʰirmádʰumantamakran |

tásyāgátyā sumánā ṛṣva pāhi prajānánvidvā́npatʰyā̀ ánu svā́ḥ || 8||







































yā́m̐ ā́bʰajo marúta indra sóme yé tvā́mávardʰannábʰavangaṇáste |

tébʰiretáṃ sajóṣā vāvaśānò'gnéḥ piba jihváyā sómamindra || 9||







































índra píba svadʰáyā citsutásyāgnérvā pāhi jihváyā yajatra |

adʰvaryórvā práyataṃ śakra hástāddʰóturvā yajñáṃ havíṣo juṣasva || 10||







































śunáṃ huvema magʰávānamíndramasmínbʰáre nṛ́tamaṃ vā́jasātau |

śṛṇvántamugrámūtáye samátsu gʰnántaṃ vṛtrā́ṇi saṃjítaṃ dʰánānām || 11||




































 

 


Sūkta 3.36 








imā́mū ṣú prábʰṛtiṃ sātáye dʰāḥ śáśvacʰaśvadūtíbʰiryā́damānaḥ |

sutésute vāvṛdʰe várdʰanebʰiryáḥ kármabʰirmahádbʰiḥ súśruto bʰū́t || 1||







































índrāya sómāḥ pradívo vídānā ṛbʰúryébʰirvṛ́ṣaparvā víhāyāḥ |

prayamyámānānpráti ṣū́ gṛbʰāyéndra píba vṛ́ṣadʰūtasya vṛ́ṣṇaḥ || 2||







































píbā várdʰasva táva gʰā sutā́sa índra sómāsaḥ pratʰamā́ utémé |

yátʰā́pibaḥ pūrvyā́m̐ indra sómām̐ evā́ pāhi pányo adyā́ návīyān || 3||







































mahā́m̐ ámatro vṛjáne virapśyùgráṃ śávaḥ patyate dʰṛṣṇvójaḥ |

nā́ha vivyāca pṛtʰivī́ canaínaṃ yátsómāso háryaśvamámandan || 4||







































mahā́m̐ ugró vāvṛdʰe vīryā̀ya samā́cakre vṛṣabʰáḥ kā́vyena |

índro bʰágo vājadā́ asya gā́vaḥ prá jāyante dákṣiṇā asya pūrvī́ḥ || 5||







































prá yátsíndʰavaḥ prasaváṃ yátʰā́yannā́paḥ samudráṃ ratʰyèva jagmuḥ |

átaścidíndraḥ sádaso várīyānyádīṃ sómaḥ pṛṇáti dugdʰó aṃśúḥ || 6||







































samudréṇa síndʰavo yā́damānā índrāya sómaṃ súṣutaṃ bʰárantaḥ |

aṃśúṃ duhanti hastíno bʰarítrairmádʰvaḥ punanti dʰā́rayā pavítraiḥ || 7||







































hradā́ iva kukṣáyaḥ somadʰā́nāḥ sámī vivyāca sávanā purū́ṇi |

ánnā yádíndraḥ pratʰamā́ vyā́śa vṛtráṃ jagʰanvā́m̐ avṛṇīta sómam || 8||







































ā́ tū́ bʰara mā́kiretátpári ṣṭʰādvidmā́ hí tvā vásupatiṃ vásūnām |

índra yátte mā́hinaṃ dátramástyasmábʰyaṃ táddʰaryaśva prá yandʰi || 9||







































asmé prá yandʰi magʰavannṛjīṣinníndra rāyó viśvávārasya bʰū́reḥ |

asmé śatáṃ śarádo jīváse dʰā asmé vīrā́ñcʰáśvata indra śiprin || 10||







































śunáṃ huvema magʰávānamíndramasmínbʰáre nṛ́tamaṃ vā́jasātau |

śṛṇvántamugrámūtáye samátsu gʰnántaṃ vṛtrā́ṇi saṃjítaṃ dʰánānām || 11||




































 

 


Sūkta 3.37 








vā́rtrahatyāya śávase pṛtanāṣā́hyāya ca |

índra tvā́ vartayāmasi || 1||







































arvācī́naṃ sú te mána utá cákṣuḥ śatakrato |

índra kṛṇvántu vāgʰátaḥ || 2||







































nā́māni te śatakrato víśvābʰirgīrbʰírīmahe |

índrābʰimātiṣā́hye || 3||







































puruṣṭutásya dʰā́mabʰiḥ śaténa mahayāmasi |

índrasya carṣaṇīdʰṛ́taḥ || 4||







































índraṃ vṛtrā́ya hántave puruhūtámúpa bruve |

bʰáreṣu vā́jasātaye || 5||







































vā́jeṣu sāsahírbʰava tvā́mīmahe śatakrato |

índra vṛtrā́ya hántave || 6||







































dyumnéṣu pṛtanā́jye pṛtsutū́rṣu śrávassu ca |

índra sā́kṣvābʰímātiṣu || 7||







































śuṣmíntamaṃ na ūtáye dyumnínaṃ pāhi jā́gṛvim |

índra sómaṃ śatakrato || 8||







































indriyā́ṇi śatakrato yā́ te jáneṣu pañcásu |

índra tā́ni ta ā́ vṛṇe || 9||







































ágannindra śrávo bṛháddyumnáṃ dadʰiṣva duṣṭáram |

útte śúṣmaṃ tirāmasi || 10||







































arvāváto na ā́ gahyátʰo śakra parāvátaḥ |

u lokó yáste adriva índrehá táta ā́ gahi || 11||




































 

 


Sūkta 3.38 








abʰí táṣṭeva dīdʰayā manīṣā́mátyo ná vājī́ sudʰúro jíhānaḥ |

abʰí priyā́ṇi mármṛśatpárāṇi kavī́m̐ricʰāmi saṃdṛ́śe sumedʰā́ḥ || 1||







































inótá pṛcʰa jánimā kavīnā́ṃ manodʰṛ́taḥ sukṛ́tastakṣata dyā́m |

imā́ u te praṇyò várdʰamānā mánovātā ádʰa nú dʰármaṇi gman || 2||







































ní ṣīmídátra gúhyā dádʰānā utá kṣatrā́ya ródasī sámañjan |

sáṃ mā́trābʰirmamiré yemúrurvī́ antármahī́ sámṛte dʰā́yase dʰuḥ || 3||







































ātíṣṭʰantaṃ pári víśve abʰūṣañcʰríyo vásānaścarati svárociḥ |

maháttádvṛ́ṣṇo ásurasya nā́mā́ viśvárūpo amṛ́tāni tastʰau || 4||







































ásūta pū́rvo vṛṣabʰó jyā́yānimā́ asya śurúdʰaḥ santi pūrvī́ḥ |

dívo napātā vidátʰasya dʰībʰíḥ kṣatráṃ rājānā pradívo dadʰātʰe || 5||







































trī́ṇi rājānā vidátʰe purū́ṇi pári víśvāni bʰūṣatʰaḥ sádāṃsi |

ápaśyamátra mánasā jaganvā́nvraté gandʰarvā́m̐ ápi vāyúkeśān || 6||







































tádínnvasya vṛṣabʰásya dʰenórā́ nā́mabʰirmamire sákmyaṃ góḥ |

anyádanyadasuryàṃ vasānā ní māyíno mamire rūpámasmin || 7||







































tádínnvasya savitúrnákirme hiraṇyáyīmamátiṃ yā́máśiśret |

ā́ suṣṭutī́ ródasī viśvaminvé ápīva yóṣā jánimāni vavre || 8||







































yuváṃ pratnásya sādʰatʰo mahó yáddaívī svastíḥ pári ṇaḥ syātam |

gopā́jihvasya tastʰúṣo vírūpā víśve paśyanti māyínaḥ kṛtā́ni || 9||







































śunáṃ huvema magʰávānamíndramasmínbʰáre nṛ́tamaṃ vā́jasātau |

śṛṇvántamugrámūtáye samátsu gʰnántaṃ vṛtrā́ṇi saṃjítaṃ dʰánānām || 10||




































 

 


Sūkta 3.39 








índraṃ matírhṛdá ā́ vacyámānā́cʰā pátiṃ stómataṣṭā jigāti |

yā́ jā́gṛvirvidátʰe śasyámānéndra yátte jā́yate viddʰí tásya || 1||







































diváścidā́ pūrvyā́ jā́yamānā ví jā́gṛvirvidátʰe śasyámānā |

bʰadrā́ vástrāṇyárjunā vásānā séyámasmé sanajā́ pítryā dʰī́ḥ || 2||







































yamā́ cidátra yamasū́rasūta jihvā́yā ágraṃ pátadā́ hyástʰāt |

vápūṃṣi jātā́ mitʰunā́ sacete tamohánā tápuṣo budʰná étā || 3||







































nákireṣāṃ ninditā́ mártyeṣu yé asmā́kaṃ pitáro góṣu yodʰā́ḥ |

índra eṣāṃ dṛṃhitā́ mā́hināvānúdgotrā́ṇi sasṛje daṃsánāvān || 4||







































sákʰā ha yátra sákʰibʰirnávagvairabʰijñvā́ sátvabʰirgā́ anugmán |

satyáṃ tádíndro daśábʰirdáśagvaiḥ sū́ryaṃ viveda támasi kṣiyántam || 5||







































índro mádʰu sámbʰṛtamusríyāyāṃ padvádviveda śapʰávannáme góḥ |

gúhā hitáṃ gúhyaṃ gūḷhámapsú háste dadʰe dákṣiṇe dákṣiṇāvān || 6||







































jyótirvṛṇīta támaso vijānánnāré syāma duritā́dabʰī́ke |

imā́ gíraḥ somapāḥ somavṛddʰa juṣásvendra purutámasya kāróḥ || 7||







































jyótiryajñā́ya ródasī ánu ṣyādāré syāma duritásya bʰū́reḥ |

bʰū́ri ciddʰí tujató mártyasya supārā́so vasavo barháṇāvat || 8||







































śunáṃ huvema magʰávānamíndramasmínbʰáre nṛ́tamaṃ vā́jasātau |

śṛṇvántamugrámūtáye samátsu gʰnántaṃ vṛtrā́ṇi saṃjítaṃ dʰánānām || 9||




































 

 


Sūkta 3.40 








índra tvā vṛṣabʰáṃ vayáṃ suté sóme havāmahe |

sá pāhi mádʰvo ándʰasaḥ || 1||







































índra kratuvídaṃ sutáṃ sómaṃ harya puruṣṭuta |

píbā́ vṛṣasva tā́tṛpim || 2||







































índra prá ṇo dʰitā́vānaṃ yajñáṃ víśvebʰirdevébʰiḥ |

tirá stavāna viśpate || 3||







































índra sómāḥ sutā́ imé táva prá yanti satpate |

kṣáyaṃ candrā́sa índavaḥ || 4||







































dadʰiṣvā́ jaṭʰáre sutáṃ sómamindra váreṇyam |

táva dyukṣā́sa índavaḥ || 5||







































gírvaṇaḥ pāhí naḥ sutáṃ mádʰordʰā́rābʰirajyase |

índra tvā́dātamídyáśaḥ || 6||







































abʰí dyumnā́ni vanína índraṃ sacante ákṣitā |

pītvī́ sómasya vāvṛdʰe || 7||







































arvāváto na ā́ gahi parāvátaśca vṛtrahan |

imā́ juṣasva no gíraḥ || 8||







































yádantarā́ parāvátamarvāvátaṃ ca hūyáse |

índrehá táta ā́ gahi || 9||




































 

 


Sūkta 3.41 








ā́ tū́ na indra madryàggʰuvānáḥ sómapītaye |

háribʰyāṃ yāhyadrivaḥ || 1||







































sattó hótā na ṛtvíyastistiré barhírānuṣák |

áyujranprātárádrayaḥ || 2||







































imā́ bráhma brahmavāhaḥ kriyánta ā́ barhíḥ sīda |

vīhí śūra puroḷā́śam || 3||







































rārandʰí sávaneṣu ṇa eṣú stómeṣu vṛtrahan |

uktʰéṣvindra girvaṇaḥ || 4||







































matáyaḥ somapā́murúṃ rihánti śávasaspátim |

índraṃ vatsáṃ ná mātáraḥ || 5||







































sá mandasvā hyándʰaso rā́dʰase tanvā̀ mahé |

ná stotā́raṃ nidé karaḥ || 6||







































vayámindra tvāyávo havíṣmanto jarāmahe |

utá tvámasmayúrvaso || 7||







































mā́ré asmádví mumuco háripriyārvā́ṅyāhi |

índra svadʰāvo mátsvehá || 8||







































arvā́ñcaṃ tvā sukʰé rátʰe váhatāmindra keśínā |

gʰṛtásnū barhírāsáde || 9||




































 

 


Sūkta 3.42 








úpa naḥ sutámā́ gahi sómamindra gávāśiram |

háribʰyāṃ yáste asmayúḥ || 1||







































támindra mádamā́ gahi barhiṣṭʰā́ṃ grā́vabʰiḥ sutám |

kuvínnvasya tṛpṇávaḥ || 2||







































índramittʰā́ gíro mámā́cʰāguriṣitā́ itáḥ |

āvṛ́te sómapītaye || 3||







































índraṃ sómasya pītáye stómairihá havāmahe |

uktʰébʰiḥ kuvídāgámat || 4||







































índra sómāḥ sutā́ imé tā́ndadʰiṣva śatakrato |

jaṭʰáre vājinīvaso || 5||







































vidmā́ hí tvā dʰanaṃjayáṃ vā́jeṣu dadʰṛṣáṃ kave |

ádʰā te sumnámīmahe || 6||







































imámindra gávāśiraṃ yávāśiraṃ ca naḥ piba |

āgátyā vṛ́ṣabʰiḥ sutám || 7||







































túbʰyédindra svá okyè sómaṃ codāmi pītáye |

eṣá rārantu te hṛdí || 8||







































tvā́ṃ sutásya pītáye pratnámindra havāmahe |

kuśikā́so avasyávaḥ || 9||




































 

 


Sūkta 3.43 








ā́ yāhyarvā́ṅúpa vandʰureṣṭʰā́stávédánu pradívaḥ somapéyam |

priyā́ sákʰāyā ví mucópa barhístvā́mimé havyavā́ho havante || 1||







































ā́ yāhi pūrvī́ráti carṣaṇī́rā́m̐ aryá āśíṣa úpa no háribʰyām |

imā́ hí tvā matáya stómataṣṭā índra hávante sakʰyáṃ juṣāṇā́ḥ || 2||







































ā́ no yajñáṃ namovṛ́dʰaṃ sajóṣā índra deva háribʰiryāhi tū́yam |

aháṃ hí tvā matíbʰirjóhavīmi gʰṛtáprayāḥ sadʰamā́de mádʰūnām || 3||







































ā́ ca tvā́metā́ vṛ́ṣaṇā váhāto hárī sákʰāyā sudʰúrā sváṅgā |

dʰānā́vadíndraḥ sávanaṃ juṣāṇáḥ sákʰā sákʰyuḥ śṛṇavadvándanāni || 4||







































kuvínmā gopā́ṃ kárase jánasya kuvídrā́jānaṃ magʰavannṛjīṣin |

kuvínma ṛ́ṣiṃ papivā́ṃsaṃ sutásya kuvínme vásvo amṛ́tasya śíkṣāḥ || 5||







































ā́ tvā bṛhánto hárayo yujānā́ arvā́gindra sadʰamā́do vahantu |

prá yé dvitā́ divá ṛñjántyā́tāḥ súsammṛṣṭāso vṛṣabʰásya mūrā́ḥ || 6||







































índra píba vṛ́ṣadʰūtasya vṛ́ṣṇa ā́ yáṃ te śyená uśaté jabʰā́ra |

yásya máde cyāváyasi prá kṛṣṭī́ryásya máde ápa gotrā́ vavártʰa || 7||







































śunáṃ huvema magʰávānamíndramasmínbʰáre nṛ́tamaṃ vā́jasātau |

śṛṇvántamugrámūtáye samátsu gʰnántaṃ vṛtrā́ṇi saṃjítaṃ dʰánānām || 8||




































 

 


Sūkta 3.44 








ayáṃ te astu haryatáḥ sóma ā́ háribʰiḥ sutáḥ |

juṣāṇá indra háribʰirna ā́ gahyā́ tiṣṭʰa háritaṃ rátʰam || 1||







































haryánnuṣásamarcayaḥ sū́ryaṃ haryánnarocayaḥ |

vidvā́m̐ścikitvā́nharyaśva vardʰasa índra víśvā abʰí śríyaḥ || 2||







































dyā́míndro háridʰāyasaṃ pṛtʰivī́ṃ hárivarpasam |

ádʰārayaddʰarítorbʰū́ri bʰójanaṃ yáyorantárháriścárat || 3||







































jajñānó hárito vṛ́ṣā víśvamā́ bʰāti rocanám |

háryaśvo háritaṃ dʰatta ā́yudʰamā́ vájraṃ bāhvórhárim || 4||







































índro haryántamárjunaṃ vájraṃ śukraírabʰī́vṛtam |

ápāvṛṇoddʰáribʰirádribʰiḥ sutámúdgā́ háribʰirājata || 5||




































 

 


Sūkta 3.45 








ā́ mandraírindra háribʰiryāhí mayū́raromabʰiḥ |

mā́ tvā ké cinní yamanvíṃ ná pāśínó'ti dʰánveva tā́m̐ ihi || 1||







































vṛtrakʰādó valaṃrujáḥ purā́ṃ darmó apā́majáḥ |

stʰā́tā rátʰasya háryorabʰisvará índro dṛḷhā́ cidārujáḥ || 2||







































gambʰīrā́m̐ udadʰī́m̐riva krátuṃ puṣyasi gā́ iva |

prá sugopā́ yávasaṃ dʰenávo yatʰā hradáṃ kulyā́ ivāśata || 3||







































ā́ nastújaṃ rayíṃ bʰarā́ṃśaṃ ná pratijānaté |

vṛkṣáṃ pakváṃ pʰálamaṅkī́va dʰūnuhī́ndra sampā́raṇaṃ vásu || 4||







































svayúrindra svarā́ḷasi smáddiṣṭiḥ sváyaśastaraḥ |

sá vāvṛdʰāná ójasā puruṣṭuta bʰávā naḥ suśrávastamaḥ || 5||




































 

 


Sūkta 3.46 








yudʰmásya te vṛṣabʰásya svarā́ja ugrásya yū́na stʰávirasya gʰṛ́ṣveḥ |

ájūryato vajríṇo vīryā̀ṇī́ndra śrutásya maható mahā́ni || 1||







































mahā́m̐ asi mahiṣa vṛ́ṣṇyebʰirdʰanaspṛ́dugra sáhamāno anyā́n |

éko víśvasya bʰúvanasya rā́jā sá yodʰáyā ca kṣayáyā ca jánān || 2||







































prá mā́trābʰī ririce rócamānaḥ prá devébʰirviśváto ápratītaḥ |

prá majmánā divá índraḥ pṛtʰivyā́ḥ prórórmahó antárikṣādṛjīṣī́ || 3||







































urúṃ gabʰīráṃ janúṣābʰyùgráṃ viśvávyacasamavatáṃ matīnā́m |

índraṃ sómāsaḥ pradívi sutā́saḥ samudráṃ ná sraváta ā́ viśanti || 4||







































yáṃ sómamindra pṛtʰivī́dyā́vā gárbʰaṃ ná mātā́ bibʰṛtástvāyā́ |

táṃ te hinvanti támu te mṛjantyadʰvaryávo vṛṣabʰa pā́tavā́ u || 5||




































 

 


Sūkta 3.47 








marútvām̐ indra vṛṣabʰó ráṇāya píbā sómamanuṣvadʰáṃ mádāya |

ā́ siñcasva jaṭʰáre mádʰva ūrmíṃ tváṃ rā́jāsi pradívaḥ sutā́nām || 1||







































sajóṣā indra ságaṇo marúdbʰiḥ sómaṃ piba vṛtrahā́ śūra vidvā́n |

jahí śátrūm̐rápa mṛ́dʰo nudasvā́tʰā́bʰayaṃ kṛṇuhi viśváto naḥ || 2||







































utá ṛtúbʰirṛtupāḥ pāhi sómamíndra devébʰiḥ sákʰibʰiḥ sutáṃ naḥ |

yā́m̐ ā́bʰajo marúto yé tvā́nváhanvṛtrámádadʰustúbʰyamójaḥ || 3||







































yé tvāhihátye magʰavannávardʰanyé śāmbaré harivo yé gáviṣṭau |

yé tvā nūnámanumádanti víprāḥ píbendra sómaṃ ságaṇo marúdbʰiḥ || 4||







































marútvantaṃ vṛṣabʰáṃ vāvṛdʰānámákavāriṃ divyáṃ śāsámíndram |

viśvāsā́hamávase nū́tanāyográṃ sahodā́mihá táṃ huvema || 5||




































 

 


Sūkta 3.48 








sadyó ha jātó vṛṣabʰáḥ kanī́naḥ prábʰartumāvadándʰasaḥ sutásya |

sādʰóḥ piba pratikāmáṃ yátʰā te rásāśiraḥ pratʰamáṃ somyásya || 1||







































yájjā́yatʰāstádáharasya kā́me'ṃśóḥ pīyū́ṣamapibo giriṣṭʰā́m |

táṃ te mātā́ pári yóṣā jánitrī maháḥ pitúrdáma ā́siñcadágre || 2||







































upastʰā́ya mātáramánnamaiṭṭa tigmámapaśyadabʰí sómamū́dʰaḥ |

prayāváyannacaradgṛ́tso anyā́nmahā́ni cakre purudʰápratīkaḥ || 3||







































ugrásturāṣā́ḷabʰíbʰūtyojā yatʰāvaśáṃ tanvàṃ cakra eṣáḥ |

tváṣṭāramíndro janúṣābʰibʰū́yāmúṣyā sómamapibaccamū́ṣu || 4||







































śunáṃ huvema magʰávānamíndramasmínbʰáre nṛ́tamaṃ vā́jasātau |

śṛṇvántamugrámūtáye samátsu gʰnántaṃ vṛtrā́ṇi saṃjítaṃ dʰánānām || 5||




































 

 


Sūkta 3.49 








śáṃsā mahā́míndraṃ yásminvíśvā ā́ kṛṣṭáyaḥ somapā́ḥ kā́mamávyan |

yáṃ sukrátuṃ dʰiṣáṇe vibʰvataṣṭáṃ gʰanáṃ vṛtrā́ṇāṃ janáyanta devā́ḥ || 1||







































yáṃ nú nákiḥ pṛ́tanāsu svarā́jaṃ dvitā́ tárati nṛ́tamaṃ hariṣṭʰā́m |

inátamaḥ sátvabʰiryó ha śūṣaíḥ pṛtʰujráyā aminādā́yurdásyoḥ || 2||







































sahā́vā pṛtsú taráṇirnā́rvā vyānaśī́ ródasī mehánāvān |

bʰágo ná kāré hávyo matīnā́ṃ pitéva cā́ruḥ suhávo vayodʰā́ḥ || 3||







































dʰartā́ divó rájasaspṛṣṭá ūrdʰvó rátʰo ná vāyúrvásubʰirniyútvān |

kṣapā́ṃ vastā́ janitā́ sū́ryasya víbʰaktā bʰāgáṃ dʰiṣáṇeva vā́jam || 4||







































śunáṃ huvema magʰávānamíndramasmínbʰáre nṛ́tamaṃ vā́jasātau |

śṛṇvántamugrámūtáye samátsu gʰnántaṃ vṛtrā́ṇi saṃjítaṃ dʰánānām || 5||




































 

 


Sūkta 3.50 








índraḥ svā́hā pibatu yásya sóma āgátyā túmro vṛṣabʰó marútvān |

óruvyácāḥ pṛṇatāmebʰíránnairā́sya havístanvàḥ kā́mamṛdʰyāḥ || 1||







































ā́ te saparyū́ javáse yunajmi yáyoránu pradívaḥ śruṣṭímā́vaḥ |

ihá tvā dʰeyurhárayaḥ suśipra píbā tvàsyá súṣutasya cā́roḥ || 2||







































góbʰirmimikṣúṃ dadʰire supārámíndraṃ jyaíṣṭʰyāya dʰā́yase gṛṇānā́ḥ |

mandānáḥ sómaṃ papivā́m̐ ṛjīṣinsámasmábʰyaṃ purudʰā́ gā́ iṣaṇya || 3||







































imáṃ kā́maṃ mandayā góbʰiráśvaiścandrávatā rā́dʰasā paprátʰaśca |

svaryávo matíbʰistúbʰyaṃ víprā índrāya vā́haḥ kuśikā́so akran || 4||







































śunáṃ huvema magʰávānamíndramasmínbʰáre nṛ́tamaṃ vā́jasātau |

śṛṇvántamugrámūtáye samátsu gʰnántaṃ vṛtrā́ṇi saṃjítaṃ dʰánānām || 5||




































 

 


Sūkta 3.51 








carṣaṇīdʰṛ́taṃ magʰávānamuktʰyàmíndraṃ gíro bṛhatī́rabʰyànūṣata |

vāvṛdʰānáṃ puruhūtáṃ suvṛktíbʰirámartyaṃ járamāṇaṃ divédive || 1||







































śatákratumarṇaváṃ śākínaṃ náraṃ gíro ma índramúpa yanti viśvátaḥ |

vājasániṃ pūrbʰídaṃ tū́rṇimaptúraṃ dʰāmasā́camabʰiṣā́caṃ svarvídam || 2||







































ākaré vásorjaritā́ panasyate'nehása stúbʰa índro duvasyati |

vivásvataḥ sádana ā́ hí pipriyé satrāsā́hamabʰimātihánaṃ stuhi || 3||







































nṛṇā́mu tvā nṛ́tamaṃ gīrbʰíruktʰaírabʰí prá vīrámarcatā sabā́dʰaḥ |

sáṃ sáhase purumāyó jihīte námo asya pradíva éka īśe || 4||







































pūrvī́rasya niṣṣídʰo mártyeṣu purū́ vásūni pṛtʰivī́ bibʰarti |

índrāya dyā́va óṣadʰīrutā́po rayíṃ rakṣanti jīráyo vánāni || 5||







































túbʰyaṃ bráhmāṇi gíra indra túbʰyaṃ satrā́ dadʰire harivo juṣásva |

bodʰyā̀pírávaso nū́tanasya sákʰe vaso jaritṛ́bʰyo váyo dʰāḥ || 6||







































índra marutva ihá pāhi sómaṃ yátʰā śāryāté ápibaḥ sutásya |

táva práṇītī táva śūra śármannā́ vivāsanti kaváyaḥ suyajñā́ḥ || 7||







































sá vāvaśāná ihá pāhi sómaṃ marúdbʰirindra sákʰibʰiḥ sutáṃ naḥ |

jātáṃ yáttvā pári devā́ ábʰūṣanmahé bʰárāya puruhūta víśve || 8||







































aptū́rye maruta āpíreṣó'mandanníndramánu dā́tivārāḥ |

tébʰiḥ sākáṃ pibatu vṛtrakʰādáḥ sutáṃ sómaṃ dāśúṣaḥ své sadʰástʰe || 9||







































idáṃ hyánvójasā sutáṃ rādʰānāṃ pate |

píbā tvàsyá girvaṇaḥ || 10||







































yáste ánu svadʰā́másatsuté ní yacʰa tanvàm |

sá tvā mamattu somyám || 11||







































prá te aśnotu kukṣyóḥ préndra bráhmaṇā śíraḥ |

prá bāhū́ śūra rā́dʰase || 12||




































 

 


Sūkta 3.52 








dʰānā́vantaṃ karambʰíṇamapūpávantamuktʰínam |

índra prātárjuṣasva naḥ || 1||







































puroḷā́śaṃ pacatyàṃ juṣásvendrā́ gurasva ca |

túbʰyaṃ havyā́ni sisrate || 2||







































puroḷā́śaṃ ca no gʰáso joṣáyāse gíraśca naḥ |

vadʰūyúriva yóṣaṇām || 3||







































puroḷā́śaṃ sanaśruta prātaḥsāvé juṣasva naḥ |

índra kráturhí te bṛhán || 4||







































mā́dʰyaṃdinasya sávanasya dʰānā́ḥ puroḷā́śamindra kṛṣvehá cā́rum |

prá yátstotā́ jaritā́ tū́rṇyartʰo vṛṣāyámāṇa úpa gīrbʰírī́ṭṭe || 5||







































tṛtī́ye dʰānā́ḥ sávane puruṣṭuta puroḷā́śamā́hutaṃ māmahasva naḥ |

ṛbʰumántaṃ vā́javantaṃ tvā kave práyasvanta úpa śikṣema dʰītíbʰiḥ || 6||







































pūṣaṇváte te cakṛmā karambʰáṃ hárivate háryaśvāya dʰānā́ḥ |

apūpámaddʰi ságaṇo marúdbʰiḥ sómaṃ piba vṛtrahā́ śūra vidvā́n || 7||







































práti dʰānā́ bʰarata tū́yamasmai puroḷā́śaṃ vīrátamāya nṛṇā́m |

divédive sadṛ́śīrindra túbʰyaṃ várdʰantu tvā somapéyāya dʰṛṣṇo || 8||




































 

 


Sūkta 3.53 








índrāparvatā bṛhatā́ rátʰena vāmī́ríṣa ā́ vahataṃ suvī́rāḥ |

vītáṃ havyā́nyadʰvaréṣu devā várdʰetʰāṃ gīrbʰíríḷayā mádantā || 1||







































tíṣṭʰā sú kaṃ magʰavanmā́ párā gāḥ sómasya nú tvā súṣutasya yakṣi |

pitúrná putráḥ sícamā́ rabʰe ta índra svā́diṣṭʰayā girā́ śacīvaḥ || 2||







































śáṃsāvādʰvaryo práti me gṛṇīhī́ndrāya vā́haḥ kṛṇavāva júṣṭam |

édáṃ barhíryájamānasya sīdā́tʰā ca bʰūduktʰámíndrāya śastám || 3||







































jāyédástaṃ magʰavansédu yónistádíttvā yuktā́ hárayo vahantu |

yadā́ kadā́ ca sunávāma sómamagníṣṭvā dūtó dʰanvātyácʰa || 4||







































párā yāhi magʰavannā́ ca yāhī́ndra bʰrātarubʰayátrā te ártʰam |

yátrā rátʰasya bṛható nidʰā́naṃ vimócanaṃ vājíno rā́sabʰasya || 5||







































ápāḥ sómamástamindra prá yāhi kalyāṇī́rjāyā́ suráṇaṃ gṛhé te |

yátrā rátʰasya bṛható nidʰā́naṃ vimócanaṃ vājíno dákṣiṇāvat || 6||







































imé bʰojā́ áṅgiraso vírūpā divásputrā́so ásurasya vīrā́ḥ |

viśvā́mitrāya dádato magʰā́ni sahasrasāvé prá tiranta ā́yuḥ || 7||







































rūpáṃrūpaṃ magʰávā bobʰavīti māyā́ḥ kṛṇvānástanvàṃ pari svā́m |

tríryáddiváḥ pári muhūrtámā́gātsvaírmántrairánṛtupā ṛtā́vā || 8||







































mahā́m̐ ṛ́ṣirdevajā́ devájūtó'stabʰnātsíndʰumarṇaváṃ nṛcákṣāḥ |

viśvā́mitro yádávahatsudā́samápriyāyata kuśikébʰiríndraḥ || 9||







































haṃsā́ iva kṛṇutʰa ślókamádribʰirmádanto gīrbʰíradʰvaré suté sácā |

devébʰirviprā ṛṣayo nṛcakṣaso ví pibadʰvaṃ kuśikāḥ somyáṃ mádʰu || 10||







































úpa préta kuśikāścetáyadʰvamáśvaṃ rāyé prá muñcatā sudā́saḥ |

rā́jā vṛtráṃ jaṅgʰanatprā́gápāgúdagátʰā yajāte vára ā́ pṛtʰivyā́ḥ || 11||







































yá imé ródasī ubʰé ahámíndramátuṣṭavam |

viśvā́mitrasya rakṣati bráhmedáṃ bʰā́rataṃ jánam || 12||







































viśvā́mitrā arāsata bráhméndrāya vajríṇe |

káradínnaḥ surā́dʰasaḥ || 13||







































kíṃ te kṛṇvanti kī́kaṭeṣu gā́vo nā́śíraṃ duhré ná tapanti gʰarmám |

ā́ no bʰara prámagandasya védo naicāśākʰáṃ magʰavanrandʰayā naḥ || 14||







































sasarparī́rámatiṃ bā́dʰamānā bṛhánmimāya jamádagnidattā |

ā́ sū́ryasya duhitā́ tatāna śrávo devéṣvamṛ́tamajuryám || 15||







































sasarparī́rabʰarattū́yamebʰyó'dʰi śrávaḥ pā́ñcajanyāsu kṛṣṭíṣu |

sā́ pakṣyā̀ návyamā́yurdádʰānā yā́ṃ me palastijamadagnáyo dadúḥ || 16||







































stʰiraú gā́vau bʰavatāṃ vīḷúrákṣo méṣā́ ví varhi mā́ yugáṃ ví śāri |

índraḥ pātalyè dadatāṃ śárītoráriṣṭaneme abʰí naḥ sacasva || 17||







































bálaṃ dʰehi tanū́ṣu no bálamindrānaḷútsu naḥ |

bálaṃ tokā́ya tánayāya jīváse tváṃ hí baladā́ ási || 18||







































abʰí vyayasva kʰadirásya sā́ramójo dʰehi spandané śiṃśápāyām |

ákṣa vīḷo vīḷita vīḷáyasva mā́ yā́mādasmā́dáva jīhipo naḥ || 19||







































ayámasmā́nvánaspátirmā́ ca hā́ mā́ ca rīriṣat |

svastyā́ gṛhébʰya ā́vasā́ ā́ vimócanāt || 20||







































índrotíbʰirbahulā́bʰirno adyá yācʰreṣṭʰā́bʰirmagʰavañcʰūra jinva |

yó no dvéṣṭyádʰaraḥ sáspadīṣṭa yámu dviṣmástámu prāṇó jahātu || 21||







































paraśúṃ cidví tapati śimbaláṃ cidví vṛścati |

ukʰā́ cidindra yéṣantī práyastā pʰénamasyati || 22||







































ná sā́yakasya cikite janāso lodʰáṃ nayanti páśu mányamānāḥ |

nā́vājinaṃ vājínā hāsayanti ná gardabʰáṃ puró áśvānnayanti || 23||







































imá indra bʰaratásya putrā́ apapitváṃ cikiturná prapitvám |

hinvántyáśvamáraṇaṃ ná nítyaṃ jyā̀vājaṃ pári ṇayantyājaú || 24||




































 

 


Sūkta 3.54 








imáṃ mahé vidatʰyā̀ya śūṣáṃ śáśvatkṛ́tva ī́ḍyāya prá jabʰruḥ |

śṛṇótu no dámyebʰiránīkaiḥ śṛṇótvagnírdivyaírájasraḥ || 1||







































máhi mahé divé arcā pṛtʰivyaí kā́mo ma icʰáñcarati prajānán |

yáyorha stóme vidátʰeṣu devā́ḥ saparyávo mādáyante sácāyóḥ || 2||







































yuvórṛtáṃ rodasī satyámastu mahé ṣú ṇaḥ suvitā́ya prá bʰūtam |

idáṃ divé námo agne pṛtʰivyaí saparyā́mi práyasā yā́mi rátnam || 3||







































utó hí vāṃ pūrvyā́ āvividrá ṛ́tāvarī rodasī satyavā́caḥ |

náraścidvāṃ samitʰé śū́rasātau vavandiré pṛtʰivi vévidānāḥ || 4||







































kó addʰā́ veda ká ihá prá vocaddevā́m̐ ácʰā patʰyā̀ kā́ sámeti |

dádṛśra eṣāmavamā́ sádāṃsi páreṣu yā́ gúhyeṣu vratéṣu || 5||







































kavírnṛcákṣā abʰí ṣīmacaṣṭa ṛtásya yónā vígʰṛte mádantī |

nā́nā cakrāte sádanaṃ yátʰā véḥ samānéna krátunā saṃvidāné || 6||







































samānyā́ víyute dūréante dʰruvé padé tastʰaturjāgarū́ke |

utá svásārā yuvatī́ bʰávantī ā́du bruvāte mitʰunā́ni nā́ma || 7||







































víśvédeté jánimā sáṃ vivikto mahó devā́nbíbʰratī ná vyatʰete |

éjaddʰruváṃ patyate víśvamékaṃ cáratpatatrí víṣuṇaṃ ví jātám || 8||







































sánā purāṇámádʰyemyārā́nmaháḥ pitúrjanitúrjāmí tánnaḥ |

devā́so yátra panitā́ra évairuraú patʰí vyute tastʰúrantáḥ || 9||







































imáṃ stómaṃ rodasī prá bravīmyṛdūdárāḥ śṛṇavannagnijihvā́ḥ |

mitráḥ samrā́jo váruṇo yúvāna ādityā́saḥ kaváyaḥ papratʰānā́ḥ || 10||







































híraṇyapāṇiḥ savitā́ sujihvástrírā́ divó vidátʰe pátyamānaḥ |

devéṣu ca savitaḥ ślókamáśrerā́dasmábʰyamā́ suva sarvátātim || 11||







































sukṛ́tsupāṇíḥ svávām̐ ṛtā́vā devástváṣṭā́vase tā́ni no dʰāt |

pūṣaṇvánta ṛbʰavo mādayadʰvamūrdʰvágrāvāṇo adʰvarámataṣṭa || 12||







































vidyúdratʰā marúta ṛṣṭimánto divó máryā ṛtájātā ayā́saḥ |

sárasvatī śṛṇavanyajñíyāso dʰā́tā rayíṃ sahávīraṃ turāsaḥ || 13||











13. (vidyutnfs-ratʰanms)jmpn marutNmpn ṛṣṭimantjmpn  
     dyunmsb maryanmpn (ṛtanns-jātajms)jmpn ayāsjmpn |
     sarasvatīNfsn śṛṇavanvp·Ae3p«√śru yajñiyajmpn  
     dʰātavp·Ao2p«√dʰā rayinmsa sahavīrajmsa turajmpv 












13. [Since] having lightning for a chariot, having spears, agile, 
    born of ṛta recruits from Heaven --- Marut-s ---
    [and] Sarasvatī would listen, may they, worthy of a sacrifice,
    bestow the treasure coming with the valiant one, O pressing forward ones!
















víṣṇuṃ stómāsaḥ purudasmámarkā́ bʰágasyeva kāríṇo yā́mani gman |

urukramáḥ kakuhó yásya pūrvī́rná mardʰanti yuvatáyo jánitrīḥ || 14||







































índro víśvairvīryaìḥ pátyamāna ubʰé ā́ paprau ródasī mahitvā́ |

puraṃdaró vṛtrahā́ dʰṛṣṇúṣeṇaḥ saṃgṛ́bʰyā na ā́ bʰarā bʰū́ri paśváḥ || 15||







































nā́satyā me pitárā bandʰupṛ́cʰā sajātyàmaśvínoścā́ru nā́ma |

yuváṃ hí stʰó rayidaú no rayīṇā́ṃ dātráṃ rakṣetʰe ákavairádabdʰā || 16||







































maháttádvaḥ kavayaścā́ru nā́ma yáddʰa devā bʰávatʰa víśva índre |

sákʰa ṛbʰúbʰiḥ puruhūta priyébʰirimā́ṃ dʰíyaṃ sātáye takṣatā naḥ || 17||







































aryamā́ ṇo áditiryajñíyāsó'dabdʰāni váruṇasya vratā́ni |

yuyóta no anapatyā́ni gántoḥ prajā́vānnaḥ paśumā́m̐ astu gātúḥ || 18||







































devā́nāṃ dūtáḥ purudʰá prásūtó'nāgānno vocatu sarvátātā |

śṛṇótu naḥ pṛtʰivī́ dyaúrutā́paḥ sū́ryo nákṣatrairurvàntárikṣam || 19||







































śṛṇvántu no vṛ́ṣaṇaḥ párvatāso dʰruvákṣemāsa íḷayā mádantaḥ |

ādityaírno áditiḥ śṛṇotu yácʰantu no marútaḥ śárma bʰadrám || 20||







































sádā sugáḥ pitumā́m̐ astu pántʰā mádʰvā devā óṣadʰīḥ sáṃ pipṛkta |

bʰágo me agne sakʰyé ná mṛdʰyā údrāyó aśyāṃ sádanaṃ purukṣóḥ || 21||







































svádasva havyā́ sámíṣo didīhyasmadryàksáṃ mimīhi śrávāṃsi |

víśvām̐ agne pṛtsú tā́ñjeṣi śátrūnáhā víśvā sumánā dīdihī naḥ || 22||








































 

 


Sūkta 3.55 








uṣásaḥ pū́rvā ádʰa yádvyūṣúrmahádví jajñe akṣáraṃ padé góḥ |

vratā́ devā́nāmúpa nú prabʰū́ṣanmaháddevā́nāmasuratvámékam || 1||







































mó ṣū́ ṇo átra juhuranta devā́ mā́ pū́rve agne pitáraḥ padajñā́ḥ |

purāṇyóḥ sádmanoḥ ketúrantármaháddevā́nāmasuratvámékam || 2||







































ví me purutrā́ patayanti kā́māḥ śámyácʰā dīdye pūrvyā́ṇi |

sámiddʰe agnā́vṛtámídvadema maháddevā́nāmasuratvámékam || 3||







































samānó rā́jā víbʰṛtaḥ purutrā́ śáye śayā́su práyuto vánā́nu |

anyā́ vatsáṃ bʰárati kṣéti mātā́ maháddevā́nāmasuratvámékam || 4||







































ākṣítpū́rvāsváparā anūrútsadyó jātā́su táruṇīṣvantáḥ |

antárvatīḥ suvate ápravītā maháddevā́nāmasuratvámékam || 5||







































śayúḥ parástādádʰa nú dvimātā́bandʰanáścarati vatsá ékaḥ |

mitrásya tā́ váruṇasya vratā́ni maháddevā́nāmasuratvámékam || 6||







































dvimātā́ hótā vidátʰeṣu samrā́ḷánvágraṃ cárati kṣéti budʰnáḥ |

prá ráṇyāni raṇyavā́co bʰarante maháddevā́nāmasuratvámékam || 7||







































śū́rasyeva yúdʰyato antamásya pratīcī́naṃ dadṛśe víśvamāyát |

antármatíścarati niṣṣídʰaṃ górmaháddevā́nāmasuratvámékam || 8||







































ní veveti palitó dūtá āsvantármahā́m̐ścarati rocanéna |

vápūṃṣi bíbʰradabʰí no ví caṣṭe maháddevā́nāmasuratvámékam || 9||







































víṣṇurgopā́ḥ paramáṃ pāti pā́tʰaḥ priyā́ dʰā́mānyamṛ́tā dádʰānaḥ |

agníṣṭā́ víśvā bʰúvanāni veda maháddevā́nāmasuratvámékam || 10||







































nā́nā cakrāte yamyā̀ vápūṃṣi táyoranyádrócate kṛṣṇámanyát |

śyā́vī ca yádáruṣī ca svásārau maháddevā́nāmasuratvámékam || 11||







































mātā́ ca yátra duhitā́ ca dʰenū́ sabardúgʰe dʰāpáyete samīcī́ |

ṛtásya té sádasīḷe antármaháddevā́nāmasuratvámékam || 12||







































anyásyā vatsáṃ rihatī́ mimāya káyā bʰuvā́ ní dadʰe dʰenúrū́dʰaḥ |

ṛtásya sā́ páyasāpinvatéḷā maháddevā́nāmasuratvámékam || 13||







































pádyā vaste pururū́pā vápūṃṣyūrdʰvā́ tastʰau tryáviṃ rérihāṇā |

ṛtásya sádma ví carāmi vidvā́nmaháddevā́nāmasuratvámékam || 14||







































padé iva níhite dasmé antástáyoranyádgúhyamāvíranyát |

sadʰrīcīnā́ patʰyā̀ sā́ víṣūcī maháddevā́nāmasuratvámékam || 15||







































ā́ dʰenávo dʰunayantāmáśiśvīḥ sabardúgʰāḥ śaśayā́ ápradugdʰāḥ |

návyānavyā yuvatáyo bʰávantīrmaháddevā́nāmasuratvámékam || 16||







































yádanyā́su vṛṣabʰó róravīti só anyásminyūtʰé ní dadʰāti rétaḥ |

sá hí kṣápāvānsá bʰágaḥ sá rā́jā maháddevā́nāmasuratvámékam || 17||







































vīrásya nú sváśvyaṃ janāsaḥ prá nú vocāma vidúrasya devā́ḥ |

ṣoḷhā́ yuktā́ḥ páñcapañcā́ vahanti maháddevā́nāmasuratvámékam || 18||







































devástváṣṭā savitā́ viśvárūpaḥ pupóṣa prajā́ḥ purudʰā́ jajāna |

imā́ ca víśvā bʰúvanānyasya maháddevā́nāmasuratvámékam || 19||







































mahī́ sámairaccamvā̀ samīcī́ ubʰé té asya vásunā nyṛ̀ṣṭe |

śṛṇvé vīró vindámāno vásūni maháddevā́nāmasuratvámékam || 20||







































imā́ṃ ca naḥ pṛtʰivī́ṃ viśvádʰāyā úpa kṣeti hitámitro ná rā́jā |

puraḥsádaḥ śarmasádo ná vīrā́ maháddevā́nāmasuratvámékam || 21||







































niṣṣídʰvarīsta óṣadʰīrutā́po rayíṃ ta indra pṛtʰivī́ bibʰarti |

sákʰāyaste vāmabʰā́jaḥ syāma maháddevā́nāmasuratvámékam || 22||




































 

 


Sūkta 3.56 








ná tā́ minanti māyíno ná dʰī́rā vratā́ devā́nāṃ pratʰamā́ dʰruvā́ṇi |

ná ródasī adrúhā vedyā́bʰirná párvatā nináme tastʰivā́ṃsaḥ || 1||







































ṣáḍbʰārā́m̐ éko ácaranbibʰartyṛtáṃ várṣiṣṭʰamúpa gā́va ā́guḥ |

tisró mahī́rúparāstastʰurátyā gúhā dvé níhite dárśyékā || 2||







































tripājasyó vṛṣabʰó viśvárūpa utá tryudʰā́ purudʰá prajā́vān |

tryanīkáḥ patyate mā́hināvānsá retodʰā́ vṛṣabʰáḥ śáśvatīnām || 3||







































abʰī́ka āsāṃ padavī́rabodʰyādityā́nāmahve cā́ru nā́ma |

ā́paścidasmā aramanta devī́ḥ pṛ́tʰagvrájantīḥ pári ṣīmavṛñjan || 4||







































trī́ ṣadʰástʰā sindʰavastríḥ kavīnā́mutá trimātā́ vidátʰeṣu samrā́ṭ |

ṛtā́varīryóṣaṇāstisró ápyāstrírā́ divó vidátʰe pátyamānāḥ || 5||







































trírā́ diváḥ savitarvā́ryāṇi divédiva ā́ suva trírno áhnaḥ |

tridʰā́tu rāyá ā́ suvā vásūni bʰága trātardʰiṣaṇe sātáye dʰāḥ || 6||







































trírā́ diváḥ savitā́ soṣavīti rā́jānā mitrā́váruṇā supāṇī́ |

ā́paścidasya ródasī cidurvī́ rátnaṃ bʰikṣanta savitúḥ savā́ya || 7||







































tríruttamā́ dūṇáśā rocanā́ni tráyo rājantyásurasya vīrā́ḥ |

ṛtā́vāna iṣirā́ dūḷábʰāsastrírā́ divó vidátʰe santu devā́ḥ || 8||




































 

 


Sūkta 3.57 








prá me vivikvā́m̐ avidanmanīṣā́ṃ dʰenúṃ cárantīṃ práyutāmágopām |

sadyáścidyā́ duduhé bʰū́ri dʰāséríndrastádagníḥ panitā́ro asyāḥ || 1||







































índraḥ sú pūṣā́ vṛ́ṣaṇā suhástā divó ná prītā́ḥ śaśayáṃ duduhre |

víśve yádasyāṃ raṇáyanta devā́ḥ prá vó'tra vasavaḥ sumnámaśyām || 2||







































yā́ jāmáyo vṛ́ṣṇa icʰánti śaktíṃ namasyántīrjānate gárbʰamasmin |

ácʰā putráṃ dʰenávo vāvaśānā́ maháścaranti bíbʰrataṃ vápūṃṣi || 3||







































ácʰā vivakmi ródasī suméke grā́vṇo yujānó adʰvaré manīṣā́ |

imā́ u te mánave bʰū́rivārā ūrdʰvā́ bʰavanti darśatā́ yájatrāḥ || 4||







































yā́ te jihvā́ mádʰumatī sumedʰā́ ágne devéṣūcyáta urūcī́ |

táyehá víśvām̐ ávase yájatrānā́ sādaya pāyáyā cā mádʰūni || 5||







































yā́ te agne párvatasyeva dʰā́rā́saścantī pīpáyaddeva citrā́ |

tā́masmábʰyaṃ prámatiṃ jātavedo váso rā́sva sumatíṃ viśvájanyām || 6||




































 

 


Sūkta 3.58 








dʰenúḥ pratnásya kā́myaṃ dúhānāntáḥ putráścarati dákṣiṇāyāḥ |

ā́ dyotaníṃ vahati śubʰráyāmoṣása stómo aśvínāvajīgaḥ || 1||







































suyúgvahanti práti vāmṛténordʰvā́ bʰavanti pitáreva médʰāḥ |

járetʰāmasmádví paṇérmanīṣā́ṃ yuvórávaścakṛmā́ yātamarvā́k || 2||







































suyúgbʰiráśvaiḥ suvṛ́tā rátʰena dásrāvimáṃ śṛṇutaṃ ślókamádreḥ |

kímaṅgá vāṃ prátyávartiṃ gámiṣṭʰāhúrvíprāso aśvinā purājā́ḥ || 3||







































ā́ manyetʰāmā́ gataṃ káccidévairvíśve jánāso aśvínā havante |

imā́ hí vāṃ góṛjīkā mádʰūni prá mitrā́so ná dadúrusró ágre || 4||







































tiráḥ purū́ cidaśvinā rájāṃsyāṅgūṣó vāṃ magʰavānā jáneṣu |

éhá yātaṃ patʰíbʰirdevayā́nairdásrāvimé vāṃ nidʰáyo mádʰūnām || 5||







































purāṇámókaḥ sakʰyáṃ śiváṃ vāṃ yuvórnarā dráviṇaṃ jahnā́vyām |

púnaḥ kṛṇvānā́ḥ sakʰyā́ śivā́ni mádʰvā madema sahá nū́ samānā́ḥ || 6||







































áśvinā vāyúnā yuváṃ sudakṣā niyúdbʰiṣca sajóṣasā yuvānā |

nā́satyā tiróahnyaṃ juṣāṇā́ sómaṃ pibatamasrídʰā sudānū || 7||







































áśvinā pári vāmíṣaḥ purūcī́rīyúrgīrbʰíryátamānā ámṛdʰrāḥ |

rátʰo ha vāmṛtajā́ ádrijūtaḥ pári dyā́vāpṛtʰivī́ yāti sadyáḥ || 8||







































áśvinā madʰuṣúttamo yuvā́kuḥ sómastáṃ pātamā́ gataṃ duroṇé |

rátʰo ha vāṃ bʰū́ri várpaḥ kárikratsutā́vato niṣkṛtámā́gamiṣṭʰaḥ || 9||




































 

 


Sūkta 3.59 








mitró jánānyātayati bruvāṇó mitró dādʰāra pṛtʰivī́mutá dyā́m |

mitráḥ kṛṣṭī́ránimiṣābʰí caṣṭe mitrā́ya havyáṃ gʰṛtávajjuhota || 1||







































prá sá mitra márto astu práyasvānyásta āditya śíkṣati vraténa |

ná hanyate ná jīyate tvóto naínamáṃho aśnotyántito ná dūrā́t || 2||







































anamīvā́sa íḷayā mádanto mitájñavo várimannā́ pṛtʰivyā́ḥ |

ādityásya vratámupakṣiyánto vayáṃ mitrásya sumataú syāma || 3||







































ayáṃ mitró namasyàḥ suśévo rā́jā sukṣatró ajaniṣṭa vedʰā́ḥ |

tásya vayáṃ sumataú yajñíyasyā́pi bʰadré saumanasé syāma || 4||







































mahā́m̐ ādityó námasopasádyo yātayájjano gṛṇaté suśévaḥ |

tásmā etátpányatamāya júṣṭamagnaú mitrā́ya havírā́ juhota || 5||







































mitrásya carṣaṇīdʰṛ́tó'vo devásya sānasí |

dyumnáṃ citráśravastamam || 6||







































abʰí yó mahinā́ dívaṃ mitró babʰū́va saprátʰāḥ |

abʰí śrávobʰiḥ pṛtʰivī́m || 7||







































mitrā́ya páñca yemire jánā abʰíṣṭiśavase |

sá devā́nvíśvānbibʰarti || 8||







































mitró devéṣvāyúṣu jánāya vṛktábarhiṣe |

íṣa iṣṭávratā akaḥ || 9||




































 

 


Sūkta 3.60 








ihéha vo mánasā bandʰútā nara uśíjo jagmurabʰí tā́ni védasā |

yā́bʰirmāyā́bʰiḥ prátijūtivarpasaḥ saúdʰanvanā yajñíyaṃ bʰāgámānaśá || 1||







































yā́bʰiḥ śácībʰiścamasā́m̐ ápiṃśata yáyā dʰiyā́ gā́máriṇīta cármaṇaḥ |

yéna hárī mánasā nirátakṣata téna devatvámṛbʰavaḥ sámānaśa || 2||







































índrasya sakʰyámṛbʰávaḥ sámānaśurmánornápāto apáso dadʰanvire |

saudʰanvanā́so amṛtatvámérire viṣṭvī́ śámībʰiḥ sukṛ́taḥ sukṛtyáyā || 3||







































índreṇa yātʰa sarátʰaṃ suté sácām̐ átʰo váśānāṃ bʰavatʰā sahá śriyā́ |

ná vaḥ pratimaí sukṛtā́ni vāgʰataḥ saúdʰanvanā ṛbʰavo vīryā̀ṇi ca || 4||







































índra ṛbʰúbʰirvā́javadbʰiḥ sámukṣitaṃ sutáṃ sómamā́ vṛṣasvā gábʰastyoḥ |

dʰiyéṣitó magʰavandāśúṣo gṛhé saudʰanvanébʰiḥ sahá matsvā nṛ́bʰiḥ || 5||







































índra ṛbʰumā́nvā́javānmatsvehá no'smínsávane śácyā puruṣṭuta |

imā́ni túbʰyaṃ svásarāṇi yemire vratā́ devā́nāṃ mánuṣaśca dʰármabʰiḥ || 6||







































índra ṛbʰúbʰirvājíbʰirvājáyannihá stómaṃ jaritúrúpa yāhi yajñíyam |

śatáṃ kétebʰiriṣirébʰirāyáve sahásraṇītʰo adʰvarásya hómani || 7||




































 

 


Sūkta 3.61 








úṣo vā́jena vājini prácetā stómaṃ juṣasva gṛṇató magʰoni |

purāṇī́ devi yuvatíḥ púraṃdʰiránu vratáṃ carasi viśvavāre || 1||







































úṣo devyámartyā ví bʰāhi candráratʰā sūnṛ́tā īráyantī |

ā́ tvā vahantu suyámāso áśvā híraṇyavarṇāṃ pṛtʰupā́jaso yé || 2||







































úṣaḥ pratīcī́ bʰúvanāni víśvordʰvā́ tiṣṭʰasyamṛ́tasya ketúḥ |

samānámártʰaṃ caraṇīyámānā cakrámiva navyasyā́ vavṛtsva || 3||







































áva syū́meva cinvatī́ magʰónyuṣā́ yāti svásarasya pátnī |

svàrjánantī subʰágā sudáṃsā ā́ntāddiváḥ papratʰa ā́ pṛtʰivyā́ḥ || 4||







































ácʰā vo devī́muṣásaṃ vibʰātī́ṃ prá vo bʰaradʰvaṃ námasā suvṛktím |

ūrdʰváṃ madʰudʰā́ diví pā́jo aśretprá rocanā́ ruruce raṇvásaṃdṛk || 5||







































ṛtā́varī divó arkaírabodʰyā́ revátī ródasī citrámastʰāt |

āyatī́magna uṣásaṃ vibʰātī́ṃ vāmámeṣi dráviṇaṃ bʰíkṣamāṇaḥ || 6||







































ṛtásya budʰná uṣásāmiṣaṇyánvṛ́ṣā mahī́ ródasī ā́ viveśa |

mahī́ mitrásya váruṇasya māyā́ candréva bʰānúṃ ví dadʰe purutrā́ || 7||




































 

 


Sūkta 3.62 








imā́ u vāṃ bʰṛmáyo mányamānā yuvā́vate ná tújyā abʰūvan |

kvà tyádindrāvaruṇā yáśo vāṃ yéna smā sínaṃ bʰáratʰaḥ sákʰibʰyaḥ || 1||







































ayámu vāṃ purutámo rayīyáñcʰaśvattamámávase johavīti |

sajóṣāvindrāvaruṇā marúdbʰirdivā́ pṛtʰivyā́ śṛṇutaṃ hávaṃ me || 2||







































asmé tádindrāvaruṇā vásu ṣyādasmé rayírmarutaḥ sárvavīraḥ |

asmā́nvárūtrīḥ śaraṇaíravantvasmā́nhótrā bʰā́ratī dákṣiṇābʰiḥ || 3||







































bṛ́haspate juṣásva no havyā́ni viśvadevya |

rā́sva rátnāni dāśúṣe || 4||







































śúcimarkaírbṛ́haspátimadʰvaréṣu namasyata |

ánāmyója ā́ cake || 5||







































vṛṣabʰáṃ carṣaṇīnā́ṃ viśvárūpamádābʰyam |

bṛ́haspátiṃ váreṇyam || 6||







































iyáṃ te pūṣannāgʰṛṇe suṣṭutírdeva návyasī |

asmā́bʰistúbʰyaṃ śasyate || 7||







































tā́ṃ juṣasva gíraṃ máma vājayántīmavā dʰíyam |

vadʰūyúriva yóṣaṇām || 8||







































yó víśvābʰí vipáśyati bʰúvanā sáṃ ca páśyati |

sá naḥ pūṣā́vitā́ bʰuvat || 9||







































tátsavitúrváreṇyaṃ bʰárgo devásya dʰīmahi |

dʰíyo yó naḥ pracodáyāt || 10||







































devásya savitúrvayáṃ vājayántaḥ púraṃdʰyā |

bʰágasya rātímīmahe || 11||







































deváṃ náraḥ savitā́raṃ víprā yajñaíḥ suvṛktíbʰiḥ |

namasyánti dʰiyéṣitā́ḥ || 12||







































sómo jigāti gātuvíddevā́nāmeti niṣkṛtám |

ṛtásya yónimāsádam || 13||







































sómo asmábʰyaṃ dvipáde cátuṣpade ca paśáve |

anamīvā́ íṣaskarat || 14||







































asmā́kamā́yurvardʰáyannabʰímātīḥ sáhamānaḥ |

sómaḥ sadʰástʰamā́sadat || 15||







































ā́ no mitrāvaruṇā gʰṛtaírgávyūtimukṣatam |

mádʰvā rájāṃsi sukratū || 16||







































uruśáṃsā namovṛ́dʰā mahnā́ dákṣasya rājatʰaḥ |

drā́gʰiṣṭʰābʰiḥ śucivratā || 17||







































gṛṇānā́ jamádagninā yónāvṛtásya sīdatam |

pātáṃ sómamṛtāvṛdʰā || 18||